ઉત્તર પ્રદેશના કાસગંજમાં એક અત્યંત હૃદયદ્રાવક બનાવ સામે આવ્યો છે, જ્યાં ખુશીથી ભરેલો લગ્ન સમારોહ પળભરમાં શોકમાં પરિવર્તિત થઈ ગયો. કાસગંજમાં એક સમાજવાદી પાર્ટીના નેતાના પુત્રના લગ્ન દરમિયાન ડીજે સંગીત વગાડવા મુદ્દે થયેલી સામાન્ય બોલાચાલીએ લોહિયાળ સ્વરૂપ ધારણ કર્યું અને તે કાર અકસ્માતમાં પરિણમ્યું, જેમાં વરરાજાના સાળાએ પોતાની કારથી પાંચ લોકોને કચડી નાખ્યા. આ ભયાનક ઘટનામાં ત્રણ લોકોના કરુણ મોત નીપજ્યા છે, જ્યારે અન્ય બે વ્યક્તિઓ ગંભીર રીતે ઘાયલ થયા છે.
આ દુઃખદ બનાવ ગઈકાલે રાત્રે ગંજદુંડવારા પોલીસ સ્ટેશન વિસ્તારમાં આવેલા ઝેડએસ પેલેસ ગેસ્ટ હાઉસ ખાતે બન્યો હતો. વરરાજા અને કન્યા પક્ષ વચ્ચે ડીજે વગાડવા અંગે શરૂ થયેલો વિવાદ ઝડપથી ઉગ્ર બની ગયો. શરૂઆતમાં નાની ગણાતી આ તકરાર ટૂંક સમયમાં જ મારામારીમાં ફેરવાઈ ગઈ.
એવી માહિતી મળી છે કે વરરાજા પક્ષે કન્યાના પિતરાઈ ભાઈ પર હુમલો કર્યો હતો, જેનાથી યુવક અત્યંત ગુસ્સે ભરાયો. આ ક્રોધમાં યુવકે પોતાની કાર લઈને વરરાજાના કાકા, માસા અને અન્ય સંબંધીઓને તેની સ્પીડમાં આવતી કારથી કચડી નાખ્યા હતા. આ ગમખ્વાર અકસ્માતમાં ત્રણ વ્યક્તિઓના ઘટનાસ્થળે જ મોત થયા હતા, જ્યારે અન્ય બે ગંભીર ઈજાગ્રસ્તોને તાત્કાલિક હોસ્પિટલમાં દાખલ કરવામાં આવ્યા છે.
ઘટના બાદ લગ્ન સ્થળ પર અંધાધૂંધી અને અફરાતફરીનો માહોલ સર્જાયો હતો. લગ્નનું વાતાવરણ ચીસો અને કલ્પાંતમાં બદલાઈ ગયું. એક સાથે ત્રણ વ્યક્તિઓના મોતથી સમગ્ર પરિવારમાં ભારે શોકની લાગણી છવાઈ ગઈ છે. બનાવની જાણ થતાં જ ગંજદુંડવારા પોલીસ ઘટનાસ્થળે દોડી આવી અને પરિસ્થિતિને નિયંત્રણમાં લીધી.
પોલીસે ત્રણેય મૃતદેહોનો કબજો મેળવી પોસ્ટમોર્ટમ માટે મોકલી આપ્યા છે અને આરોપી યુવકને ઝડપી પાડવા માટે શોધખોળ શરૂ કરી છે. વધુ કોઈ અનિચ્છનીય ઘટના ન બને તે માટે ઘટનાસ્થળે ચુસ્ત પોલીસ બંદોબસ્ત ગોઠવી દેવામાં આવ્યો છે. આ ભયંકર ઘટનાએ માત્ર શોકગ્રસ્ત પરિવારને જ નહીં પરંતુ સમગ્ર વિસ્તારને આઘાત પહોંચાડ્યો છે.
સર્કલ ઓફિસર (પટિયાલી) સંદીપ વર્માએ જણાવ્યું હતું કે ડીજે સિસ્ટમ પરના વિવાદ પછી કાર અકસ્માતમાં ત્રણ લોકોના મોત અને બે લોકો ઘાયલ થયા હોવાના અહેવાલો છે. આરોપીઓની ધરપકડ કરવા માટે પોલીસ સતત પ્રયાસો કરી રહી છે.
&nbsp;
&nbsp;

કાસગંજ ડીજે વિવાદ

ડીજે વિવાદમાં ત્રણના મોત, સાળાએ કારથી પાંચને કચડ્યા, બે ગંભીર

December 5, 2025 | 18:28 IST