ન્યુઝીલેન્ડના કેપ્ટને ભારતીય ફેન્સને આપી ચેતવણી

આઈસીસી મેન્સ T20 વર્લ્ડ કપ 2026 હવે તેના અંતિમ પડાવ પર પહોંચી ગયો છે. 8 માર્ચના રોજ અમદાવાદના વિશ્વ પ્રસિદ્ધ નરેન્દ્ર મોદી સ્ટેડિયમમાં ભારત અને ન્યૂઝીલેન્ડ વચ્ચે ટાઈટલ જીતવા માટે કાંટાની ટક્કર થશે. આ હાઈ-વોલ્ટેજ મેચ પહેલા ન્યૂઝીલેન્ડના કેપ્ટન મિચેલ સેન્ટનરે એક એવું નિવેદન આપ્યું છે જેનાથી ક્રિકેટ જગતમાં ગરમાવો આવી ગયો છે.

પેટ કમિન્સ જેવો અંદાજ: ફેન્સને શાંત રાખવાનો પ્લાન

ન્યૂઝીલેન્ડના કેપ્ટન મિચેલ સેન્ટનરનું તાજેતરનું નિવેદન વર્ષ 2023ના વનડે વર્લ્ડ કપની યાદ અપાવે છે. તે સમયે ઓસ્ટ્રેલિયાના કેપ્ટન પેટ કમિન્સે ભારતીય ભીડને શાંત રાખવાની વાત કરી હતી અને અંતે ટ્રોફી જીતી હતી. હવે સેન્ટનરે પણ એ જ રાગ આલાપ્યો છે. તેમણે સ્પષ્ટ કર્યું છે કે જો વિશ્વ વિજેતા બનવા માટે તેમણે લાખો ભારતીય પ્રશંસકોની આશાઓ પર પાણી ફેરવવું પડે તો પણ તેમની ટીમ ખચકાશે નહીં.

દબાણ ભારત પર, આત્મવિશ્વાસ ન્યૂઝીલેન્ડનો : 

કિવી કેપ્ટનનું માનવું છે કે ફાઈનલ જેવી મોટી મેચમાં ભારત પર વધુ માનસિક દબાણ રહેશે. હોમ ગ્રાઉન્ડ અને ઘરઆંગણે ટ્રોફી જીતવાની અપેક્ષાઓ ભારતીય ટીમ માટે પડકારરૂપ બની શકે છે. ન્યૂઝીલેન્ડની ટીમ સેમીફાઈનલમાં દક્ષિણ આફ્રિકા જેવી મજબૂત ટીમને હરાવીને ફાઈનલમાં આવી છે, તેથી તેમનું મનોબળ ખૂબ જ ઊંચું છે. સેન્ટનરે ભારતીય બોલિંગની નબળાઈઓ તરફ ઈશારો કરતા જણાવ્યું કે ગત મેચમાં ભારતીય બોલરોએ રન બચાવવા માટે ઘણો સંઘર્ષ કરવો પડ્યો હતો, જેનો ફાયદો ન્યૂઝીલેન્ડ ઉઠાવી શકે છે.

અમદાવાદમાં ઈતિહાસ રચાશે : 

નરેન્દ્ર મોદી સ્ટેડિયમની પીચ અને અહીંનો માહોલ હંમેશા રોમાંચક રહ્યો છે. સૂર્યકુમાર યાદવની આગેવાની હેઠળની ભારતીય ટીમમાં જસપ્રીત બુમરાહ, હાર્દિક પંડ્યા અને કુલદીપ યાદવ જેવા દિગ્ગજો છે, જે કોઈપણ સમયે મેચ પલટી શકે છે. બીજી તરફ, મિચેલ સેન્ટનરની સેના રચિન રવીન્દ્ર અને ડેવોન કોન્વે જેવા ખેલાડીઓના જોરે ભારતને માત આપવા તૈયાર છે.

હવે જોવાનું એ રહેશે કે શું ભારત 2023ના પરાજયનો બદલો લેશે કે પછી ન્યૂઝીલેન્ડ ફરી એકવાર ભારતીય ફેન્સના દિલ તોડીને ટ્રોફી પોતાની સાથે લઈ જશે