Nvidia CEO જેન્સન હુઆંગના કથિત અફેરથી અમેરિકામાં ખળભળાટ! ટ્રમ્પને મહિનાઓ પહેલાં જ મળી હતી ચીનની જાસૂસી અંગે માહિતી?

Nvidia CEO Jensen Huang Affair China Spy: વિશ્વની અગ્રણી AI ચિપ ઉત્પાદક કંપની Nvidia અને તેના CEO જેન્સન હુઆંગને લઈને આંતરરાષ્ટ્રીય સ્તરે મોટો વિવાદ ઊભો થયો છે. હુઆંગના એક મહિલા સાથેના કથિત સંબંધો અને તે મહિલા ચીનની ગુપ્તચર એજન્સી સાથે જોડાયેલી હોવાની શંકાએ હવે અમેરિકા-ચીન વચ્ચેના ટેકનોલોજી અને રાષ્ટ્રીય સુરક્ષાના મુદ્દાને નવી દિશા આપી છે. આ મામલે સૌથી મોટો ખુલાસો એ થયો છે કે અમેરિકાના રાષ્ટ્રપતિ ડોનાલ્ડ ટ્રમ્પને આ અંગે મહિનાઓ પહેલાં જ ગુપ્ત માહિતી આપવામાં આવી હતી.

ટ્રમ્પને એર ફોર્સ વન પર શું માહિતી અપાઈ હતી?
ધ ન્યૂયોર્ક ટાઇમ્સના અહેવાલ અનુસાર, મે 2026માં ટ્રમ્પ ચીનના પ્રવાસે જઈ રહ્યા હતા ત્યારે એર ફોર્સ વન વિમાનમાં તેમને જેન્સન હુઆંગના કથિત સંબંધો અંગે માહિતી આપવામાં આવી હતી. અમેરિકાની ગુપ્તચર એજન્સીઓએ એલિસ હુઆંગ નામની મહિલા અંગે સંવેદનશીલ માહિતી એકત્ર કરી હતી. અમેરિકી અધિકારીઓને શંકા હતી કે એલિસ હુઆંગ ચીનની ગુપ્તચર એજન્સી માટે કામ કરતી હતી અને બેઇજિંગને માહિતી પહોંચાડતી હતી. અહેવાલ મુજબ, અમેરિકાના વિદેશમંત્રી અને રાષ્ટ્રીય સુરક્ષા સલાહકાર માર્કો રુબિયોએ ટ્રમ્પને આ માહિતી આપી હતી. આ બ્રીફિંગ બાદ પણ જેન્સન હુઆંગ ટ્રમ્પના આમંત્રણ પર બેઇજિંગ પ્રવાસમાં જોડાયા હતા. નોંધનીય છે કે ટ્રમ્પે તાજેતરમાં આ મામલે પૂછવામાં આવતાં કહ્યું હતું કે તેમને તે સમયે હુઆંગના કથિત સંબંધો અંગે જાણ નહોતી.

જેન્સન હુઆંગે સંબંધો અંગે શું સ્વીકાર્યું?
જેન્સન હુઆંગે Nvidiaના કર્મચારીઓને આપેલા સંદેશમાં સ્વીકાર્યું હતું કે તેઓ પોતાની પત્ની પ્રત્યે બેવફા રહ્યા હતા. જોકે, તેમણે સંબંધની તમામ વિગતો જાહેર કરી નહોતી. બીજી તરફ, Nvidiaના બોર્ડે હુઆંગ વિદેશી ગુપ્તચર કામગીરીનો નિશાન બન્યા હતા કે નહીં તેની સ્વતંત્ર તપાસ શરૂ કરી છે. કંપનીએ બહારના કાનૂની નિષ્ણાતોની મદદ પણ લીધી છે. Nvidiaનું કહેવું છે કે કંપનીની ગુપ્ત માહિતી અથવા અમેરિકાની રાષ્ટ્રીય સુરક્ષા સાથે જોડાયેલી બાબતો જોખમમાં મુકાઈ હોવાનો કોઈ પુરાવો મળ્યો નથી. હુઆંગે પણ તપાસમાં સંપૂર્ણ સહયોગ આપવાની તૈયારી દર્શાવી છે.

Nvidiaના શેરમાં મોટું નુકસાન, ચીનનો ઇનકાર
આ વિવાદની અસર શેરબજારમાં પણ જોવા મળી છે. Reutersના અહેવાલ મુજબ, 10 નવેમ્બર સુધીના બે ટ્રેડિંગ સત્રોમાં Nvidiaના બજાર મૂલ્યમાં આશરે 430 અબજ ડોલરનો ઘટાડો નોંધાયો હતો. કંપનીના શેરમાં ઘટાડા પાછળ CEO સાથે જોડાયેલા વિવાદ ઉપરાંત ચીનમાં ચિપ્સની નિકાસ અને કંપનીના સંચાલન અંગે વધતી ચિંતાઓ પણ જવાબદાર છે. આ દરમિયાન ચીને એલિસ હુઆંગ ચીની જાસૂસ હોવાના આરોપોને પાયાવિહોણા ગણાવ્યા છે. ચીનના વિદેશ મંત્રાલયે આ દાવાઓને દેશની છબી ખરાબ કરવાનો પ્રયાસ ગણાવ્યો હતો.

અમેરિકા-ચીન ટેકનોલોજી સ્પર્ધા પર શું અસર પડશે?
Nvidiaની AI ચિપ્સ વૈશ્વિક ટેકનોલોજી ઉદ્યોગ માટે અત્યંત મહત્ત્વપૂર્ણ છે. અમેરિકા લાંબા સમયથી અદ્યતન સેમિકન્ડક્ટર ચિપ્સ ચીન સુધી પહોંચતી અટકાવવા નિકાસ નિયંત્રણો લાગુ કરી રહ્યું છે. આવી સ્થિતિમાં Nvidiaના CEO સાથે જોડાયેલા જાસૂસીના આરોપો કંપનીના ચીન સાથેના વેપાર, અમેરિકાની રાષ્ટ્રીય સુરક્ષા અને AI ક્ષેત્રની વૈશ્વિક સ્પર્ધા માટે ગંભીર પ્રશ્નો ઊભા કરી શકે છે. હવે અમેરિકી તપાસ, Nvidiaના બોર્ડની આંતરિક તપાસ અને ચીનની પ્રતિક્રિયા પર વિશ્વની નજર છે. આ વિવાદની અસર માત્ર એક કંપનીના શેર સુધી મર્યાદિત રહેશે કે અમેરિકા-ચીનના ટેકનોલોજી સંબંધોમાં પણ નવો તણાવ ઊભો કરશે, તે આગામી દિવસોમાં સ્પષ્ટ થશે.