રેકોર્ડ! ₹15,000 કરોડમાં વેચાઈ રાજસ્થાન રોયલ્સ

ભારતમાં IPLને એક તહેવાર તરીકે જ ગણવામાં આવે છે એવું બોલવું કઈ ખોટું નથી. IPL ફીવરમાં લોકો પોતાની સમર ઇવનીન્ગ્સ મસ્ત રીતે માણતા હોય છે. તેમાં IPL 2026ની સીઝન પહેલા ક્રિકેટ જગતમાંથી સૌથી મોટા સમાચાર સામે આવ્યા છે.

પ્રથમ સીઝનની ચેમ્પિયન ટીમ રાજસ્થાન રોયલ્સ (Rajasthan Royals)ને એક અમેરિકન બિઝનેસમેને રેકોર્ડબ્રેક કિંમતમાં ખરીદી લીધી છે. રાજસ્થાન રોયલ્સ હંમેશા તેનું બેસ્ટ પરફોર્મન્સ આપતી મજબૂત ટીમ રહી છે. 

રિપોર્ટ્સ મુજબ, આ સોદો આશરે 1.63 બિલિયન ડોલર એટલે કે ₹15,300 કરોડમાં થયો છે, જે IPL ઇતિહાસની કોઈ પણ ફ્રેન્ચાઇઝી માટેની અત્યાર સુધીની સૌથી મોંઘી ડીલ છે.

કોણ છે નવા માલિક?

અમેરિકાના એરિઝોના સ્થિત સ્કોટ્સડેલના સફળ બિઝનેસમેન કાલ સોમાનીએ એક મોટા ઇન્વેસ્ટર ગ્રુપ (કન્સોર્ટિયમ) સાથે મળીને આ ખરીદી કરી છે. આ ગ્રુપને વિશ્વની પ્રતિષ્ઠિત 'વોલમાર્ટ ફેમિલી' અને 'હેમ્પ ફેમિલી'નો પણ ટેકો છે.

કાલ સોમાની ટેકનોલોજી, AI અને સ્પોર્ટ્સ ટેક સેક્ટરમાં 15 વર્ષથી વધુનો અનુભવ ધરાવે છે. તેઓ 2021થી રાજસ્થાન રોયલ્સ સાથે જોડાયેલા હતા અને હવે તેમણે ટીમની સંપૂર્ણ કમાન સંભાળી લીધી છે.

આ અગાઉ ટોરેન્ટ ગ્રુપે ગુજરાત ટાઇટન્સમાં 67% હિસ્સેદારી ₹5,025 કરોડમાં ખરીદી હતી, જેની કુલ વેલ્યુ આશરે ₹7,500 કરોડ આંકવામાં આવી હતી. રાજસ્થાન રોયલ્સની આ ડીલ તેના કરતા બમણી રકમમાં થઈ છે, જે દર્શાવે છે કે IPLની બ્રાન્ડ વેલ્યુ સતત આસમાને પહોંચી રહી છે.

હાલમાં રાજસ્થાન રોયલ્સની કમાન બ્રિટિશ-ઇન્ડિયન બિઝનેસમેન મનોજ બદાલે પાસે છે. ટીમની કેપ્ટનશીપ રિયાન પરાગના હાથમાં છે અને કુમાર સંગાકારા કોચિંગની જવાબદારી સંભાળી રહ્યા છે. આ વર્ષે ભારતના મશહૂર ક્રિકેટર એવા રવીન્દ્ર જાડેજા પણ રોયલ્સની ટીમમાં જોડાયા છે. જાણવા મળ્યું છે કે આ નવી ડીલ IPL 2026 સીઝન બાદ સંપૂર્ણપણે અમલી બનશે.

આ ડીલ બાદ હવે જોવાનું એ રહેશે કે નવા માલિકી હક સાથે રાજસ્થાન રોયલ્સના મેનેજમેન્ટ અને ટીમ કોમ્બિનેશનમાં કેવા ફેરફારો જોવા મળે છે.