ભારત સામેની શરમજનક હાર બાદ પાકિસ્તાની ક્રિકેટમાં ધરતીકંપ જેવી સ્થિતિ સર્જાઈ છે. 2026ના ટી20 વર્લ્ડ કપમાં મળેલી આ કારમી પછડાટ બાદ પૂર્વ દિગ્ગજ ખેલાડી શાહિદ આફ્રિદી લાલઘૂમ થઈ ગયા છે. તેમણે ટીમમાં મોટા ફેરફારો કરવાની હિમાયત કરી છે, જેમાં સીનિયર ખેલાડીઓને પડતા મૂકવાની વાત કહી છે.
સિનિયર ખેલાડીઓ પર ઉતાર્યો ગુસ્સો :&nbsp;
કોલંબોમાં રમાયેલી હાઈ-વોલ્ટેજ મેચમાં ભારત સામે 61 રને પરાજય મળતા પાકિસ્તાની ચાહકો અને પૂર્વ ખેલાડીઓમાં ભારે રોષ છે. આફ્રિદીએ સ્પષ્ટ શબ્દોમાં જણાવ્યું છે કે હવે સમય આવી ગયો છે કે બાબર આઝમ અને શાદાબ ખાન જેવા ખેલાડીઓને ટીમની બહાર કરી દેવા જોઈએ. સતત તકો મળવા છતાં આ ખેલાડીઓ ભારત સામેના દબાણવાળા મુકાબલામાં ફ્લોપ સાબિત થઈ રહ્યા છે.
જમાઈ શાહીન આફ્રિદી સામે પણ કડક વલણ :&nbsp;
આફ્રિદીની ટીકાનો સૌથી આશ્ચર્યજનક હિસ્સો તેમના જમાઈ શાહીન આફ્રિદી અંગેનો હતો. મેચ દરમિયાન શાહીન ખૂબ જ ખર્ચાળ સાબિત થયો હતો, તેણે માત્ર 2 ઓવરમાં 31 રન આપી દીધા હતા. આ નબળા પ્રદર્શનને કારણે સસરા આફ્રિદીએ તેને પણ ટીમમાંથી આરામ આપી બેન્ચ પર બેસાડી દેવાની સલાહ આપી છે.
હારના મુખ્ય પાસાઓ :&nbsp;
નબળી બોલિંગ: શાહીન આફ્રિદીએ અંતિમ ઓવરમાં રન લુટાવતા ભારત મજબૂત સ્કોર બનાવી શક્યું.
નેતૃત્વની નિષ્ફળતા: બાબર આઝમ અને શાદાબ ખાન બેટિંગ કે બોલિંગ બંનેમાં પ્રભાવ પાડવામાં નિષ્ફળ રહ્યા.
ભારતનું વર્ચસ્વ: ઈશાન કિશનની વિસ્ફોટક 77 રનની ઈનિંગ અને ભારતીય બોલરોની ધારદાર બોલિંગ સામે પાકિસ્તાની ટીમ માત્ર 114 રનમાં ઓલઆઉટ થઈ ગઈ.
આફ્રિદીનું માનવું છે કે હવે જૂના ખેલાડીઓને વળગી રહેવાને બદલે પાકિસ્તાને યુવા પ્રતિભાઓને તક આપવી જોઈએ જેથી ભવિષ્યની ટીમ તૈયાર થઈ શકે.

ભારત વિ પાકિસ્તાન ટી20 વર્લ્ડ કપ

શાહિદ આફ્રિદીએ જમાઈ શાહીન સહિત બાબર અને શાદાબને ટીમમાંથી બહાર કરવાની કરી માંગ

February 16, 2026 | 11:44 IST