ભારતીય ક્રિકેટના ઈતિહાસમાં સૌથી સફળ સુકાની તરીકે જાણીતા મહેન્દ્ર સિંહ ધોનીને લઈને એક સનસનીખેજ માહિતી સામે આવી છે. અત્યાર સુધી એવું માનવામાં આવતું હતું કે ધોનીએ પોતાની મરજીથી સફેદ બોલ ક્રિકેટની કેપ્ટનશીપ છોડી હતી, પરંતુ પૂર્વ પસંદગીકાર જતિન પરાંજપેના તાજેતરના નિવેદને ક્રિકેટ જગતમાં ખળભળાટ મચાવી દીધો છે. તેમના જણાવ્યા અનુસાર, ધોનીએ પદ છોડ્યું નહોતું પણ તેને પદ છોડવા માટે કહેવામાં આવ્યું હતું.
જાન્યુઆરી 2017ની એ અગત્યની વાતચીત :&nbsp;
વર્ષ 2014માં ટેસ્ટ ક્રિકેટમાંથી નિવૃત્તિ લીધા બાદ ધોની માત્ર મર્યાદિત ઓવરોના ફોર્મેટ પર ધ્યાન આપી રહ્યો હતો. વર્ષ 2017માં ઇંગ્લેન્ડ સામેની હોમ સિરીઝ પહેલા પસંદગી સમિતિએ એક મોટો નિર્ણય લીધો હતો. પરાંજપેએ યાદ કરતા જણાવ્યું કે જ્યારે ધોની પ્રેક્ટિસ સેશન દરમિયાન બેટિંગ કરી રહ્યો હતો, ત્યારે સિલેક્ટર્સ તેની પાસે ગયા હતા. પસંદગીકારોએ માહીને સ્પષ્ટ શબ્દોમાં સમજાવ્યું હતું કે હવે ટીમ માટે આગળ વધવાનો અને નેતૃત્વ પરિવર્તન કરવાનો યોગ્ય સમય આવી ગયો છે.
ધોનીનો પ્રતિભાવ અને મેઈલનો ખુલાસો :&nbsp;
જ્યારે પસંદગીકારોએ ધોનીને ભવિષ્યની યોજનાઓ વિશે જણાવ્યું, ત્યારે ધોનીએ ખૂબ જ નમ્રતા અને પ્રોફેશનલ રીતે આ વાત સ્વીકારી હતી. તેણે એમએસકે પ્રસાદને ખાતરી આપી હતી કે તે આ નિર્ણય સાથે સહમત છે. પસંદગીકારોની સૂચના મુજબ, તે જ રાત્રે ધોનીએ સત્તાવાર રીતે ઈમેઈલ મોકલીને સુકાનીપદ પરથી રાજીનામું આપવાની જાહેરાત કરી દીધી હતી. આ નિર્ણય પાછળનો હેતુ 2019ના વર્લ્ડ કપ માટે વિરાટ કોહલીને તૈયાર કરવાનો હતો.
ટીકાઓ છતાં લેવો પડ્યો કડક નિર્ણય :&nbsp;
આ ખુલાસાથી સ્પષ્ટ થાય છે કે ભારતીય ક્રિકેટના હિતમાં પસંદગીકારોએ આ કઠોર નિર્ણય લેવો પડ્યો હતો. જોકે તે સમયે ચાહકોમાં ભારે રોષ જોવા મળ્યો હતો અને સિલેક્ટર્સને ટીકાઓનો સામનો કરવો પડ્યો હતો, પરંતુ લાંબા ગાળાના આયોજન માટે આ પરિવર્તન જરૂરી માનવામાં આવતું હતું. ત્યારબાદ વિરાટ કોહલીએ ત્રણેય ફોર્મેટમાં ટીમની કમાન સંભાળી અને ધોની એક સિનિયર ખેલાડી તરીકે ટીમમાં માર્ગદર્શક ભૂમિકા ભજવતો રહ્યો.

પૂર્વ સિલેક્ટર જતિન પરાંજપેનો ચોંકાવનારો ખુલાસો: BCCI એ માહીને પદ છોડવા માટે કર્યો ઈશારો

February 14, 2026 | 19:24 IST