મોહમ્મદ શમીની ટેસ્ટ નિવૃત્તિ પર હસીન જહાંનો કટાક્ષ! ઉંમર અંગે કર્યા એવા દાવા કે ફરી ચર્ચામાં આવ્યો જૂનો વિવાદ

Hasin Jahan Slams Mohammad Shami Over Test Retirement: ભારતીય ક્રિકેટ ટીમના અનુભવી ફાસ્ટ બોલર મોહમ્મદ શમીએ ટેસ્ટ ક્રિકેટમાંથી નિવૃત્તિ જાહેર કર્યા બાદ ક્રિકેટ જગતમાં ચર્ચા શરૂ થઈ છે. જોકે, શમીના આ નિર્ણય કરતાં વધુ ચર્ચા તેની પત્ની હસીન જહાંની તીખી પ્રતિક્રિયાને લઈને થઈ રહી છે. હસીન જહાંએ શમી પર કટાક્ષ કરતાં કહ્યું કે તેણે ટેસ્ટ ક્રિકેટ છોડ્યું નથી, પરંતુ જાણે ભગવાને તેના પર કહેર વરસાવ્યો છે. આ સાથે તેણે શમીની ઉંમર, ક્રિકેટ કારકિર્દી અને પરિવારને લઈને પણ અનેક સવાલો ઉઠાવ્યા છે.

'શમી પોતાને ભગવાન સમજવા લાગ્યો હતો': હસીન જહાં
સમાચાર એજન્સી સાથેની ફોન પરની વાતચીતમાં હસીન જહાંએ શમીના ટેસ્ટ ક્રિકેટમાંથી નિવૃત્તિના નિર્ણય પર પ્રતિક્રિયા આપતાં કહ્યું કે સારા પ્રદર્શન અને ચાહકોની તાળીઓ મળ્યા બાદ શમી પોતાને ભગવાન માનવા લાગ્યો હતો. તેણે કટાક્ષ કરતાં કહ્યું કે વ્યક્તિની સાચી ઓળખ તેની માનવતા અને વર્તનથી થાય છે, માત્ર ખ્યાતિ કે ક્રિકેટના પ્રદર્શનથી નહીં. 

શમીની ઉંમર અંગે પણ સવાલો ઉઠાવ્યા
હસીન જહાંએ શમીની ઉંમર અંગે પણ સવાલો ઉઠાવ્યા હતા. તેણે દાવો કર્યો કે શમીના શૈક્ષણિક પ્રમાણપત્રોમાં જન્મવર્ષ અંગે કથિત વિસંગતતા છે. તેના જણાવ્યા અનુસાર, શમીનું વાસ્તવિક જન્મવર્ષ 1982 છે, જ્યારે શૈક્ષણિક પ્રમાણપત્રોમાં 1990 દર્શાવવામાં આવ્યું છે. તેણે એવો પણ સવાલ કર્યો કે જો શમીની ઉંમર ઓછી હતી તો તેણે અંડર-19 ક્રિકેટ કેમ ન રમ્યું અને 22 વર્ષની ઉંમર પછી જ ક્રિકેટ કારકિર્દી કેમ શરૂ કરી? હસીન જહાંએ શમીને મળેલી તકો અને BCCIની ભૂમિકા અંગે પણ સવાલો ઉઠાવ્યા હતા.

પરિવાર સામે ચૂંટણી લડવાનો પડકાર
હસીન જહાંએ શમીના પરિવારને લઈને પણ આક્રમક નિવેદન આપ્યું છે. તેણે કહ્યું કે જો શમી, તેના ભાઈ, ભાભી અથવા પરિવારનો કોઈ અન્ય સભ્ય ચૂંટણી મેદાનમાં ઉતરશે તો તે પણ તેની સામે ચૂંટણી લડવા તૈયાર છે. આ નિવેદનથી શમી અને હસીન જહાં વચ્ચેનો જૂનો વિવાદ ફરી ચર્ચામાં આવ્યો છે.

64 ટેસ્ટ, 229 વિકેટઃ શમીની શાનદાર ટેસ્ટ કારકિર્દી
મોહમ્મદ શમીએ 6 નવેમ્બરે સોશિયલ મીડિયા પર ભાવુક વીડિયો શેર કરીને ટેસ્ટ ક્રિકેટમાંથી નિવૃત્તિની જાહેરાત કરી હતી. ફાર્મહાઉસના મેદાનમાં રેકોર્ડ કરાયેલા આશરે 2 મિનિટ 48 સેકન્ડના વીડિયોમાં તેણે સફેદ જર્સી સાથે જોડાયેલી યાદોને જીવનનો ખાસ હિસ્સો ગણાવ્યો હતો. શમીએ ભારત માટે 64 ટેસ્ટ મેચ રમીને 229 વિકેટ ઝડપી હતી. આ દરમિયાન તેણે છ વખત એક ઇનિંગમાં પાંચ કે તેથી વધુ વિકેટ લેવાની સિદ્ધિ મેળવી હતી. વર્ષ 2013માં વેસ્ટ ઇન્ડીઝ સામે ટેસ્ટ ડેબ્યૂ કરનાર શમી પોતાની શાનદાર સ્વિંગ અને સીમ બોલિંગ માટે જાણીતો રહ્યો છે.

નિવૃત્તિ સંદેશમાં તેણે સાથી ખેલાડીઓ, કોચ, પરિવાર, ચાહકો, ભારતીય ક્રિકેટ કંટ્રોલ બોર્ડ (BCCI) અને બંગાળ ક્રિકેટ એસોસિએશનનો આભાર માન્યો હતો. શમીએ સ્પષ્ટ કર્યું છે કે તે ટેસ્ટ ક્રિકેટમાંથી નિવૃત્ત થયો છે, પરંતુ વનડે અને T20 ક્રિકેટ રમવાનું ચાલુ રાખશે. હવે શમીની નિવૃત્તિ બાદ હસીન જહાંની પ્રતિક્રિયાએ આ મામલાને નવો વળાંક આપ્યો છે. એક તરફ ચાહકો શમીની શાનદાર ટેસ્ટ કારકિર્દીને યાદ કરી રહ્યા છે, તો બીજી તરફ તેના અંગત જીવન સાથે જોડાયેલા નિવેદનો પણ ચર્ચાનું કેન્દ્ર બન્યાં છે.