ભારતે 135 રને હરાવી શ્રેણી 3-1થી જીતી શ્રેણી

સેમસન અને તિલક વર્માએ સતત બે સદી ફટકારીને રેકોર્ડ બુકમાં જગ્યા બનાવી છે. સેમસન T20માં ત્રણ સદી ફટકારનાર પ્રથમ ભારતીય બેટ્સમેન બન્યો છે.

સંજુ સેમસન અને તિલક વર્માની અણનમ સદીઓ બાદ, ડાબોડી ફાસ્ટ બોલર અર્શદીપ સિંહની શાનદાર ત્રણ વિકેટની મદદથી ભારતે શુક્રવારે અહીંના ધ વેન્ડરર્સ સ્ટેડિયમમાં રેકોર્ડબ્રેક પ્રદર્શનમાં યજમાન દક્ષિણ આફ્રિકાને 135 રનથી હરાવ્યું હતું. આ સાથે જ ભારતે ચાર મેચોની શ્રેણી પણ 3-1થી જીતી લીધી છે. આ વર્ષે રમાયેલી 26 T20 મેચોમાંથી ભારતે 24માં જીત મેળવી છે. અર્શદીપ સિંહે 20 રનમાં ત્રણ વિકેટ લઈને દક્ષિણ આફ્રિકાના ટોપ ઓર્ડરને તબાહ કરી નાખ્યું હતું.

ગઈ કાલની મેચમાં સેમસનના 56 બોલમાં અણનમ 109 રન અને તિલક વર્માના માત્ર 47 બોલમાં અણનમ 120 રનના આધારે ભારતે 20 ઓવરમાં 283/1 રનનો વિશાળ સ્કોર બનાવ્યો હતો. તિલક વર્મા સતત બે T20 ઈન્ટરનેશનલમાં સદી ફટકારનાર બીજા ભારતીય બન્યા. 

લક્ષ્યનો પીછો કરતી વખતે દક્ષિણ આફ્રિકાની શરૂઆત ખરાબ રહી હતી. પ્રથમ ત્રણ ઓવરમાં 10 રનમાં ચાર વિકેટ પડી ગઈ હતી. અર્શદીપે તેની પ્રથમ બે ઓવરમાં ત્રણ વિકેટ ઝડપી હતી. તેણે ત્રીજી ઓવરમાં સતત બોલ પર બે વિકેટ ઝડપી હતી પરંતુ અર્સદિપ હેટ્રીકથી ચુકી ગયો હચો. તેણે તેની પ્રથમ ઓવરના ત્રીજા બોલ પર રેઝા હેન્ડ્રિક્સ (0)ને ક્લીન બોલ્ડ કર્યો અને પછી તેની બીજી ઓવરમાં એડન માર્કરામ (8) અને હેનરિક ક્લાસેન (0)ને પાછા મોકલ્યા. જોકે, ડેવિડ મિલરે તેને હેટ્રિક મેળવતા બચાવ્યો હતો. હાર્દિક પંડ્યાએ રેયાન રિકલ્ટન (1)ને આઉટ કરીને ભારતને ચોથી સફળતા અપાવી.

દક્ષિણ આફ્રિકા તરફથી પાંચમી વિકેટ માટે 86 રનની મજબૂત ભાગીદારી થઈ હતી. ટ્રિસ્ટિયન સ્ટબ્સે 29 બોલમાં ત્રણ ચોગ્ગા અને બે છગ્ગાની મદદથી 43 રન બનાવ્યા હતા જ્યારે મિલરે 27 બોલમાં 36 રન બનાવીને યજમાનોને થોડી આશા જગાવી હતી. ત્યાર બાદ શ્રેણીમાં શાનદાર પ્રદર્શન કરનાર વરુણ ચક્રવર્તીએ મિલરને આઉટ કરીને ભાગીદારી તોડી હતી. ચક્રવર્તીએ 42 રનમાં બે અને અક્ષર પટેલે છ રનમાં બે વિકેટ ઝડપી હતી. દક્ષિણ આફ્રિકાની આખી ટીમ 18.2 ઓવરમાં 148 રનમાં આઉટ થઈ ગઈ હતી.

