દિલ્હી-મુંબઈ એક્સપ્રેસ વે કાર ખાઈમાં પડતાં 5ના મોત

શુક્રવારે સવારે 8 વાગ્યે મધ્યપ્રદેશના રતલામ જિલ્લામાં દિલ્હી-મુંબઈ એક્સપ્રેસ વે પર એક દુર્ઘટના થઈ હતી. રાવટીથી 10 કિલોમીટર દૂર ભીમપુરા ગામ પાસે, માહી નદીના પુલ પહેલા, MH 03 EL 1388 નંબરની એક તેજ રફતાર SUV કાર અચાનક અનિયંત્રિત થઈ ગઈ અને રોડની રેલિંગ તોડીને એક ઊંડી ખાઈમાં જઈને પડી ગઈ હતી. આ અકસ્માત એટલો ગંભીર હતો કે, કારમાં સવાર 5 લોકોના ઘટનાસ્થળે જ મોત થયા હતા. મૃતકોમાં 15 વર્ષના એક બાળકનો પણ સમાવેશ થાય છે. 

પોલીસ અને હાઈવે પેટ્રોલિંગની ટીમ પહોંચી ઘટનાસ્થળે

પ્રારંભિક માહિતી મુજબ, આ કાર દિલ્હીથી મુંબઈ તરફ જઈ રહી હતી અને કારમાં સવાર લોકો મુંબઈ અને અમદાવાદના રહેવાસી હોવાનું જાણવા મળ્યું છે, જોકે મૃતકોની સંપૂર્ણ ઓળખ અને તેમના સ્વજનોને સૂચના આપવાની પ્રક્રિયા ચાલી રહી છે. અકસ્માતની જાણ થતાં જ પોલીસ અને હાઈવે પેટ્રોલિંગની ટીમ તુરંત ઘટનાસ્થળે પહોંચી અને રાહત કાર્ય શરૂ કર્યું. કારનો અકસ્માતમાં સંપૂર્ણપણે કચ્ચરઘાણ નીકળી ગયો હતો. પોલીસે ભારે જહેમત બાદ તમામ મૃતદેહોને બહાર કાઢ્યા અને પોસ્ટમોર્ટમ માટે રતલામ મેડિકલ કોલેજ મોકલ્યા હતા.

આ પણ વાંચો: પુણે જેજુરી-મોરગાંવ રોડ પર ભયાનક અકસ્માત

અકસ્માતનું કારણ કારની વધુ ઝડપ

રાવટીના થાણા પ્રભારી સુરેન્દ્ર સિંહ ગડરિયાના જણાવ્યા મુજબ, પ્રાથમિક તપાસમાં અકસ્માતનું કારણ કારની અતિ ઝડપ હોવાની આશંકા છે. તેમણે ઉમેર્યું કે, આ એક્સપ્રેસ-વેના આ ભાગમાં કેટલાક વાહનો વળાંક પર નિયંત્રણ ગુમાવી ચૂક્યા છે, જેના કારણે ટ્રાફિક સુરક્ષા પર વધુ ધ્યાન આપવાની જરૂર છે. પોલીસ અકસ્માતના ચોક્કસ કારણની તપાસ કરી રહી છે અને પોસ્ટમોર્ટમ રિપોર્ટ બાદ વિગતવાર માહિતી જાહેર કરાશે. દિલ્હી-મુંબઈ એક્સપ્રેસ વે દેશના સૌથી આધુનિક હાઈવે પૈકીનો એક હોવા છતાં, તેના પર સતત અકસ્માતોના સમાચાર સામે આવી રહ્યા છે.