ભારત અને ઇંગ્લેન્ડ વચ્ચે આજે વાનખેડે સ્ટેડિયમમાં T20 વર્લ્ડ કપની સતત ત્રીજી સેમીફાઈનલ રમાવા જઈ રહી છે. જોકે, આ વખતે હોમ ગ્રાઉન્ડ હોવા છતાં ભારત માટે રસ્તો આસાન નથી.
રમત પ્રેમીઓ અને વિશ્લેષકોના મતે ત્રણ એવી બાબતો છે જે ભારતને આ મહત્વના મુકાબલામાં ભારે પડી શકે છે.
ફિલ સોલ્ટનો પાવરપ્લેમાં આતંક
ઇંગ્લેન્ડનો ઓપનર ફિલ સોલ્ટ અત્યંત આક્રમક બેટર છે. વાનખેડેની પિચ પર જે રીતે પેસ અને બાઉન્સ મળે છે, તે સોલ્ટની બેટિંગ સ્ટાઈલને ખૂબ જ માફક આવે છે. જો તે પાવરપ્લેની 6 ઓવર ટકી ગયો, તો તે એકલા હાથે મેચ ભારતની પકડમાંથી બહાર લઈ જઈ શકે છે. આઈપીએલના અનુભવને કારણે તે ભારતીય બોલરો અને પરિસ્થિતિઓથી સારી રીતે વાકેફ છે.
ભારતની નબળી ફિલ્ડિંગ અને કેચિંગ
આ ટુર્નામેન્ટમાં અત્યાર સુધી ભારતની ફિલ્ડિંગ ચિંતાનો વિષય રહી છે. આંકડા મુજબ, સુપર-8ની ટોચની આઠ ટીમોમાં ભારતનો કેચિંગ એફિશિયન્સી રેશિયો સૌથી ઓછો છે. ભારત તરફથી અનેક સરળ કેચ છૂટ્યા છે. જો સેમીફાઈનલ જેવી હાઈ-વોલ્ટેજ મેચમાં જોસ બટલર કે ફિલ સોલ્ટ જેવા ખેલાડીઓનો કેચ છૂટશે, તો તેની કિંમત ભારતને વર્લ્ડ કપ ગુમાવીને ચૂકવવી પડી શકે છે.
'ઝાકળ' બની શકે છે અડચણ
મુંબઈમાં માર્ચ મહિનામાં રાત્રિ દરમિયાન ઝાકળ પડવાની પૂરેપૂરી શક્યતા છે. સાઉથ આફ્રિકા અને ન્યુઝીલેન્ડ વચ્ચેની પ્રથમ સેમીફાઈનલમાં પણ આપણે જોયું કે બીજી ઇનિંગમાં ઝાકળને કારણે બેટિંગ કેટલી સરળ બની ગઈ હતી.
જો ભારત ટોસ હારે છે અને બીજી ઇનિંગમાં બોલિંગ કરવાની આવે છે, તો ભીના બોલ પર ગ્રીપ મેળવવી બોલરો માટે મુશ્કેલ બનશે. આવા કિસ્સામાં ભારતે સ્કોર બોર્ડ પર વધારાના 15-20 રન મૂકવા પડશે.
વાનખેડેમાં ઇંગ્લેન્ડના ખેલાડીઓને આઈપીએલનો બહોળો અનુભવ હોવાથી ભારતને 'હોમ એડવાન્ટેજ' પણ ઓછું મળે તેવી શક્યતા છે.
&nbsp;

ભારત vs ઇંગ્લેન્ડ સેમીફાઈનલ

ટીમ ઇન્ડિયા સામે હેરી બ્રુકની ઇંગ્લેન્ડનો પડકાર; સાંજે 7 વાગ્યે શરૂ થશે મેચ

March 5, 2026 | 18:39 IST