સેમસન અને તિલક વર્માએ સતત બે સદી ફટકારીને રેકોર્ડ બુકમાં જગ્યા બનાવી છે. સેમસન T20માં ત્રણ સદી ફટકારનાર પ્રથમ ભારતીય બેટ્સમેન બન્યો છે. આ પહેલા કેપ્ટન સૂર્ય કુમાર યાદવે ટોસ જીતીને પ્રથમ બેટિંગ કરવાનો નિર્ણય કર્યો હતો. ઓપનર સંજુ સેમસન અને તિલક વર્માની 210 રનની અણનમ ભાગીદારીના આધારે, ભારતે 283/1નો જંગી સ્કોર બનાવ્યો, જે વાન્ડરર્સ સ્ટેડિયમમાં અત્યાર સુધીનો સૌથી મોટો સ્કોર છે. કોઈપણ ટીમ સામે ટી20માં ભારતનો આ બીજો સૌથી મોટો સ્કોર છે. તે જ સમયે, ટી-20 આંતરરાષ્ટ્રીયમાં ભારત તરફથી આ સૌથી મોટી ભાગીદારી પણ છે.

શ્રેણીમાં પ્રથમ વખત ટોસ જીત્યા બાદ ભારતીય કેપ્ટન સૂર્યકુમાર યાદવે બેટિંગ કરવાનું પસંદ કર્યું હતું. સંજુ સેમસને (અણનમ 109) અભિષેક શર્મા (36) સાથે મળીને પ્રથમ વિકેટ માટે 5.5 ઓવરમાં 73 રન જોડ્યા હતા. તે લુથો સિપામલાના બોલ પર વિકેટકીપર હેનરિક ક્લાસેનના હાથે કેચ આઉટ થયો હતો. આ પછી દક્ષિણ આફ્રિકાના બોલરોને કોઈ સફળતા મળી ન હતી. શર્માએ 18 બોલની ઈનિંગમાં ચાર છગ્ગા અને બે ચોગ્ગા ફટકાર્યા હતા. આ પછી સેમસને તિલક વર્મા (અણનમ 120) સાથે મળીને સાઉથ આફ્રિકાના તમામ બોલરોને પછાડી દીધા હતા. સેમસને 56 બોલમાં પોતાના 109 અણનમ રનમાં નવ છગ્ગા અને છ ચોગ્ગા ફટકાર્યા હતા. વર્માએ 47 બોલમાંથી 10 હવામાં અને નવ બાઉન્ડ્રીની બહાર જમીન પર મોકલ્યા.

ભારત તરફથી કુલ 23 છગ્ગા અને 17 ચોગ્ગા ફટકારવામાં આવ્યા હતા. આમ, 206 રન માત્ર બાઉન્ડ્રી દ્વારા જ બન્યા હતા. ભારત દ્વારા કોઈપણ ટી-20 મેચમાં સિક્સ ફટકારવાનો આ રેકોર્ડ છે. આ વર્ષની શરૂઆતમાં 12 ઓક્ટોબરે હૈદરાબાદમાં ભારતે 297 રન બનાવ્યા હતા, જેમાં 22 સિક્સ અને 25 ફોર ફટકારી હતી. દક્ષિણ આફ્રિકા સામેનો 283નો સ્કોર ભારતનો સર્વોચ્ચ સ્કોર છે અને કોઈપણ ટીમ સામેનો બીજો સૌથી મોટો સ્કોર છે. સાઉથ આફ્રિકાએ સેમસન-વર્માની જોડીને તોડવા માટે સાત બોલરોનો ઉપયોગ કર્યો હતો, પરંતુ તે નિષ્ફળ રહી હતી. પાવરપ્લેની છ ઓવરમાં ભારતનો સ્કોર 73/1 હતો. ભારતના 100 રન 8.3 ઓવરમાં અને 14.1 ઓવરમાં 200 રન થયા હતા.

--IANS