સેમિ ફાઈનલ પહેલા સંજુ સેમસન પર પ્રતિબંધનો ખતરો?

કોલકાતાના ઐતિહાસિક ઈડન ગાર્ડન્સ મેદાન પર ભારત અને વેસ્ટઈન્ડીઝ વચ્ચે રમાયેલી સુપર-8ની અંતિમ મેચમાં ટીમ ઈન્ડિયાએ શાનદાર વિજય મેળવીને સેમિ ફાઈનલમાં સ્થાન પાકું કરી લીધું છે. આ જીતના અસલી હીરો વિકેટકીપર બેટર સંજુ સેમસન રહ્યા હતા, જેમણે માત્ર 50 બોલમાં 12 ચોગ્ગા અને 4 છગ્ગાની મદદથી અણનમ 97 રન ફટકાર્યા હતા. જોકે, મેચ પૂરી થયા બાદ સંજુએ જે પ્રકારે ઉજવણી કરી, તેનાથી હવે તેના આગામી મેચ રમવા પર સવાલો ઉઠી રહ્યા છે.

શું છે સમગ્ર વિવાદ ?

ભારતને જીત અપાવ્યા બાદ સંજુ સેમસન ભાવુક થઈ ગયો હતો અને અનોખું સેલિબ્રેશન કરતા તેણે પોતાનું હેલ્મેટ મેદાન પર જોરથી ફેંકી દીધું હતું. સંજુની આ હરકત બાદ સોશિયલ મીડિયા પર અને ક્રિકેટ જગતમાં ચર્ચા શરૂ થઈ છે કે શું આંતરરાષ્ટ્રીય ક્રિકેટ કાઉન્સિલ (ICC) તેની સામે શિસ્તભંગના પગલાં લેશે?

ICCના કડક નિયમો અને સંભવિત દંડ : 

આઈસીસીના આચાર સંહિતા મુજબ, મેદાન પર રમત દરમિયાન કે જીતની ઉજવણી વખતે બેટ અથવા હેલ્મેટ જેવી વસ્તુઓ હવામાં ફેંકવી એ ગેરવર્તણૂક અને શિસ્તભંગની શ્રેણીમાં આવે છે.

સુરક્ષાનું કારણ: આ નિયમ પાછળનું મુખ્ય કારણ મેદાન પર હાજર ખેલાડીઓ, અમ્પાયરો અને ગ્રાઉન્ડ સ્ટાફની સુરક્ષા છે. હેલ્મેટ જેવી ભારે વસ્તુ ફેંકવાથી અજાણતા કોઈને ઈજા થઈ શકે છે.

શિસ્તભંગની કાર્યવાહી: જો અમ્પાયર આ અંગે મેચ રેફરીને રિપોર્ટ કરે, તો ખેલાડીને મેચ ફીના અમુક ટકા દંડ, ડિમેરિટ પોઈન્ટ અથવા જો ગુનો ગંભીર ગણાય તો એક કે તેથી વધુ મેચ માટે સસ્પેન્ડ પણ કરવામાં આવી શકે છે.

જો સંજુ સેમસનને ડિમેરિટ પોઈન્ટ્સને કારણે સસ્પેન્શન મળે, તો તે 5 માર્ચે રમાનારી મહત્વની સેમિ ફાઈનલ ગુમાવી શકે છે, જે ભારતીય ટીમ માટે મોટો આંચકો સાબિત થશે

ભારત અને ઈંગ્લેન્ડ વચ્ચે સેમિ ફાઈનલનો જંગ : 

ટીમ ઈન્ડિયા હવે ટૂર્નામેન્ટની બીજી સેમિ ફાઈનલમાં ઈંગ્લેન્ડ સામે ટકરાશે. આ હાઈ-વોલ્ટેજ મુકાબલો 5 માર્ચ, ગુરુવારના રોજ મુંબઈના વાનખેડે સ્ટેડિયમમાં રમાશે. અગાઉ 2022ના ટી20 વર્લ્ડ કપની સેમિ ફાઈનલમાં પણ આ બંને ટીમો સામસામે હતી, જેમાં ઈંગ્લેન્ડનો વિજય થયો હતો. આ વખતે ભારતીય ટીમ જૂની હારનો બદલો લેવા અને ફાઈનલમાં પહોંચવા માટે મેદાનમાં ઉતરશે

સંજુ સેમસનના ફોર્મને જોતા તેનું પ્લેઈંગ ઈલેવનમાં હોવું ભારત માટે અત્યંત જરૂરી છે, ત્યારે હવે સૌની નજર આઈસીસીના સત્તાવાર નિર્ણય પર ટકેલી છે.