ટીમ ઈન્ડિયાએ T20 વર્લ્ડ કપ 2026માં મેળવેલી ઐતિહાસિક જીત બાદ આખું ભારત જશ્નમાં ડૂબ્યું હતું, પરંતુ આ ઉજવણી હાર્દિક પંડ્યા માટે મુશ્કેલીનું કારણ બની ગઈ છે. સોશિયલ મીડિયા પર વાયરલ થયેલા એક વીડિયોને પગલે પંડ્યા પર રાષ્ટ્રીય ગૌરવને ઠેસ પહોંચાડવાનો ગંભીર આરોપ લગાવવામાં આવ્યો છે.
શું છે વિવાદનું મુખ્ય કારણ ?
જીતની ઉજવણી દરમિયાન હાર્દિક પંડ્યાએ પોતાના ખભા પર રાષ્ટ્રધ્વજ તિરંગો લપેટેલો હતો. વાયરલ વીડિયો અને ફરિયાદો મુજબ, પંડ્યા આ સ્થિતિમાં પોતાની ગર્લફ્રેન્ડ સાથે સ્ટેજ પર એવી અવસ્થામાં જોવા મળ્યા હતા જેને કાયદાકીય દૃષ્ટિએ વાંધાજનક ગણવામાં આવી છે. પુણેના વકીલોના મતે, જ્યારે રાષ્ટ્રધ્વજ શરીર પર હોય ત્યારે તેની પવિત્રતા અને ગરિમા જાળવવી અનિવાર્ય છે, પરંતુ વીડિયોમાં દેખાતી સ્થિતિ ધ્વજની ગરિમાના પ્રતિકૂળ હોવાનો દાવો કરવામાં આવ્યો છે.
પુણે અને હાથરસમાં કાયદાકીય મોરચો :&nbsp;
મહારાષ્ટ્રના પુણેમાં એડવોકેટ વાજિદ ખાન બિડકરે શિવાજી નગર પોલીસ સ્ટેશનમાં લેખિત ફરિયાદ દાખલ કરી છે. તેમણે 'રાષ્ટ્રીય સન્માનના અપમાન નિવારણ અધિનિયમ, 1971' ની કલમ 2 નો હવાલો આપીને જણાવ્યું છે કે, રાષ્ટ્રધ્વજને વસ્ત્ર કે ચાદરની જેમ વાપરીને અશોભનીય વર્તન કરવું એ સજાપાત્ર ગુનો છે.
બીજી તરફ, ઉત્તર પ્રદેશના હાથરસમાં પણ એડવોકેટ વિશ્વપ્રતાપ સિંહ રાણાએ જિલ્લા પોલીસ વડા અને કેન્દ્રીય ગૃહ મંત્રાલયને પત્ર લખીને હાર્દિક પંડ્યા સામે કડક એક્શન લેવાની માંગ કરી છે. ફરિયાદીઓનું કહેવું છે કે આ પ્રકારના કૃત્યથી દેશના લાખો નાગરિકોની દેશભક્તિની લાગણીઓને ઠેસ પહોંચી છે.
તપાસ અને સંભવિત કાયદાકીય મુશ્કેલીઓ :&nbsp;
હાથરસ પોલીસના ઉચ્ચ અધિકારીઓએ આ મામલે સ્પષ્ટતા કરી છે કે ફરિયાદ પ્રાપ્ત થઈ છે અને વાયરલ વીડિયોની ગંભીરતાથી તપાસ કરવામાં આવશે. જો તપાસમાં તથ્યો સાચા જણાશે તો નિયમાનુસાર આગળની કાર્યવાહી કરવામાં આવશે. બેંગ્લુરુમાં પણ આ મામલે રજૂઆતો થઈ હોવાના અહેવાલો છે. હાર્દિક પંડ્યા અગાઉ પણ પોતાની અંગત જિંદગીને લઈને ચર્ચામાં રહ્યા છે, પરંતુ આ વખતે રાષ્ટ્રધ્વજ સાથે જોડાયેલો આ ગંભીર મુદ્દો તેમને કોર્ટના કઠેડામાં લાવી શકે છે.

T20 જીત બાદ વાયરલ વીડિયોથી હાર્દિક પંડ્યા વિવાદમાં, હાથરસ અને પુણેમાં ફરિયાદ

March 13, 2026 | 15:13 IST