ઉત્તરાખંડના ચમોલીમાં ભારે હિમપ્રપાત, 57 BRO કામદારો ફસાયા

ઉત્તરાખંડના ચમોલીમાં થયેલા એક વિશાળ હિમપ્રપાતમાં 57 કામદારો દટાયા હતા. જે વિસ્તારમાં હિમપ્રપાત થયો હતો ત્યાં રસ્તાનું બાંધકામ ચાલી રહ્યું હતું. આ હિમપ્રપાતની ઘટના ચમોલીના માના ખાતે બોર્ડર રોડ ઓર્ગેનાઇઝેશન (BRO) કેમ્પ પાસે બની હતી. 10 કામદારોને બચાવી લેવામાં આવ્યા છે. રાહત અને બચાવ ટીમોને ઘટનાસ્થળે મોકલવાના પ્રયાસો ચાલી રહ્યા છે. ભારે હિમવર્ષાને કારણે રાહત અને બચાવ કામગીરી શરૂ કરવામાં મુશ્કેલી પડી રહી છે.

પોલીસ મુખ્યાલયના પ્રવક્તા આઈજી નીલેશ આનંદ ભરણેએ જણાવ્યું હતું કે માના સરહદી વિસ્તારમાં બોર્ડર રોડ્સ ઓર્ગેનાઇઝેશન (BRO) કેમ્પ પાસે એક મોટો હિમપ્રપાત થયો છે. આ હિમપ્રપાતમાં 57 કામદારો ફસાયા હતા. જેમાંથી 10 કામદારોને બચાવી લેવામાં આવ્યા છે. તેમની ગંભીર હાલતને કારણે, તેમને માના નજીકના આર્મી કેમ્પમાં મોકલવામાં આવ્યા છે.

દરમિયાન, BRO (બોર્ડર રોડ્સ ઓર્ગેનાઇઝેશન) ના એક્ઝિક્યુટિવ એન્જિનિયર સીઆર મીણાએ જણાવ્યું હતું કે 57 મજૂરો ઘટનાસ્થળે હાજર છે. ત્રણથી ચાર એમ્બ્યુલન્સ પણ મોકલવામાં આવી છે, પરંતુ ભારે હિમવર્ષાને કારણે બચાવ ટીમને ત્યાં પહોંચવામાં મુશ્કેલીઓનો સામનો કરવો પડી રહ્યો છે.

ચમોલીના ડીએમ સંદીપ તિવારીએ જણાવ્યું હતું કે ચમોલી જિલ્લાના માના ગામની આગળ ગ્લેશિયર ફાટવાને કારણે 57 કામદારો ફસાયેલા છે. ખરાબ હવામાનને કારણે બચાવ કામગીરી હજુ શરૂ થઈ નથી. આ વિસ્તારમાં સતત બરફવર્ષા થઈ રહી છે. જે વિસ્તારમાં ગ્લેશિયર ફાટ્યો છે તે નો નેટવર્ક ઝોન છે. ત્યાં સેટેલાઇટ ફોન પણ કામ કરતા નથી.