સિક્કિમમાં નિર્માણાધીન ટનલ પર લેન્ડસ્લાઇડનો કહેર

Sikkim Tunnel Landslide: સિક્કિમના નામચી જિલ્લામાં આવેલી નિર્માણાધીન ટનલમાં ભારે વરસાદ બાદ થયેલા ભયંકર લેન્ડસ્લાઇડને કારણે દેશને હચમચાવી દેતી દુર્ઘટના સર્જાઈ છે.ટનલના પ્રવેશદ્વાર પર અચાનક વિશાળ કાટમાળ ધસી પડતાં અનેક મજૂરો અંદર જ ફસાઈ ગયા.અધિકારીઓના જણાવ્યા મુજબ અત્યાર સુધીમાં ઓછામાં ઓછા 7 મજૂરોના મોતની પુષ્ટિ થઈ છે, જ્યારે 20થી વધુ લોકો હજુ પણ ટનલની અંદર ફસાયેલા હોવાની આશંકા છે. બચાવ કામગીરી યુદ્ધના ધોરણે ચાલી રહી છે, પરંતુ કાટમાળ, સતત વરસાદ અને સંભવિત ગેસ લીકને કારણે કામગીરી અત્યંત પડકારજનક બની છે.

કેવી રીતે સર્જાઈ દુર્ઘટના?
પ્રાથમિક માહિતી અનુસાર સોમવારે બપોરે લગભગ 3:09 વાગ્યે તીસ્તા સ્ટેજ-6 હાઇડ્રોઇલેક્ટ્રિક પ્રોજેક્ટ હેઠળ બની રહેલી સમરડુંગ ટનલમાં અચાનક લેન્ડસ્લાઇડ થઈ હતી. આ પ્રોજેક્ટનું નિર્માણ પટેલ એન્જિનિયરિંગ દ્વારા કરવામાં આવી રહ્યું છે.લેન્ડસ્લાઇડને કારણે ટનલનો પ્રવેશ માર્ગ સંપૂર્ણપણે બંધ થઈ ગયો, જેના કારણે અંદર કામ કરી રહેલા મજૂરો બહાર નીકળી શક્યા નહીં. ત્યારબાદ ટનલમાં મિથેન ગેસ લીક શરૂ થતાં પરિસ્થિતિ વધુ ગંભીર બની ગઈ.

ટનલની દોઢ કિલોમીટર અંદર થયો બ્લાસ્ટ
અધિકારીઓના જણાવ્યા અનુસાર, ટનલની અંદર લગભગ 1.5 કિલોમીટરના અંતરે કુદરતી રીતે ખડકોમાંથી નીકળતો મિથેન ગેસ મોટા પ્રમાણમાં એકઠો થઈ ગયો હતો. જ્યારે આ ઝેરી ગેસને બહાર કાઢવાનો પ્રયાસ કરવામાં આવ્યો, ત્યારે અચાનક મોટો વિસ્ફોટ થયો હતો.
વિસ્ફોટના કારણે ટનલનો એક ભાગ ધસી પડ્યો અને લેન્ડસ્લાઇડ થતાં બહાર નીકળવાનો મુખ્ય રસ્તો સંપૂર્ણપણે બંધ થઈ ગયો. જે સમયે આ અકસ્માત થયો તે સમયે કેટલાક મજૂરો તુરંત બહાર ભાગવામાં સફળ રહ્યા હતા, પરંતુ 25 જેટલા વર્કર્સ અંદર જ અટવાઈ ગયા હતા.

અચાનક ધસી પડ્યો પહાડ
મળતી માહિતી અનુસાર આ ઘટના સોમવાર બપોરે નામચી જિલ્લાના સમરદુંગ વિસ્તારમાં બની હતી. ભારે વરસાદ વચ્ચે અચાનક ટનલના પ્રવેશદ્વાર નજીક ભૂસ્ખલન થયું અને મોટા પ્રમાણમાં માટી, પથ્થરો તથા કાટમાળ ટનલના મુખ પર આવી પડ્યો. પરિણામે અંદર કામ કરી રહેલા મજૂરો બહાર નીકળી શક્યા નહીં.પ્રાથમિક માહિતી પ્રમાણે ઘટનાના સમયે ટનલમાં અનેક મજૂરો કામ કરી રહ્યા હતા. કેટલાક મજૂરો સમયસર બહાર નીકળી ગયા, પરંતુ મોટી સંખ્યામાં કર્મચારીઓ અંદર જ ફસાઈ ગયા.

