શ્રીરામ મંદિર દાન વિવાદઃ મામલો હવે સુપ્રીમકોર્ટમાં

સુપ્રીમ કોર્ટ સુધી પહોંચ્યો દાન વિવાદ
અયોધ્યાના શ્રી રામ જન્મભૂમિ મંદિરમાં દાન અને પ્રસાદની રકમમાં ગેરરીતિના આરોપો હવે સુપ્રીમ કોર્ટ સુધી પહોંચી ગયા છે. એડવોકેટ અનુપ અવસ્થી દ્વારા મુખ્ય ન્યાયાધીશ (CJI) પાસે સ્વતંત્ર તપાસની માંગ કરવામાં આવી છે. અરજીમાં FIR નોંધવા અને કોર્ટની દેખરેખ હેઠળ તપાસ કરાવવા માંગ કરવામાં આવી છે. મુખ્ય ન્યાયાધીશ સૂર્યકાંતે વકીલોને અપીલ કરી છે કે, તેઓ કોર્ટમાં મૌખિક ઉલ્લેખ ન કરે અને તમામ રજૂઆતો લેખિતમાં આપે. તેમણે સ્પષ્ટ કર્યું કે કોર્ટ તમામ મુદ્દાઓનું મૂલ્યાંકન કરીને યોગ્ય કેસોને જ યાદીમાં સમાવશે.

ઉત્તરપ્રદેશ સરકાર દ્વારા SITની રચના
ઉત્તર પ્રદેશ સરકારે રામ મંદિર ટ્રસ્ટના નાણાકીય સંચાલન અને દાનની રકમ સંબંધિત આરોપોની તપાસ માટે 3 સભ્યોની વિશેષ તપાસ ટીમ (SIT) ની રચના કરી છે. અધિકારીઓના જણાવ્યા અનુસાર, શ્રી રામ જન્મભૂમિ તીર્થ ક્ષેત્ર ટ્રસ્ટની વિનંતી બાદ સીએમ યોગી આદિત્યનાથના નિર્દેશ પર SIT ટીમની રચના કરવામાં આવી હતી. આ ટીમ યાત્રાધામ વિસ્તારમાં દાન પેટીઓ અંગે થઈ રહેલા આક્ષેપોની તપાસ કરશે અને તેનો અહેવાલ સરકારને સુપરત કરશે.
SIT ટીમમાં IAS અધિકારી, લખનૌ વિભાગીય કમિશનર વિજય વિશ્વાસ પંત, ભારતીય પોલીસ સેવા (IPS) અધિકારી અને પોલીસ મહાનિરીક્ષક કિરણ એસ. અને નીલ રતનને નાણાં વિભાગના વિશેષ સચિવનો સમાવેશ કરવામાં આવ્યો છે. નિવેદનમાં કહેવામાં આવ્યું છે કે દાન પેટીઓ અંગે સોશિયલ મીડિયા પર ફેલાતી અફવાઓને ગંભીરતાથી લેતા ટ્રસ્ટે સીએમ યોગીને આ મામલાની નિષ્પક્ષ તપાસ માટે વિશેષ તપાસ ટીમની રચના કરવા વિનંતી કરી હતી.

હું માત્ર બાંધકામનું કામ જ જોઉં છુંઃ નૃપેન્દ્ર મિશ્રા
બીજી તરફ દાન કૌભાંડને લઈને વધી રહેલા વિવાદ વચ્ચે રામ મંદિર નિર્માણ સમિતિના વડા નૃપેન્દ્ર મિશ્રાએ કહ્યું કે તેમની ભૂમિકા માત્ર બાંધકામના કામની દેખરેખ સુધી મર્યાદિત છે. મંદિર માટે મળેલા દાનના દુરુપયોગ અને ભંડોળના દુરુપયોગના આરોપો પર ટિપ્પણી કરવાનો તેમણે ઇનકાર કર્યો હતો.

નૃપેન્દ્ર મિશ્રાએ કહ્યું હતું કે તેમની જવાબદારી માત્ર બાંધકામના કામો પર નજર રાખવાની છે. તેમણે કહ્યું કે તેઓ અયોધ્યામાં બાંધકામ સંબંધિત કામોની સમીક્ષા કરવા આવ્યા હતા. તેમણે કહ્યું કે બેઠકમાં ઘણા બાંધકામ પ્રોજેક્ટ પર ચર્ચા કરવામાં આવશે. મંદિરમાં કથિત દાન કૌભાંડ અંગે તેમણે કહ્યું હતું કે, "હું માત્ર બાંધકામનું કામ જોઉં છું, બીજું કંઈ નથી."

