ઉસ્માન તારિકની એક્શન પર ચર્ચા

પાકિસ્તાનનો ઓફ-સ્પિનર ઉસ્માન તારિક અત્યારે તેની અનોખી બોલિંગ શૈલીને કારણે આખા વિશ્વમાં ચર્ચાનું કેન્દ્ર બન્યો છે. તેની 'સાઈડ-આર્મ' અને બોલ ફેંકતા પહેલા સહેજ રોકાઈ જવાની આદતને લઈને દિગ્ગજ ક્રિકેટરોમાં મતભેદ જોવા મળી રહ્યા છે. કોલંબોમાં ભારત સામેની મહત્વની મેચ પહેલા આ વિવાદે જોર પકડ્યું છે.

અશ્વિન અને પૂર્વ અમ્પાયરોનું સમર્થન : 

ભારતના દિગ્ગજ સ્પિનર રવિચંદ્રન અશ્વિને આ મુદ્દે ઉસ્માન તારિકનો પક્ષ લીધો છે. અશ્વિનના મતે, બોલિંગ કરતી વખતે ક્રીઝ પર થોભવું એ સંપૂર્ણપણે કાયદેસર છે જો તે બોલરની નિયમિત એક્શનનો ભાગ હોય. તેણે સ્પષ્ટ કર્યું કે એક્શનની કાયદેસરતા નક્કી કરવાનું કામ માત્ર આઈસીસીના ટેસ્ટિંગ સેન્ટરનું છે. પૂર્વ ઇન્ટરનેશનલ અમ્પાયર અનિલ ચૌધરીએ પણ પુષ્ટિ કરી છે કે જો હાથના વળાંકમાં નિયમ વિરુદ્ધ ફેરફાર ન હોય, તો આવી એક્શનમાં કોઈ ખોટું નથી.

કેવિન પીટરસન અને આકાશ ચોપરાના સવાલ : 

બીજી તરફ, ઈંગ્લેન્ડના પૂર્વ કેપ્ટન કેવિન પીટરસને આ એક્શનને ગેરકાયદેસર ગણાવી છે. આ ઉપરાંત, પૂર્વ ભારતીય ઓપનર આકાશ ચોપરાએ પણ એક ટેકનિકલ સવાલ ઉઠાવ્યો છે. તેમણે પ્રશ્ન કર્યો છે કે રન-અપ વગર અને બોડી મોમેન્ટ વગર માત્ર હાથના જોરે ગતિમાં આટલો મોટો ફેરફાર કેવી રીતે શક્ય છે. દક્ષિણ આફ્રિકાના એનાલિસ્ટ પ્રસન્ના અઘોરમે પણ તારિકની એક્શનને ક્લીન ગણાવી છે.

શાનદાર ટ્રેક રેકોર્ડ અને ભારત માટે પડકાર : 

ઉસ્માન તારિકનો ટી20 રેકોર્ડ પ્રભાવશાળી છે. તેણે 42 મેચોમાં 70 વિકેટ ઝડપી છે. તેની ગતિમાં ફેરફાર કરવાની ક્ષમતા તેને ઘાતક બનાવે છે. ખાસ કરીને કોલંબોની ધીમી પિચ પર તે ભારતીય બેટ્સમેનો માટે મુશ્કેલી ઊભી કરી શકે છે. અમેરિકાના બેટ્સમેન મિલિંદ કુમાર પણ તેની સામે અસ્વસ્થતા અનુભવી ચૂક્યા છે.

આ વિવાદ વચ્ચે હવે જોવાનું એ રહેશે કે ભારત સામેની હાઈ-વોલ્ટેજ મેચમાં ઉસ્માન તારિકને પ્લેઈંગ ઈલેવનમાં સ્થાન મળે છે કે નહીં અને અમ્પાયરો તેની એક્શન પ્રત્યે કેવું વલણ અપનાવે છે.