ઘણા કામદારો શ્વાસ લેવામાં તકલીફ અનુભવી રહ્યા છે
ઘટનાની માહિતી મળતાં, NDRF, SDRF, જિલ્લા પોલીસ અને ફાયર બ્રિગેડની ટીમો ઘટનાસ્થળે પહોંચી હતી. જોકે, સુરંગની અંદર ઝેરી ગેસ, ઓક્સિજનનો અભાવ અને અત્યંત ઓછી દૃશ્યતાને કારણે બચાવ કામગીરીમાં નોંધપાત્ર મુશ્કેલીઓનો સામનો કરવો પડી રહ્યો છે. શરૂઆતના બચાવ દરમિયાન ફાયર બ્રિગેડના ઘણા કર્મચારીઓને શ્વાસ લેવામાં તકલીફ પડી, જેના કારણે કામગીરી અટકાવવામાં આવી. જોકે, ફાયર બ્રિગેડ અને NDRF ટીમો દ્વારા બચાવ કામગીરી ચાલુ છે.

બંગાળની સ્પેશિયલ ટીમ બોલાવાઈ
અંધારું, સાંકડો રસ્તો અને ઓક્સિજન વગર NDRFની પ્રાથમિક ટીમ પણ આગળ વધી શકી નહોતી. પરિસ્થિતિની ગંભીરતાને જોતાં, સ્થિતિ પર કાબૂ મેળવવા માટે પડોશી રાજ્ય પશ્ચિમ બંગાળથી ખાસ ગેસ-પ્રોટેક્ટિવ ઈક્વિપમેન્ટ ધરાવતી નિષ્ણાત ટીમોને તાત્કાલિક બોલાવવામાં આવી છે.આ ઉપરાંત પાક્યોંગ અને સિલિગુડી સ્થિત NDRFની બીજી બટાલિયનના વધારાના જવાનોને પણ કામગીરીમાં જોડવામાં આવ્યા છે.

મૃત્યુઆંક વધવાની આશંકા
અત્યાર સુધીમાં 7 મૃતદેહો બહાર કાઢવામાં આવ્યા છે. અધિકારીઓનું કહેવું છે કે કાટમાળ દૂર થયા બાદ વધુ લોકો મળી શકે છે, તેથી મૃત્યુઆંક વધવાની પણ શક્યતા નકારી શકાય તેમ નથી.રેસ્ક્યૂ ઓપરેશન દરમિયાન સૌથી મોટી મુશ્કેલી ટનલની અંદર સંભવિત ગેસની હાજરી બની છે. ભૂસ્ખલન બાદ ટનલમાં કુદરતી રીતે ગેસ એકત્રિત થયો હોવાની શંકા વ્યક્ત કરવામાં આવી છે.બચાવ માટે અંદર પ્રવેશેલા કેટલાક રેસ્ક્યૂ વર્કર્સને ચક્કર આવવા લાગ્યા અને તેઓ બેભાન થઈ ગયા હતા. ત્યારબાદ ગેસ માસ્ક અને વિશેષ સુરક્ષા સાધનો સાથે ટીમોને અંદર મોકલવામાં આવી રહી છે.

યુદ્ધના ધોરણે રાહત અને બચાવ કામગીરી
બચાવ કામગીરીને ઝડપી બનાવવા માટે પશ્ચિમ બંગાળથી ખાસ ગેસ-સુરક્ષા ઉપકરણોથી સજ્જ એક ટીમ બોલાવવામાં આવી છે. સ્થળ પર એમ્બ્યુલન્સ તૈનાત કરવામાં આવી છે અને ગેસ માસ્ક અને સલામતી સાધનોથી સજ્જ બચાવ ટીમો સતત કામદારો સુધી પહોંચવાનો પ્રયાસ કરી રહી છે. જિલ્લા વહીવટીતંત્રના જણાવ્યા અનુસાર, સુરંગમાં ઝેરી મિથેન ગેસ, સાંકડા માર્ગો અને ઓછી દૃશ્યતા બચાવ કામગીરીને અત્યંત પડકારજનક બનાવી રહી છે. હાલમાં બધી એજન્સીઓ યુદ્ધના ધોરણે રાહત અને બચાવ કામગીરીમાં રોકાયેલી છે.