વિદેશમાં નોકરીની લાલચ આપીને માનવ તસ્કરીનો શિકાર બનેલા 27 ભારતીય યુવાનોને સહીસલામત સ્વદેશ પરત ફર્યા છે. મ્યાનમારના સરહદી વિસ્તારોમાં સાયબર ક્રાઈમ અને ગેરકાયદેસર પ્રવૃત્તિઓ કરવા માટે મજબૂર કરાયેલા આ યુવાનોને ભારત સરકારના વિદેશ મંત્રાલય અને મ્યાનમાર સ્થિત ભારતીય દૂતાવાસના સંયુક્ત પ્રયાસોથી બચાવી લેવામાં આવ્યા છે. આ ગ્રુપમાં મોટાભાગના યુવાનો આંધ્રપ્રદેશ અને તેલંગાણાના હોવાનું સામે આવ્યું છે.
ઘટનાની વિગતો મુજબ, આ યુવાનોને એજન્ટો દ્વારા થાઈલેન્ડમાં આકર્ષક નોકરીની લાલચ આપી બોલાવવામાં આવ્યા હતા. જોકે, ત્યાં પહોંચતા જ તેમના પાસપોર્ટ છીનવી લેવાયા હતા અને તેમને ગેરકાયદેસર રીતે મ્યાનમારની સરહદમાં મોકલી દેવાયા હતા. ત્યાં તેમને હથિયારોના જોરે સાયબર છેતરપિંડીના નેટવર્કમાં કામ કરવા મજબૂર કરાયા હતા. યુનિયન મિનિસ્ટર રામ મોહન નાયડુએ આ મામલે વિદેશ મંત્રી એસ. જયશંકરને પત્ર લખીને તાત્કાલિક હસ્તક્ષેપની માંગ કરી હતી, ત્યારબાદ આ સફળ રેસ્ક્યુ ઓપરેશન પાર પાડવામાં આવ્યું હતું.
મ્યાનમારના જે વિસ્તારોમાં આ યુવાનો ફસાયા હતા, ત્યાં સુરક્ષાની સ્થિતિ અત્યંત જટિલ હતી કારણ કે તે વિસ્તારો પર સ્થાનિક સશસ્ત્ર જૂથોનું વર્ચસ્વ છે. વિદેશ મંત્રાલયે યંગૂન સ્થિત ભારતીય દૂતાવાસ અને ભાગીદાર એજન્સીઓ સાથે સતત સંકલન સાધીને આ યુવાનોને દિલ્હી પહોંચાડ્યા છે.
હવે તપાસ એજન્સીઓ આ આંતરરાષ્ટ્રીય હ્યુમન ટ્રાફિકિંગ નેટવર્ક પાછળના એજન્ટોને પકડવા પર ધ્યાન કેન્દ્રિત કરી રહી છે. સરકારે ફરી એકવાર નોકરી શોધનારા યુવાનોને અનવેરિફાઇડ એજન્ટોથી સાવધ રહેવાની સલાહ આપી છે. માનવ તસ્કરી

વિદેશમાં નોકરીની લાલચ ભારે, 27નું રેસ્ક્યુ

એજન્ટોએ નોકરીની લાલચ આપી સાયબર ફ્રોડમાં ધકેલ્યા હતા; માનવ તસ્કરીના નેટવર્કનો પર્દાફાશ.

January 13, 2026 | 17:54 IST