આઈસીસી મેન્સ ટી20 વર્લ્ડ કપ 2026માં ભારતીય ટીમના યુવા ઓપનર અભિષેક શર્માએ પોતાની બેટિંગથી મેદાન પર ગરમાવો લાવી દીધો છે. ઝિમ્બાબ્વે સામેની મહત્વની મેચમાં અભિષેકે માત્ર 30 બોલમાં 55 રનની આક્રમક ઇનિંગ રમીને ભારતની 72 રનથી ભવ્ય જીતમાં પાયાની ભૂમિકા ભજવી હતી. આ ઇનિંગ એટલા માટે ખાસ હતી કારણ કે આ પહેલાની ત્રણ મેચોમાં અભિષેક શૂન્ય પર આઉટ થયો હતો, જેના કારણે સોશિયલ મીડિયા અને ક્રિકેટ જગતમાં તેના ફોર્મ અંગે ચર્ચાઓ જાગી હતી.
મોહમ્મદ આમિરના નિવેદન પર અશ્વિનનો વળતો પ્રહાર :&nbsp;
ભારતની જીત બાદ રવિચંદ્રન અશ્વિને પાકિસ્તાનના પૂર્વ બોલર મોહમ્મદ આમિરને આડે હાથ લીધો હતો. અગાઉ આમિરે અભિષેક શર્માની ક્ષમતા પર શંકા વ્યક્ત કરતા તેને માત્ર એક 'સ્લોગર' એટલે કે આડેધડ બેટ ફેરવનાર ખેલાડી ગણાવ્યો હતો. આમિરનું માનવું હતું કે અભિષેકની બેટિંગમાં ટેકનિકનો અભાવ છે અને તે માત્ર મોટા શૉટ્સ પર જ નિર્ભર રહે છે.
અશ્વિને આ બાબતે પોતાની યુટ્યુબ ચેનલ દ્વારા સ્પષ્ટતા કરતા જણાવ્યું કે અભિષેકને સ્લોગર કહેવો તે અન્યાય છે. અશ્વિનના મતે અભિષેક પાસે અત્યારના સમયમાં સૌથી સુંદર 'બેટ સ્વિંગ' છે. વધુમાં તેણે યુવરાજ સિંહ સાથે સરખામણી કરતા કહ્યું કે અભિષેકનો બેટ સ્વિંગ તેના મેન્ટર યુવરાજ કરતા પણ વધુ પ્રભાવશાળી લાગે છે. તેની એકમાત્ર મુશ્કેલી દરેક બોલ પર આક્રમક થવાની હતી, જે તેણે આ મેચમાં સુધારી લીધી છે.
સુનીલ ગાવસ્કરે જોયો નવો અવતાર :&nbsp;
ક્રિકેટના દિગ્ગજ સુનીલ ગાવસ્કરે પણ અભિષેકની આ ઇનિંગના મુક્ત મને વખાણ કર્યા છે. ગાવસ્કરે ખાસ નોંધ્યું કે આ વખતે અભિષેકે માત્ર આક્રમકતા જ નહીં પણ સમજદારી અને શિસ્ત પણ બતાવી હતી. સામાન્ય રીતે માત્ર ચોગ્ગા-છગ્ગામાં માનતો આ યુવા ખેલાડી આ મેચમાં ડિફેન્સિવ શૉટ્સ રમતો પણ જોવા મળ્યો હતો. ગાવસ્કરના મતે, ઓફ સ્પિનર સામે સંયમ જાળવીને રમીને અભિષેકે સાબિત કર્યું છે કે તે પરિસ્થિતિ મુજબ પોતાની રમત બદલી શકે છે.

T20 વર્લ્ડ કપ 2026: ત્રણ ડક બાદ અભિષેક શર્માનું ફોર્મ પરત, ગાવસ્કર અને અશ્વિને કર્યા વખાણ.

February 28, 2026 | 11:18 IST