ભારત અને ઓસ્ટ્રેલિયા વચ્ચે પર્થમાં રમાયેલી પ્રથમ વનડે મેચમાં ટીમ ઈન્ડિયાને ૭ વિકેટે કારમી હારનો સામનો કરવો પડ્યો છે. આ હાર માત્ર સીરીઝનું પરિણામ જ નહીં, પણ કેપ્ટન શુભમન ગિલ માટે એક અનિચ્છનીય રેકોર્ડ પણ લઈને આવી છે.
કોહલીની ક્લબમાં ગિલ:
આ હાર સાથે શુભમન ગિલ ત્રણેય ફોર્મેટમાં (ટેસ્ટ, વનડે અને T20) કેપ્ટનશિપ કરતી વખતે પોતાની પહેલી મેચ હારનાર બીજો ભારતીય કેપ્ટન બની ગયો છે. આ શરમજનક રેકોર્ડ પહેલાથી જ પૂર્વ કેપ્ટન વિરાટ કોહલીના નામે નોંધાયેલો છે. રસપ્રદ વાત એ છે કે, આ બંને ખેલાડીઓ (ગિલ અને કોહલી) કેપ્ટન તરીકે પોતાની પહેલી IPL મેચ પણ હારી ચૂક્યા છે.
વિરાટ કોહલી આંતરરાષ્ટ્રીય ક્રિકેટ અને IPLમાં આ રેકોર્ડ ધરાવે છે, જ્યારે શુભમન ગિલ એકમાત્ર ભારતીય કેપ્ટન છે જેણે આંતરરાષ્ટ્રીય ક્રિકેટના ત્રણેય ફોર્મેટ, IPL અને પ્રોફેશનલ ડોમેસ્ટિક ક્રિકેટમાં કેપ્ટનશીપની શરૂઆત હાર સાથે કરી છે.
મેચનો ઘટનાક્રમ:
વરસાદથી પ્રભાવિત આ મેચમાં ઓસ્ટ્રેલિયાના કેપ્ટન મિશેલ માર્શે ટોસ જીતીને પ્રથમ બોલિંગ કરવાનો નિર્ણય લીધો હતો. સતત વરસાદને કારણે મેચને ૨૬ ઓવર સુધી ઘટાડવામાં આવી હતી. પ્રથમ બેટિંગ કરવા ઉતરેલી ભારતીય ટીમની શરૂઆત ખરાબ રહી. લાંબા સમય બાદ પરત ફરેલા રોહિત શર્મા અને વિરાટ કોહલી સસ્તામાં આઉટ થઈ ગયા. કેપ્ટન શુભમન ગિલ પોતે પણ માત્ર 10 રન બનાવીને આઉટ થઈ ગયો.
ભારતીય ટીમે ઓસ્ટ્રેલિયા સામે જીતવા માટે ૧૩૧ રનનો લક્ષ્યાંક મૂક્યો હતો. ઓસ્ટ્રેલિયાએ આ લક્ષ્યાંક માત્ર સાત વિકેટ બાકી રાખીને સરળતાથી હાંસલ કરી લીધો. ઓસ્ટ્રેલિયા તરફથી કેપ્ટન મિશેલ માર્શે અણનમ ૪૬ રન બનાવ્યા હતા. આ જીત સાથે ઓસ્ટ્રેલિયા ત્રણ મેચની આ સિરીઝમાં ૧-૦ની સરસાઈ મેળવી લીધી છે.

કેપ્ટન તરીકેની પહેલી મેચમાં જ હાર

ત્રણેય ફોર્મેટની પહેલી મેચ હારનાર બીજો ભારતીય કેપ્ટન, કોહલીની બરાબરી

October 20, 2025 | 13:07 IST