ઉત્તરાખંડના અલ્મોડા જિલ્લામાં આજે સવારે એક ઘટના સામે આવી છે, જેમાં અલ્મોડા બસ અકસ્માતમાં કુલ 7 મુસાફરોએ પોતાના જીવ ગુમાવ્યા છે. મળતી માહિતી મુજબ, ભિખિયાસૈણ તાલુકા હેઠળના વિનાયક પાસે સૈલાપાણી નજીક એક પેસેન્જર બસ અચાનક અનિયંત્રિત થઈને ઊંડી ખાઈમાં ખાબકી હતી. આ બસ રામનગર તરફ જઈ રહી હતી ત્યારે આ દુર્ઘટના ઘટી હતી. અકસ્માત એટલો ભયાનક હતો કે 6 મુસાફરોએ ઘટનાસ્થળે જ દમ તોડી દીધો હતો, જ્યારે એક ગંભીર રીતે ઈજાગ્રસ્ત મહિલાનું હોસ્પિટલમાં સારવાર દરમિયાન મોત નિપજતા કુલ મૃત્યુઆંક 7 પર પહોંચ્યો છે. આ અકસ્માતને પગલે સમગ્ર પંથકમાં અરેરાટી વ્યાપી ગઈ છે.
મૃતકોની ઓળખ કરવાની તજવીજ હાથ ધરી
આ દુર્ઘટનાની જાણ થતાં જ પોલીસ, વહીવટીતંત્ર અને ડિઝાસ્ટર મેનેજમેન્ટની ટીમો તાત્કાલિક ઘટનાસ્થળે પહોંચી ગઈ હતી. સ્થાનિક લોકોની મદદથી યુદ્ધના ધોરણે બચાવ કામગીરી શરૂ કરવામાં આવી હતી. જોકે, ખાઈ અત્યંત ઊંડી હોવાને કારણે રેસ્ક્યુ ઓપરેશનમાં ભારે મુશ્કેલીઓનો સામનો કરવો પડ્યો હતો. આ અકસ્માતમાં ઈજાગ્રસ્ત થયેલા મુસાફરોને તાત્કાલિક નજીકના આરોગ્ય કેન્દ્રોમાં ખસેડવામાં આવ્યા છે, જ્યારે ગંભીર રીતે ઈજાગ્રસ્તોને વધુ સારવાર માટે હાયર સેન્ટર રિફર કરવામાં આવ્યા છે. વહીવટીતંત્ર દ્વારા અત્યારે મૃતકોની ઓળખ કરવાની તજવીજ હાથ ધરવામાં આવી રહી છે.
બસ માલિકનું નામ મોહમ્મદ અલ્તાફ
અકસ્માતનો ભોગ બનેલી આ બસ કુમાઉ મોટર ઓનર્સ યુનિયન લિમિટેડની હતી, જેનો નંબર UK 07 PA 4025 છે. આ બસ સોમવારે સવારે 11 વાગ્યે દ્વારાહાટ નોબાડા માટે રવાના થઈ હતી અને આજે સવારે 6:30 વાગ્યે નોબાડાથી પરત રામનગર જવા નીકળી હતી. સવારે અંદાજે 8 વાગ્યાની આસપાસ સૈલાપાણી બેન્ડ પાસે બસ ચાલકે કાબૂ ગુમાવતા આ અકસ્માત સર્જાયો હતો. પ્રાથમિક તપાસમાં બસ માલિકનું નામ મોહમ્મદ અલ્તાફ હોવાનું જાણવા મળ્યું છે અને બસના ડ્રાઈવર-કંડક્ટર સુરક્ષિત હોવાનું કહેવાય છે.
અકસ્માત પર ઊંડો શોક વ્યક્ત કર્યો
સ્થાનિક પ્રશાસને આ અકસ્માત પર ઊંડો શોક વ્યક્ત કર્યો છે અને અસરગ્રસ્તોને શક્ય તમામ મદદની ખાતરી આપી છે. અકસ્માતના ચોક્કસ કારણો જાણવા તપાસના આદેશ આપવામાં આવ્યા છે, જોકે, પ્રાથમિક દ્રષ્ટિએ રસ્તાની ખરાબ હાલત અથવા ચાલકની બેદરકારીને કારણે આ હોનારત સર્જાઈ હોવાની આશંકા છે. આ અકસ્માતને કારણે અનેક પરિવારોએ પોતાના સ્વજનો ગુમાવ્યા છે, જેનાથી પહાડી વિસ્તારમાં શોકનું મોજું ફરી વળ્યું છે.

અલ્મોડામાં અકસ્માત

અલ્મોડામાં ભિખિયાસૈણ પાસે 1 પેસેન્જર બસ ખાઈમાં પડવાથી 7 લોકોના મોત થયા અને અનેક ઈજાગ્રસ્ત

December 30, 2025 | 17:14 IST