ઈન્ડિયન પ્રીમિયર લીગ 2026ની શરૂઆત પહેલા જ રાજસ્થાન રોયલ્સ (RR) ની મુશ્કેલીઓ વધી ગઈ છે. તાજેતરના અહેવાલો મુજબ, ઈંગ્લેન્ડનો ઘાતક ઓલરાઉન્ડર સૈમ કરન ગંભીર ઈજાને કારણે આ વર્ષે આઈપીએલમાં રમી શકશે નહીં. 27 વર્ષીય આ ખેલાડી છેલ્લે 5 માર્ચના રોજ ભારત સામે રમાયેલી T20 વર્લ્ડ કપ 2026ની સેમિફાઈનલમાં જોવા મળ્યો હતો, જ્યાં ઈંગ્લેન્ડનો પરાજય થયો હતો. ત્યારથી તે મેદાનની બહાર છે અને હવે તે પૂરી સીઝન ગુમાવે તેવી પ્રબળ શક્યતા છે.
ઐતિહાસિક ટ્રેડ દ્વારા ટીમમાં આવ્યો હતો :&nbsp;
સૈમ કરન આ સિઝનમાં પહેલીવાર રાજસ્થાન રોયલ્સ તરફથી રમવાનો હતો. ગયા નવેમ્બરમાં એક મોટા ટ્રેડ અંતર્ગત રાજસ્થાને રવિન્દ્ર જાડેજા અને સૈમ કરનને ચેન્નાઈ સુપર કિંગ્સ (CSK) પાસેથી મેળવ્યા હતા, જ્યારે ટીમના પૂર્વ કેપ્ટન સંજુ સેમસન ચેન્નાઈની ટીમમાં જોડાયા હતા. જોકે, ડેબ્યૂ મેચ પહેલા જ કરનની ઈજાએ ટીમનું ગણિત બગાડી નાખ્યું છે.
કરનનું IPL પ્રદર્શન અને ઈતિહાસ :&nbsp;
સૈમ કરને 2019માં પંજાબ કિંગ્સ સાથે પોતાની સફર શરૂ કરી હતી. 2023માં પંજાબે તેને ₹18.5 કરોડની રેકોર્ડ કિંમતે ખરીદ્યો હતો. જોકે, છેલ્લી સીઝન (2025) તેના માટે નિરાશાજનક રહી હતી, જેમાં તેણે પાંચ મેચમાં માત્ર 114 રન બનાવ્યા હતા અને માત્ર એક જ વિકેટ ઝડપી હતી. તેમ છતાં, તેની ઓલરાઉન્ડ ક્ષમતા રાજસ્થાન માટે મહત્વની સાબિત થઈ શકી હોત.
રાજસ્થાન પાસે શું છે વિકલ્પો ?
ટીમ મેનેજમેન્ટ હાલમાં કરનના રિપ્લેસમેન્ટ તરીકે નવા ખેલાડીની શોધમાં છે. જોકે સત્તાવાર જાહેરાત બાકી છે, પરંતુ રાજસ્થાન પાસે રવિન્દ્ર જાડેજા જેવા દિગ્ગજ ઓલરાઉન્ડર અને ડોનોવન ફેરેરા જેવા આક્રમક બેટ્સમેન છે, જે સ્પિન બોલિંગ પણ કરી શકે છે. ટીમના નવા કેપ્ટન રિયાન પરાગ માટે સીઝનની શરૂઆત પડકારજનક રહેશે.
IPL 2026 ની પહેલી મેચ: 28 માર્ચના રોજ બેંગલુરુના એમ. ચિન્નાસ્વામી સ્ટેડિયમમાં ડિફેન્ડિંગ ચેમ્પિયન રોયલ ચેલેન્જર્સ બેંગ્લોર અને સનરાઇઝર્સ હૈદરાબાદ વચ્ચે મુકાબલો થશે.

ગ્રોઈન ઈજાને કારણે સૈમ કરન આખી સીઝન ગુમાવશે, સેમસનના બદલામાં રોયલ્સમાં થયો હતો ટ્રેડ

March 20, 2026 | 13:20 IST