ભારતીય ટીમના પૂર્વ કેપ્ટન રોહિત શર્માએ ઓસ્ટ્રેલિયા પ્રવાસ પર શાનદાર પ્રદર્શન કરીને ફરી એકવાર ટીમ માટે પોતાની યોગ્યતા સાબિત કરી છે. 223 દિવસના લાંબા અંતરાલ પછી ભારતીય ટીમ માટે મેચ રમવા આવેલા રોહિતે બેટથી જોરદાર કમાલ કરી હતી.
રોહિત શર્માએ પર્થમાં સસ્તામાં આઉટ થયા બાદ એડિલેડ ODI માં અડધી સદી ફટકારી હતી, જ્યારે સિડનીની અંતિમ ODI માં તેણે અણનમ સદી ફટકારીને ભારતને ક્લીન સ્વીપથી બચાવ્યું હતું. જોકે, ભારતીય ટીમ આ શ્રેણી 1-2 થી હારી ગઈ હતી, પરંતુ રોહિતની શાનદાર બેટિંગને કારણે તેને પ્લેયર ઓફ ધ સીરિઝ તરીકે પસંદ કરવામાં આવ્યો હતો.
<h3>લાંબા બ્રેકનો ફાયદો</h3>
રોહિતે મે મહિનામાં IPL 2025 પછી કોઈ સ્પર્ધાત્મક ક્રિકેટ રમી ન હતી. તેણે ઓસ્ટ્રેલિયા પ્રવાસ પર આવતા પહેલા સખત તાલીમ લીધી હતી અને પોતાની આ સફળતાનો શ્રેય તે તૈયારીને જ આપ્યો હતો.
BCCIની વેબસાઈટ પર વાત કરતાં રોહિતે કહ્યું, "જ્યારથી મેં રમવાનું શરૂ કર્યું છે, ત્યારથી મને શ્રેણીની તૈયારી માટે ક્યારેય ચારથી પાંચ મહિનાનો સમય મળ્યો નથી. મેં મારી રીતે, મારી પોતાની શરતો પર બધું કરવા માટે આ સમયનો ઉપયોગ કર્યો, અને તે મારા માટે ખરેખર સારું રહ્યું."
તેમણે ઉમેર્યું કે, આ લાંબો સમયગાળો તેમના માટે મહત્વપૂર્ણ હતો કારણ કે તેમને સમજાયું કે બાકીની કારકિર્દી માટે શું કરવાની જરૂર છે. રોહિતે ભારપૂર્વક જણાવ્યું કે, "મેં ઘરે જ સારી તૈયારી કરી હતી. એટલે અહીં આવ્યા પહેલા મેં જે રીતે તૈયારી કરી હતી તેને ઘણો શ્રેય આપું છું. મેં મારી જાતને ઘણો સમય આપ્યો હતો."
રોહિત અને વિરાટ કોહલીને રન બનાવતા જોઈને ભારતીય ચાહકો ખુશ થયા હતા. રોહિતનું આ પ્રદર્શન લાંબા બ્રેક પછી પણ તેની ફિટનેસ અને રમત પ્રત્યેનું સમર્પણ દર્શાવે છે.

રોહિત શર્માનું મોટું નિવેદન

223 દિવસ પછી ક્રિકેટમાં પરત ફર્યા, ઓસ્ટ્રેલિયા સામે સદી ફટકારી ટીમમાં યોગ્યતા સાબિત કરી

October 27, 2025 | 16:03 IST