WhatsApp માં આવી રહ્યું છે આ અદ્ભુત ફીચર,એન્ડ્રોઇડ યુઝર્સ થઇ જશે ખુશ

મેટાની માલિકીની લોકપ્રિય મેસેજિંગ એપ્લિકેશન, WhatsApp ટૂંક સમયમાં તેમના વપરાશકર્તાઓ માટે એક નવી સુવિધા લોન્ચ કરવાની યોજના બનાવી રહી છે.આ ફીચર દ્વારા, યુઝર્સ તેમના સ્ટેટસ અપડેટ્સમાં મ્યુઝિક ઉમેરી શકશે.આ સુવિધા હાલમાં Android અને iOS બંને વર્ઝન માટે પસંદગીના બીટા વપરાશકર્તાઓ સાથે પરીક્ષણ તબક્કામાં છે. મેટાની બીજી એપ્લિકેશન, ઇન્સ્ટાગ્રામ, પહેલાથી જ તેના વપરાશકર્તાઓને સ્ટોરીઝમાં મ્યુઝિક ઉમેરવાની મંજૂરી આપે છે.જે વોટ્સએપના સ્ટેટસ ફીચર જેવું જ છે.

Android અને iOS વપરાશકર્તાઓ માટે મ્યુઝિક સ્ટેટસ સુવિધા

ફીચર્સ ટ્રેકર WABetaInfo અનુસાર, WhatsApp તેના એન્ડ્રોઇડ યુઝર્સ માટે એક નવી સુવિધા પર કામ કરી રહ્યું છે જે તેમને સ્ટેટસ અપડેટ્સમાં મ્યુઝિત ઉમેરવાની મંજૂરી આપશે. આ સુવિધા હાલમાં એવા વપરાશકર્તાઓ માટે ઉપલબ્ધ છે જેમણે WhatsApp બીટા અપડેટ 2.25.2.5 ઇન્સ્ટોલ કર્યું છે.ટૂંક સમયમાં તેને અન્ય એન્ડ્રોઇડ યુઝર્સ માટે પણ લોન્ચ કરવામાં આવી શકે છે.તેવી જ રીતે, WABetaInfo એ અહેવાલ આપ્યો છે કે આ સુવિધા iOS વપરાશકર્તાઓ માટે WhatsApp બીટા 25.1.10.73 અપડેટ સાથે પણ રજૂ કરવામાં આવી રહી છે.

મ્યુઝિક સ્ટેટસ ફીચર કેવી રીતે કામ કરશે

એન્ડ્રોઇડ અને iOS બંને વપરાશકર્તાઓ માટે, સ્ટેટસ અપડેટ વિકલ્પમાં એક નવું મ્યુઝિક બટન ઉપલબ્ધ થશે, જે ડ્રોઇંગ, ટેક્સ્ટ અને અન્ય એડિટિંગ વિકલ્પોની સાથે દેખાશે. આ બટન દ્વારા વપરાશકર્તાઓ ગીતો અથવા કલાકારો શોધી શકે છે અને તેમની પસંદગીનું ગીત પસંદ કરી શકે છે. મ્યુઝિક પસંદ કર્યા પછી, વપરાશકર્તાઓ નક્કી કરી શકે છે કે ગીતનો કયો પાર્ટ યુઝ કરવો છે.જો સ્ટેટસ અપડેટ ફોટો આધારિત હોય, તો મ્યુઝિક ક્લિપ મહત્તમ 15 સેકન્ડની હોઈ શકે છે. તે જ સમયે, વિડિઓ સ્ટેટસ માટે મ્યુઝિક ક્લિપનો સમયગાળો વીડિયોની લંબાઇ પર આધારિત રહેશે.