ગુવાહાટીની પિચ સારી, ભારતીય બેટ્સમેનના ખરાબ શોટ

દક્ષિણ આફ્રિકા સામે ગુવાહાટી ખાતે રમાઈ રહેલી બીજી ટેસ્ટ મેચમાં ભારતીય ટીમ અત્યંત ખરાબ પરિસ્થિતિમાં મુકાઈ ગઈ છે. દક્ષિણ આફ્રિકાએ રમતના ત્રીજા દિવસે ૩૧૪ રનની મસમોટી લીડ મેળવતા ભારત પર મેચ અને શ્રેણી બંને ગુમાવવાનો ખતરો તોળાઈ રહ્યો છે. આ કંગાળ પ્રદર્શન માટે કોણ જવાબદાર છે, તે સવાલનો સ્પષ્ટ જવાબ ભારતીય ઓલરાઉન્ડર વોશિંગ્ટન સુંદરે આપ્યો છે.

સુંદરે સ્પષ્ટ સ્વીકાર્યું છે કે ગુવાહાટીની પિચ પર ટીમ ઇન્ડિયાના બેટ્સમેન નિષ્ફળ રહ્યા છે. ત્રીજા દિવસે ભારતીય ટીમે માત્ર ૨૦૧ રન બનાવ્યા હતા અને બેટ્સમેનોએ પોતાની વિકેટો ગુમાવી હતી.

વિકેટ વાસ્તવિક હતી, શોટની પસંદગી ખરાબ

જ્યારે સુંદરને પિચમાં કોઈ મુશ્કેલી હતી કે કેમ તેવો સવાલ પૂછવામાં આવ્યો, ત્યારે તેમણે અત્યંત પ્રામાણિકતાથી પિચનો બચાવ કર્યો. તેમણે કહ્યું,

"તે ખૂબ જ સારી વિકેટ હતી. તે એક વાસ્તવિક વિકેટ હતી. તમને ભાગ્યે જ આવા ટ્રેક પર બેટિંગ કરવાની તક મળે છે, ખાસ કરીને ભારતમાં. પ્રામાણિકપણે, તે એક વાસ્તવિક વિકેટ હતી. જો તમે ત્યાં સમય વિતાવશો, તો તમે રન બનાવશો."

વોશિંગ્ટન સુંદરના આ નિવેદનથી સ્પષ્ટ થાય છે કે ભારતીય ખેલાડીઓએ ખરાબ શોટ રમીને પોતાની વિકેટ ગુમાવી હતી. ખાસ કરીને કેપ્ટન રિષભ પંત અને ધ્રુવ જુરેલ જેવા બેટ્સમેનોએ આક્રમક શોટ રમવાના પ્રયાસમાં દક્ષિણ આફ્રિકાને પોતાની વિકેટો ભેટમાં આપી હતી. સુંદરે વધુમાં ઉમેર્યું કે પિચમાં કોઈ અસમાનતા નહોતી; યાનસન લાંબો બોલર હોવાથી તેનો બોલ ઉછળતો હતો.

રણનીતિ હતી, પણ અમલ નિષ્ફળ

સુંદરે સ્વીકાર્યું કે ટીમ ઇન્ડિયાના કેપ્ટન પંતે સારી રણનીતિ બનાવી હતી, પરંતુ ટીમ તેનો યોગ્ય રીતે અમલ કરવામાં નિષ્ફળ રહી. બીજી તરફ, દક્ષિણ આફ્રિકાના માર્કો યાનસને શાનદાર ઓલરાઉન્ડ પ્રદર્શન કર્યું છે. તેણે પ્રથમ ઇનિંગ્સમાં માત્ર ૪૮ રન આપીને ૬ વિકેટ લીધી, જે ભારતમાં કોઈપણ દક્ષિણ આફ્રિકાના ડાબોડી ઝડપી બોલરનું શ્રેષ્ઠ પ્રદર્શન છે. આ ઉપરાંત, યાનસને બેટિંગમાં પણ ૯૩ રન બનાવીને ટીમને મજબૂત સ્થિતિમાં મૂકી દીધી.

આ મેચમાં ભારતીય બેટ્સમેનોની નિષ્ફળતા અને રણનીતિના અમલમાં ઊણપને કારણે જ ટીમ પર હારનો ખતરો તોળાઈ રહ્યો છે.