ઈલેક્ટ્રિશિયનથી વર્લ્ડ કપ સુધી: જવાદુલ્લાહની સફર

ICC મેન્સ T20 વર્લ્ડ કપ 2026માં સંયુક્ત આરબ અમીરાત (UAE) ભલે સુપર-8માં પહોંચી શક્યું નથી, પરંતુ ડાબા હાથના ફાસ્ટ બોલર મુહમ્મદ જવાદુલ્લાહના દેખાવે સૌનું ધ્યાન ખેંચ્યું છે. કેનેડા સામેની જીતમાં મહત્વની ભૂમિકા ભજવનાર આ ખેલાડીની સફળતા પાછળ વર્ષોની સખત મહેનત અને ગરીબી સામેની લડાઈ છુપાયેલી છે.

પાકિસ્તાનથી શરૂ થઈ સફર : 

જવાદુલ્લાહનો જન્મ પાકિસ્તાનના ખૈબર પખ્તુનખ્વાના એક નાના ગામમાં થયો હતો. ત્યાં ક્રિકેટ માટે કોઈ સુવિધાઓ કે કોચ નહોતા. માત્ર ટીવી પર સ્ટાર ખેલાડીઓને જોઈને તેણે ક્રિકેટર બનવાનું નક્કી કર્યું હતું. જોકે, આર્થિક પરિસ્થિતિ નબળી હોવાથી તેણે ઈલેક્ટ્રિકલ સ્ટડીઝમાં ડિપ્લોમા કર્યું અને વર્ષ 2020માં નોકરીની શોધમાં UAE સ્થાયી થયો.

નોકરી સાથે ક્રિકેટનો જુસ્સો : 

UAE માં જવાદુલ્લાહ દિવસે ઈલેક્ટ્રિશિયન તરીકે કામ કરતો હતો. આખો દિવસ થાક્યા પછી પણ તે રાત્રે ક્રિકેટની પ્રેક્ટિસ કરવાનું ચૂકતો નહોતો. વર્ષ 2022માં તેની કિસ્મત બદલાઈ જ્યારે અમીરાત ક્રિકેટ બોર્ડના ટ્રાયલ્સમાં તેની પસંદગી થઈ. ત્યારબાદ તેણે ઈન્ટરનેશનલ લીગ T20 માં શારજાહ વોરિયર્સ માટે શાનદાર પ્રદર્શન કરી સૌને પ્રભાવિત કર્યા.

આંતરરાષ્ટ્રીય ક્રિકેટમાં પ્રભાવશાળી દેખાવ : 

ફેબ્રુઆરી 2023માં અફઘાનિસ્તાન સામે ડેબ્યૂ કરનાર જવાદુલ્લાહે અત્યાર સુધી 13 વનડે અને 41 ટી-20 આંતરરાષ્ટ્રીય મેચ રમી છે. ટી-20 માં તેણે 19.93 ની શાનદાર એવરેજથી 60 વિકેટો ઝડપી છે. તેની બોલિંગ એક્શન થોડી અલગ હોવાથી શરીર પર વધુ ભાર આવે છે, જેના કારણે તેને ઈજાઓનો પણ સામનો કરવો પડ્યો છે.

વસીમ અકરમ અને મોહમ્મદ આમિરને પોતાના આદર્શ માનતો આ 26 વર્ષીય બોલર આજે વિશ્વભરના યુવાનો માટે પ્રેરણાનું કેન્દ્ર બન્યો છે.