ભારત ચોથીવાર T20 વર્લ્ડ કપની ફાઈનલમાં

મુંબઈનું વાનખેડે સ્ટેડિયમ ફરી એકવાર ભારતીય ક્રિકેટના સુવર્ણ ઇતિહાસનું સાક્ષી બન્યું છે. ટી-20 વર્લ્ડ કપ 2026ની બીજી સેમિફાઈનલમાં ભારતે ઇંગ્લેન્ડને એક રોમાંચક જંગમાં 7 રનથી હરાવીને ફાઈનલમાં પ્રવેશ કરી લીધો છે. આ જીત સાથે જ ભારતે ક્રિકેટ જગતમાં અનેક નવા કીર્તિમાન સ્થાપિત કર્યા છે અને સાબિત કરી દીધું છે કે શા માટે આ ટીમ અત્યારે વિશ્વની સૌથી ખતરનાક ટીમ ગણાય છે.

મુંબઈની પિચ બેટ્સમેનો માટે સ્વર્ગ સાબિત થઈ હતી. ભારત અને ઇંગ્લેન્ડ બંને ટીમોએ મળીને કુલ 499 રન બનાવ્યા, જે ટી-20 ઇન્ટરનેશનલ ઇતિહાસનો બીજો સૌથી મોટો મેચ ટોટલ છે. આ પહેલા 2023માં દક્ષિણ આફ્રિકા અને વેસ્ટ ઇન્ડીઝ વચ્ચે 517 રન બન્યા હતા. આ મેચમાં ચોગ્ગા અને છગ્ગાનો એવો વરસાદ થયો કે સ્ટેડિયમમાં બેઠેલા પ્રેક્ષકોની ડોક પણ થાકી ગઈ હતી. મેચમાં કુલ 73 બાઉન્ડરી (39 ચોગ્ગા અને 34 છગ્ગા) લાગી, જે ટી-20 વર્લ્ડ કપના ઇતિહાસમાં એક નવો વર્લ્ડ રેકોર્ડ છે.

ટીમ ઈન્ડિયા: ફાઈનલની 'ફોર્થ' એન્ટ્રી

ભારત હવે ટી-20 વર્લ્ડ કપની ફાઈનલમાં 4 વખત પહોંચનારી વિશ્વની પ્રથમ ટીમ બની ગઈ છે. અગાઉ ભારત 2007, 2014 અને 2024માં ફાઈનલ રમી ચૂક્યું છે. આ સિવાય ભારત આઈસીસી વ્હાઇટ બોલ ટુર્નામેન્ટમાં (2023 વન-ડે વર્લ્ડ કપ, 2024 ટી-20 વર્લ્ડ કપ, 2025 ચેમ્પિયન્સ ટ્રોફી અને હવે 2026 ટી-20 વર્લ્ડ કપ) સતત ચોથી ફાઈનલ રમશે, જે ટીમની સાતત્યપૂર્ણ શ્રેષ્ઠતા દર્શાવે છે.

સંજુ સેમસનનો સપાટો: કોહલીના રેકોર્ડની બરાબરી

આ મેચના અસલી હીરો સંજુ સેમસન રહ્યા હતા. તેમણે ઇંગ્લેન્ડના બોલરોની બરાબરની ધોલાઈ કરતા 89 રનની વિસ્ફોટક ઇનિંગ રમી હતી. આ ઇનિંગ સાથે તેમણે ટી-20 વર્લ્ડ કપના નૉકઆઉટ મુકાબલામાં ભારત તરફથી સૌથી મોટી ઇનિંગ રમવાના મામલે વિરાટ કોહલીની બરાબરી કરી લીધી છે. વિરાટે 2016ની સેમિફાઈનલમાં વેસ્ટ ઇન્ડીઝ સામે 89 રન બનાવ્યા હતા. આ સાથે જ સંજુએ આ એક જ ટુર્નામેન્ટમાં 16 છગ્ગા ફટકારીને રોહિત શર્માના 15 છગ્ગાના રેકોર્ડને તોડી નાખ્યો છે.

સિક્સર કિંગ બની ટીમ ઈન્ડિયા

ભારતે આખી ટુર્નામેન્ટમાં કુલ 88 છગ્ગા ફટકારીને એક એડિશનમાં સૌથી વધુ સિક્સર મારવાનો નવો કીર્તિમાન સ્થાપિત કર્યો છે. ઇંગ્લેન્ડ સામેની ઇનિંગમાં જ ભારતે 19 છગ્ગા ફટકાર્યા હતા. આ સાથે ભારત ટી-20 ક્રિકેટમાં સૌથી વધુ (6 વખત) 250 કે તેથી વધુ રન બનાવનારી વિશ્વની નંબર-1 ટીમ બની ગઈ છે. આ મામલે ભારતે આઈપીએલની દિગ્ગજ ટીમ સનરાઇઝર્સ હૈદરાબાદને પણ પાછળ છોડી દીધી છે.

મેચનો ટર્નિંગ પોઈન્ટ

ઇંગ્લેન્ડની ટીમ એક સમયે લક્ષ્યની નજીક જણાતી હતી, પરંતુ ભારતીય બોલરોએ દબાણ જાળવી રાખ્યું હતું. અંતિમ ઓવરોમાં ભારતે શિસ્તબદ્ધ બોલિંગ અને ચુસ્ત ફિલ્ડિંગના જોરે ઇંગ્લેન્ડને રોકી રાખ્યું અને માત્ર 7 રનથી વિજય મેળવી ફાઈનલની ટિકિટ કન્ફર્મ કરી લીધી.

ભારતીય ટીમ અત્યારે જે ફોર્મમાં છે તેને જોતા એમ લાગે છે કે ફાઈનલમાં કોઈ પણ ટીમ સામે હોય, ભારતનો પક્ષ ભારે રહેશે. બેટ્સમેનોની ફોર્મ અને બોલરોનો આત્મવિશ્વાસ ભારતને ફરી એકવાર વિશ્વ વિજેતા બનાવવા માટે પૂરતો છે. હવે સમગ્ર ભારતની નજર ફાઈનલ મેચ પર છે, જ્યાં ટીમ ઈન્ડિયા વધુ એકવાર ટ્રોફી જીતીને કરોડો ચાહકોને હોળીની મોટી ભેટ આપવા માંગશે.