TMC સાંસદ પર ઈ-સિગારેટનો આરોપ

સંસદના શિયાળુ સત્રના નવમા દિવસે લોકસભામાં ફરી એકવાર હોબાળો મચી ગયો. ભાજપ સાંસદ અનુરાગ ઠાકુરે તૃણમૂલ કોંગ્રેસ (TMC)ના સાંસદો પર ગંભીર આરોપ લગાવ્યો કે તેઓ સદનમાં બેસીને ઈ-સિગારેટ (વેપ) પી રહ્યા છે. અનુરાગ ઠાકુરે કોઈ નામ લીધા વિના સ્પીકર ઓમ બિરલાને પૂછ્યું કે, દેશમાં ઈ-સિગારેટ પર પ્રતિબંધ હોવા છતાં શું સદનમાં તેને મંજૂરી આપવામાં આવી છે?

 

અનુરાગ ઠાકુરે કહ્યું, “સર, દેશભરમાં ઈ-સિગારેટ પર પ્રતિબંધ છે. શું તમે સદનમાં તેને મંજૂરી આપી છે? TMCના સાંસદો ઘણા દિવસથી સતત બેસીને ઈ-સિગારેટ પી રહ્યા છે. તમે ચકાસણી કરાવો સર.”

સ્પીકર ઓમ બિરલાએ તુરંત જવાબ આપતાં કહ્યું, “ના, સદનમાં કોઈપણ પ્રકારની સિગારેટ કે ઈ-સિગારેટની મંજૂરી નથી. તમામ સાંસદોએ નિયમોનું પાલન કરવું જોઈએ. જો આવી કોઈ ફરિયાદ આવશે તો નિશ્ચિતરૂપે કાર્યવાહી કરવામાં આવશે.”

આ આરોપથી સદનમાં ટૂંકો હોબાળો મચી ગયો. TMC સાંસદોએ પલટવાર કર્યો અને ભાજપ સાંસદોએ પણ આક્ષેપોનું સમર્થન કર્યું. કેટલાક અહેવાલોમાં એવું પણ જણાવાયું છે કે અનુરાગ ઠાકુરે TMCની મહિલા સાંસદો તરફ ઇશારો કર્યો હતો.

નોંધનીય છે કે, ભારતમાં ૨૦૧૯માં પાસ કરાયેલા કાયદા હેઠળ ઈ-સિગારેટનું ઉત્પાદન, વેચાણ, આયાત, નિકાસ, જાહેરાત અને વપરાશ પર સંપૂર્ણ પ્રતિબંધ છે. આનું ઉલ્લંઘન કરનારને દંડ અને જેલની સજા થઈ શકે છે.

આ ઘટના ચૂંટણી સુધારા અને SIR જેવા મુદ્દાઓ પર ચાલી રહેલી તીવ્ર ચર્ચાની વચ્ચે બની, જેના કારણે સદનનું વાતાવરણ વધુ ગરમાયું.