લગ્નના 2 મહિનામાં જ ચહલે પત્નીને આપ્યો હતો દગો

ભારતીય ક્રિકેટર યુઝવેન્દ્ર ચહલ અને કોરિયોગ્રાફર ધનશ્રી વર્માના છૂટાછેડાને લઈને ચાલી રહેલી ચર્ચા વચ્ચે ધનશ્રી વર્મા એ તેના ભૂતપૂર્વ પતિ પર ગંભીર આરોપો લગાવ્યા છે. હાલમાં જ એક રિયાલિટી શોમાં ધનશ્રી એ દાવો કર્યો હતો કે, લગ્નના માત્ર 2 મહિના બાદ જ તેણે યુઝવેન્દ્ર ચહલને દગા સંબંધિત મામલે રંગે હાથ પકડ્યા હતા.

વીડિયો સોશિયલ મીડિયા પર વાયરલ

ધનશ્રી વર્મા આ દિવસોમાં રિયાલિટી શો 'રાઈઝ એન્ડ ફૉલ'માં જોવા મળી રહી છે. શોના એક સેગમેન્ટમાં, તે અભિનેત્રી કુબ્રા સૈત સાથે પોતાના લગ્નજીવનની નિષ્ફળતા વિશે વાત કરતી જોવા મળી હતી. આ વાતચીતનો એક વીડિયો સોશિયલ મીડિયા પર ઝડપથી વાયરલ થઈ રહ્યો છે. વીડિયોમાં કુબ્રા સૈત એ ધનશ્રીને પૂછ્યું કે, તેમને પહેલીવાર ક્યારે એવો અહેસાસ થયો કે, તેમના લગ્ન યુઝવેન્દ્ર ચહલ સાથે ટકી શકશે નહિ. તેના જવાબમાં ધનશ્રી એ ચોંકાવનારો ખુલાસો કરતા કહ્યું કે, 'લગ્નના બીજા મહિને જ તેને રંગે હાથ પકડ્યો હતો.'

છૂટાછેડાની પ્રક્રિયા ઔપચારિક રીતે પૂર્ણ

ઉલ્લેખનીય છે કે, યુઝવેન્દ્ર ચહલ અને ધનશ્રી વર્માના લગ્ન ડિસેમ્બર 2020માં થયા હતા. જોકે, જૂન 2022માં બન્ને અલગ થઈ ગયા હતા અને માર્ચ 2025માં તેમના છૂટાછેડાની પ્રક્રિયા ઔપચારિક રીતે પૂર્ણ થઈ હતી. છૂટાછેડા બાદ એલિમની (ભરણપોષણ) અંગે પણ ઘણી અફવાઓ*ફેલાઈ હતી.

આ પણ વાચો: ‘ધ ગ્રેટ ઈન્ડિયન કપિલ શો’માં ચહલના રિલેશનશિપનો થયો ખુલાસો

અલગ થયાને એક વર્ષ થઈ ગયું

અગાઉ શોના એક એપિસોડમાં ધનશ્રી એ આ અંગે સ્પષ્ટતા કરી હતી. ગાયક આદિત્ય નારાયણ સાથેની વાતચીતમાં તેમણે કહ્યું હતું કે, "અધિકૃત રીતે અમને અલગ થયાને લગભગ એક વર્ષ થઈ ગયું છે. આ પ્રક્રિયા જલ્દી પૂરી થઈ કારણ કે, તે પરસ્પર સહમતિથી થયું હતું. તેથી જ્યારે લોકો એલિમનીની વાત કરે છે, તો તે ખોટું છે." તેમણે વધુમાં કહ્યું હતું કે, જે લોકો તેમને જાણતા નથી, તેમના માટે સફાઈ આપીને સમય બગાડવો જોઈએ નહિ.

ધનશ્રી એ 60 કરોડની એલિમનીની માંગી

નોંધનીય છે કે, અગાઉ એવા અહેવાલો આવ્યા હતા કે, ધનશ્રી એ 60 કરોડ રૂપિયાની એલિમનીની માંગણી કરી હતી, જેને તેમના પરિવારે એક અધિકારિક નિવેદનમાં સંપૂર્ણપણે ખારીજ કરી દીધો હતો. ધનશ્રી વર્માના આ નવા આરોપો બાદ ફરી એકવાર આ ભૂતપૂર્વ દંપતી ચર્ચાનું કેન્દ્ર બન્યું છે.