મહારાષ્ટ્રના પાલઘરમાં ફ્લાયઓવર પરથી ટેન્કર પડ્યું

મુંબઈ-અમદાવાદ નેશનલ હાઈવે પર કેરોસીન ભરેલું એક ટેન્કર ફ્લાયઓવર પરથી પડી ગયું. જેના કારણે ટ્રકમાં આગ લાગી હતી. રવિવારે સાંજે લગભગ 5 વાગ્યે પાલઘરના મનોર વિસ્તારમાં મસાણ નાકા પાસે આ અકસ્માત સર્જાયો હતો.

અકસ્માત પછી, રસ્તા પર અંધાધૂંધી મચી ગઈ, અને લોકો પોતાનો જીવ બચાવવા માટે આમ-તેમ દોડવા લાગ્યા. આ સમગ્ર ઘટના નજીકમાં લગાવેલા કેમેરામાં કેદ થઈ ગઈ હતી. ઘટનાની માહિતી મળતા જ પોલીસ અને ફાયર બ્રિગેડની ટીમો તાત્કાલિક ઘટનાસ્થળે પહોંચી ગઈ હતી.

 

ઘટનાસ્થળે હાજર લોકોના જણાવ્યા મુજબ, ડ્રાઈવરે ટેન્કર પરનો કાબુ ગુમાવ્યો હતો, જેના કારણે બેકાબુ ટેન્કર ફ્લાયઓવરની બાજુમાં અથડાયું હતું અને વીસ ફૂટની ઊંચાઈથી સીધું પુલ નીચે સર્વિસ રોડ પર પડ્યું હતું અને ટેન્કરમાં તરત જ આગ લાગી ગઈ હતી.

ઘટનાસ્થળે હાજર લોકોએ તાત્કાલિક પોલીસને અકસ્માતની જાણ કરી. જે બાદ અધિકારીઓ તાત્કાલિક ઘટનાસ્થળે પહોંચી ગયા. અકસ્માતને કારણે હાઇવે 2 કલાક સુધી બંધ રહ્યો હતો. આ પછી હાઇવે ફરીથી ખોલવામાં આવ્યો.

અધિકારીઓનું કહેવું છે કે અકસ્માતની હાલમાં તપાસ ચાલી રહી છે. ટેન્કર ચાલકે કાબુ કેવી રીતે ગુમાવ્યો અને આગ કેવી રીતે લાગી તેની તપાસ કરવામાં આવી રહી છે.