T20 વર્લ્ડ કપ 2026ના પ્રારંભિક તબક્કે જ ભારતીય ક્રિકેટ ટીમ માટે મુશ્કેલીના સમાચાર સામે આવ્યા છે. ટીમના આક્રમક ઓપનિંગ બેટર અભિષેક શર્માની તબિયત બગડતા તેમને દિલ્હીની એક ખાનગી હોસ્પિટલમાં દાખલ કરવામાં આવ્યા છે. 15 ફેબ્રુઆરીએ શ્રીલંકાના કોલંબોમાં પાકિસ્તાન સામે રમાનારા મહામુકાબલા પહેલા આ ઘટનાએ પસંદગીકારો અને ચાહકોની ચિંતા વધારી દીધી છે.
ગંભીર ઈન્ફેક્શન અને તાવ :&nbsp;
પ્રાપ્ત અહેવાલો અનુસાર, અભિષેક શર્માને પેટમાં ગંભીર ઈન્ફેક્શન થયું છે અને તે તેજ તાવથી પીડાઈ રહ્યો છે. નોંધનીય છે કે 7 ફેબ્રુઆરીએ અમેરિકા સામેની મેચ દરમિયાન પણ તે અસ્વસ્થ હતો, તેમ છતાં તે મેદાનમાં ઉતર્યો હતો. રવિવારે રાત્રે મુખ્ય કોચ ગૌતમ ગંભીરના ઘરે આયોજિત ટીમ ડિનર વખતે તેની તબિયત વધુ લથડી હતી, જેના કારણે તેણે કાર્યક્રમ અધવચ્ચે જ છોડવો પડ્યો હતો. સોમવારથી તે તબીબી દેખરેખ હેઠળ છે અને હજુ સુધી તેને રજા મળી નથી.
સંજુ સેમસન માટે ઓપનિંગના દ્વાર ખુલશે ?
અભિષેક શર્માની ગેરહાજરીમાં હવે ટીમ મેનેજમેન્ટ પાસે સંજુ સેમસનનો વિકલ્પ ઉપલબ્ધ છે. જો અભિષેક નામિબિયા અને ત્યારબાદ પાકિસ્તાન સામેની મેચ માટે ફિટ નહીં થાય, તો સંજુ સેમસન ઇશાન કિશન સાથે ઈનિંગની શરૂઆત કરતો જોવા મળી શકે છે. લાંબા સમયથી તકની રાહ જોઈ રહેલા સંજુ માટે આ પોતાની ક્ષમતા પુરવાર કરવાની મોટી તક સાબિત થઈ શકે છે.
પાકિસ્તાન સામેની મેચ પર અનિશ્ચિતતા :
ભારત અને પાકિસ્તાન વચ્ચેની મેચ હંમેશા દબાણવાળી હોય છે. અભિષેક શર્મા જેવો આક્રમક ખેલાડી જો આ મેચ ગુમાવે તો ટીમ ઈન્ડિયાના સંતુલન પર તેની અસર પડી શકે છે. હાલમાં BCCI અને મેડિકલ ટીમ ખેલાડીની રિકવરી પર સતત નજર રાખી રહ્યા છે. ચાહકો હવે એ જ પ્રાર્થના કરી રહ્યા છે કે 15 ફેબ્રુઆરીની મોટી મેચ પહેલા ભારતનો આ સ્ટાર ખેલાડી સંપૂર્ણ સ્વસ્થ થઈને મેદાન પર પરત ફરે

T20 વર્લ્ડ કપમાં પાકિસ્તાન સામેની હાઈ-વોલ્ટેજ મેચ પહેલા ઓપનર અભિષેક શર્મા હોસ્પિટલ ભેગા

February 11, 2026 | 10:13 IST