ભારત-ઈંગ્લેન્ડ ત્રીજી ટેસ્ટમાં વિવાદ: ક્રાઉલીની હરકતથી ભારતીય ટીમ નારાજ

ભારત અને ઈંગ્લેન્ડ વચ્ચે રમાઈ રહેલી ત્રીજી ટેસ્ટ મેચના ત્રીજા દિવસે ઈંગ્લેન્ડના ઓપનિંગ બેટ્સમેન જેક ક્રાઉલીની હરકતના કારણે ભારતીય ટીમ, ખાસ કરીને સુકાની શુભમન ગિલ અને ફાસ્ટ બોલર જસપ્રિત બુમરાહ નારાજ થયા હતા. ક્રાઉલીએ રમતના અંતે સમય બરબાદ કરવાની રણનીતિ અપનાવી, જેના કારણે ભારતીય ટીમ માત્ર એક ઓવર જ નાખી શકી, જ્યારે બે ઓવર નાખવાની તક હતી. આ ઘટનાએ મેદાન પર તણાવનું વાતાવરણ સર્જ્યું, જેમાં ગિલ અને ક્રાઉલી વચ્ચે બોલાચાલી પણ થઈ હતી.   મેચની સ્થિતિ અને વિવાદની શરૂઆત   પ્રથમ ઈનિંગમાં ઈંગ્લેન્ડે 387 રન નોંધાવ્યા હતા, જેના જવાબમાં ભારતીય ટીમ પણ ત્રીજા દિવસે 387 રનમાં ઓલઆઉટ થઈ ગઈ. ત્યારબાદ ઈંગ્લેન્ડે બીજી ઈનિંગ શરૂ કરી. રમતના સમય મુજબ ભારતીય ટીમ પાસે છેલ્લી ઘડીઓમાં બે ઓવર નાખવાની તક હતી, પરંતુ ક્રાઉલીની સમય બરબાદ કરવાની હરકત અને પાંચમા બોલે થયેલી ઈજાને કારણે માત્ર એક જ ઓવર નાખવામાં આવી.   બીજી ઈનિંગની શરૂઆતમાં જસપ્રિત બુમરાહે બોલિંગની શરૂઆત કરી. પ્રથમ બોલે કોઈ રન આવ્યો ન હતો. બીજા બોલે ક્રાઉલીએ શોર્ટ ફટકારી બે રન લીધા. જોકે, ત્રીજા બોલથી ક્રાઉલીએ સમય બરબાદ કરવાનું શરૂ કર્યું. બુમરાહે બોલ નાખતી વખતે ક્રાઉલી પીચ પરથી હટી ગયો, જેનાથી બુમરાહ અને ગિલ નારાજ થયા. બુમરાહે એમ્પાયરને પણ ટકોર કરી. ચોથા બોલે પણ કોઈ રન આવ્યો ન હતો, જ્યારે પાંચમા બોલે ક્રાઉલીને ઈજા થઈ, જેના કારણે વધુ વિવાદ ઉભો થયો. આ દરમિયાન ભારતીય ખેલાડીઓ, જેમાં બુમરાહ, કે.એલ. રાહુલ અને ગિલ સામેલ હતા, તેમણે તાલીઓ વગાડી કટાક્ષ કર્યો. ગિલે ક્રાઉલી પાસે દોડીને થર્ડ એમ્પાયર સામે ઈશારો કરી રમત પૂર્ણ થવાનો સંકેત આપ્યો. આ ઘટનામાં ગિલ અને ક્રાઉલી વચ્ચે બોલાચાલી થઈ, જેમાં એમ્પાયરે વચ્ચે પડવું પડ્યું. છેલ્લા બોલે પણ કોઈ રન આવ્યો ન હતો, અને ઈંગ્લેન્ડે દિવસના અંતે વિના વિકેટે 2 રન નોંધાવ્યા.   ઈંગ્લેન્ડના ટિમ સાઉદીનું નિવેદન આ ઘટના બાદ ઈંગ્લેન્ડના પેસ બોલિંગ કન્સલ્ટન્ટ ટિમ સાઉદીએ શુભમન ગિલ પર નિશાન સાધ્યું. તેમણે કહ્યું, “ત્રીજા દિવસની રમતના અંતે બંને ટીમો વચ્ચે બોલાચાલી થઈ. પરંતુ બીજા દિવસે ગિલ મસાજ કરાવી રહ્યો હતો, ત્યારે કોઈએ કંઈ ન કહ્યું. રમતમાં આવું ચાલે છે.” સાઉદીએ મજાકમાં ઉમેર્યું, “ક્રાઉલીનો હાથ રાત્રે તપાસવામાં આવશે, અને આશા છે કે તે રમત માટે ફિટ રહેશે.”   કે.એલ. રાહુલનો ક્રાઉલીનો બચાવ ભારતના ઓપનિંગ બેટ્સમેન કે.એલ. રાહુલે ક્રાઉલીનો બચાવ કરતાં કહ્યું, “હું એક ઓપનર તરીકે સમજી શકું છું કે ક્રાઉલી શું કરી રહ્યો હતો. ત્રીજા દિવસની રમતના અંતે છેલ્લી પાંચ મિનિટમાં શું થયું, તે બધાને ખબર છે. ગિલનો ગુસ્સો વ્યાજબી હતો, કારણ કે અમે બે ઓવર નાખવા માંગતા હતા. પરંતુ બેટ્સમેન માટે આવા સમયે બે ઓવર રમવી મુશ્કેલ હોય છે.”   આ ઘટનાએ ભારત-ઈંગ્લેન્ડ વચ્ચેની ત્રીજી ટેસ્ટમાં નવો વિવાદ જન્માવ્યો છે. ક્રાઉલીની હરકત અને ગિલ-બુમરાહની પ્રતિક્રિયાએ મેદાન પર ગરમાગરમી ઉભી કરી, જેની ચર્ચા હવે ક્રિકેટ વર્તુળોમાં થઈ રહી છે. આગામી દિવસોમાં આ વિવાદ મેચના પરિણામને કેવી રીતે અસર કરે છે, તે જોવું રસપ્રદ રહેશે.