અખિલેશ યાદવના આરોપોથી રાજકીય ગરમાવો
સમાજવાદી પાર્ટી અધ્યક્ષ અખિલેશ યાદવે રામ મંદિરમાં દાનની રકમમાં ગેરરીતિના આરોપો લગાવ્યા છે. તેમના નિવેદન બાદ રાજકીય માહોલ ગરમાયો છે અને આ મુદ્દો સતત ચર્ચામાં રહ્યો છે.

રામ મંદિરમાંથી 200 કરોડના ચઢાવાની ચોરી?
અયોધ્યાના રામ મંદિરના દાનપાત્રોમાંથી ચઢાવાની ચોરીએ સૌને ચોંકાવી દીધા છે. શરૂઆતમાં ચોરીનો આંકડો 200 કરોડ રૂપિયાથી વધુનો હોવાની ચર્ચા હતી. નોટોની ગણતરી સાથે સંકળાયેલા લગભગ 50 કર્મચારીઓ શંકાના ઘેરામાં છે. પોલીસે અને તપાસ એજન્સીઓએ અત્યાર સુધીમાં 5 કર્મચારીઓ પાસેથી લગભગ 2 કરોડ રૂપિયાની રોકડ, એક કાર અને 3 આઈફોન જપ્ત કર્યા છે.

ચાર દિવસ પહેલા દિલ્હીથી એક IPS અધિકારી અયોધ્યા પહોંચ્યા. તેમને એક વિશેષ વિમાન લઈને આવ્યું હતું. તેઓ પણ શ્રીરામ જન્મભૂમિ પરિસરમાં ટ્રસ્ટના પદાધિકારીઓ સાથે વાતચીત કરીને રિપોર્ટ તૈયાર કરી રહ્યા છે. તે જ સમયે તપાસ માટે શાસને એક વિશેષ તપાસ સમિતિ (SIT)ની રચના કરી છે. SIT 15 દિવસમાં પોતાનો રિપોર્ટ આપશે.

રામલલ્લાના ગર્ભગૃહ અને દર્શન પથ પાસે રાખેલા દાનપાત્રોમાંથી જે પણ રોકડ કાઢવામાં આવે છે, તેને રામ જન્મભૂમિ પરિસરની અંદર જ બનેલા એક 'ગુપ્ત રૂમ'માં લઈ જવામાં આવે છે. સુરક્ષા કારણોસર રૂમની ચોક્કસ સ્થિતિને અત્યંત ગુપ્ત રાખવામાં આવે છે. આ રૂમમાં બહારના લોકોનો પ્રવેશ સંપૂર્ણપણે વર્જિત હોય છે. ચઢાવાની ગણતરી માટે 50 કર્મચારીઓની હાજરી આ રૂમમાં રહેતી હતી.

ત્રણ પ્રકારના કર્મચારીઓ હોય છે. 24 કર્મચારી નોટ ગણીને બંડલ બનાવે છે. આ કર્મચારીઓને ટ્રસ્ટે પ્રાઈવેટ એજન્સી દ્વારા રાખ્યા છે. 12 કર્મચારી ટ્રસ્ટના છે. જે 24 કર્મચારીઓ પર નજર રાખે છે. એટલે કે 1 કર્મચારીના ભાગે દેખરેખ માટે 2 કર્મચારી હતા. 14 કર્મચારી SBIના કર્મચારીઓ અને TCSની ઓડિટ ટીમના સભ્યો હોય છે. એજન્સી દ્વારા રાખવામાં આવેલા મોટાભાગના કર્મચારીઓને દર મહિને 14,500 રૂપિયા પગાર મળે છે.

ટ્રસ્ટ સાથે જોડાયેલા કેટલાક કર્મચારીઓ એવા છે. જેઓ પગાર વિના સેવા આપે છે. સમગ્ર મામલાની શરૂઆત ત્યારે થઈ જ્યારે આ કર્મચારીઓમાં સામેલ અનુકલ્પ મિશ્રા, લવકુશ, રાજેશ પાઠક, રામશંકર ઉર્ફે ટિન્નુ યાદવ, કેડી તિવારી, મનીષ યાદવ, કરુણ, રિતિક સિંહ, શ્રીવાસ્તવ અને મૌર્ય છેલ્લા 5 વર્ષમાં કરોડપતિ બની ગયા. તેમની જીવનશૈલી બદલાઈ ગઈ. મોંઘી ગાડીઓ અને જમીનો ખરીદી લીધી. જે કર્મચારીઓ માત્ર પગાર પર ગુજરાન ચલાવી રહ્યા હતાં. આ લોકો તેમના નિશાના પર આવી ગયા.

