બાંગ્લાદેશમાં લઘુમતી હિન્દુ સમાજ પર થઈ રહેલી હિંસાને મુદ્દે ઉત્તરપ્રદેશના મુખ્યમંત્રી યોગી આદિત્યનાથે આકરા તેવર બતાવ્યા છે. પ્રયાગરાજમાં આયોજિત જગદગુરૂ રામાનંદાચાર્યની જયંતિ પ્રસંગે તેમણે વિપક્ષી નેતાઓ અને કહેવાતા ધર્મનિરપેક્ષવાદીઓ પર આકરા પ્રહાર કર્યા હતા. તેમણે જણાવ્યું હતું કે બાંગ્લાદેશમાં નિર્દોષ લોકોના રક્તપાત છતાં ભારતનો વિપક્ષ મૌન સેવી રહ્યો છે, જે લોકશાહી અને સનાતન સંસ્કૃતિ માટે જોખમી સંકેત છે.
મુખ્યમંત્રીએ કટાક્ષ કરતા ઉમેર્યું હતું કે જ્યારે બાંગ્લાદેશમાં હિન્દુઓની હત્યા થાય છે ત્યારે કોઈ કેન્ડલ માર્ચ કે વિરોધ પ્રદર્શન જોવા મળતું નથી. તેમણે ચેતવણી આપી હતી કે જો હિન્દુ સમાજ જાતિ અને સંપ્રદાયના નામે વિભાજિત થશે, તો તેનું પરિણામ પણ વિનાશક આવી શકે છે. જે પ્રકારે બાંગ્લાદેશમાં ભાગલાને કારણે લઘુમતીઓ મુશ્કેલીમાં છે, તેવી સ્થિતિ સર્જાય તે પહેલા ભારતે એકજૂટ થવું અનિવાર્ય છે.
પ્રયાગરાજમાં માઘ મેળાનો ઉલ્લેખ કરતા સીએમ યોગીએ કહ્યું હતું કે લાખો શ્રદ્ધાળુઓની આસ્થા એ વાતનો પુરાવો છે કે સનાતન ધર્મ આજે પણ અત્યંત પ્રબળ છે. તેમણે જનતાને અપીલ કરી હતી કે સમાજમાં ભાગલા પાડનારા તત્વોને ઓળખીને તેમને અટકાવવા જોઈએ. અયોધ્યામાં રામ મંદિરના નિર્માણ બાદ સનાતન ધર્મની શક્તિ વૈશ્વિક સ્તરે સ્થાપિત થઈ રહી છે, અને જો હિન્દુ સમાજ સંગઠિત રહેશે તો દુનિયાની કોઈપણ તાકાત તેમની વિરુદ્ધ હિંસા કરવાનું સાહસ નહીં કરી શકે.

હિન્દુઓ પર થતા અત્યાચાર પર સેક્યુલરવાદીઓ મૌન કેમ? પ્રયાગરાજમાં મુખ્યમંત્રી યોગી આદિત્યનાથ

January 11, 2026 | 01:41 IST