જ્યારે મંદિર પ્રશાસનમાં તેમની સુનાવણી ન થઈ ત્યારે રામકોટ મોહલ્લાના એક કર્મચારીએ ચોરીની ચર્ચાને સાર્વજનિક કરી દીધી. આ વાત અયોધ્યાની ગલીઓમાંથી પસાર થઈને અખિલેશ યાદવ સુધી પહોંચી ગઈ. હવે સમગ્ર દેશમાં ચર્ચાનો વિષય બની ગયો છે.

ટિન્નુ યાદવ: ચંપત રાયના સહયોગીની 50 કરોડની સંપત્તિ
શ્રી રામ મંદિર ટ્રસ્ટના મહાસચિવ ચંપત રાયના સહયોગી રામશંકર યાદવ ઉર્ફે ટિન્નુની અયોધ્યા અને લખનઉમાં લગભગ 50 કરોડ રૂપિયાની ચલ-અચલ સંપત્તિઓ સામે આવી છે. ટિન્નુ અયોધ્યામાં ઓટો ચલાવતો હતો. તે પોતે એક મોટરસાયકલ પર ફરતો હતો. તેનું પૈતૃક મકાન રામ મંદિરથી 1.5 કિમી દૂર સ્વર્ગદ્વાર વિસ્તારમાં છે. જ્યાં હાલ તેના ભાઈઓ રહે છે. અહીં વાતચીતમાં સામે આવ્યું કે ટિન્નુની એરપોર્ટ પાસે હોસ્ટેલ છે. જેમાં 70 રૂમ છે. અયોધ્યાના અલગ-અલગ 3 રેસ્ટોરન્ટમાં તેની ભાગીદારી છે. લખનઉમાં એક મકાન છે. એક ફોર્ચ્યુનર કાર છે. નાકા વિસ્તારમાં પણ 2 માળનું મકાન છે, જેમાં હોસ્ટેલ બનાવવામાં આવી છે. ટિન્નુની મંદિર પરિસરના PCF યાત્રી સુવિધા કેન્દ્રમાં પૂછપરછ કરવામાં આવી છે.

ટિન્નુ યાદવના ભત્રીજા પાસેથી 36 લાખ રોકડા મળ્યા
શ્રી રામ જન્મભૂમિ પરિસરની અંદર પોતાના પ્રભાવનો ઉપયોગ કરીને ટિન્નુ યાદવે ભત્રીજા મનીષ યાદવની નિમણૂક કરાવી દીધી. તે પણ રૂપિયાની ગણતરીના કામ સાથે જોડાયેલો હતો. મનીષ સ્વર્ગદ્વાર વિસ્તારના પૈતૃક ઘરમાં રહે છે. ચોરી ખુલ્લી પડ્યા પછી મનીષને પણ મંદિર પરિસરના જ PCF યાત્રી સુવિધા કેન્દ્રમાં રાખવામાં આવ્યો છે. ચર્ચા છે કે તેણે બતાવેલી જગ્યાએથી 36 લાખ રૂપિયા રોકડા મળ્યા છે.

કેડી તિવારી: દાનમાં આવેલા સોનાના ઘરેણાં સંભાળવાની જવાબદારી
શ્રી રામ મંદિરમાં દાનમાં ચઢાવવામાં આવતા સોના-ચાંદીના ઘરેણાં સંભાળવાની જવાબદારી કે.ડી. તિવારીની છે. તેઓ પણ શંકાના ઘેરામાં છે. PCF યાત્રી સુવિધા કેન્દ્રમાં ટ્રસ્ટના સભ્યોના સવાલોના જવાબ આપી ચૂક્યા છે. તેમણે 1.5 કરોડ રૂપિયાની જમીન ખરીદી છે. કે.ડી. તિવારીએ 5 કરોડ રૂપિયાની સંપત્તિ પણ એકઠી કરી છે.

તેઓ અયોધ્યાના ગૌરન કા પુરવા ગામના રહેવાસી છે. આ મામલે તેઓ કહે છે કે, મારી જવાબદારી મંદિર પરિસરમાં શ્રદ્ધાળુઓ દ્વારા દાન કરાયેલા સોના-ચાંદીના ઘરેણાંનું વજન કરીને દાતાને રસીદ આપવાની હતી. પછી તે ઘરેણાંને ટ્રસ્ટના જવાબદાર અધિકારીઓ સુધી સુરક્ષિત રીતે પહોંચાડી દેતો હતો. આગળ ઘરેણાં સાથે કઈ પ્રક્રિયા અપનાવવામાં આવે છે, તેની મને કોઈ જાણકારી નથી.

તેમણે કહ્યું કે, હું વિદ્યા ભારતીના સરસ્વતી શિશુ મંદિરમાં ઘણા જિલ્લાઓમાં શિક્ષક રહ્યો છું. મારો મોટો દીકરો ભારતીય વાયુસેનામાં અધિકારી પદ પરથી નિવૃત્ત થયા પછી હાલમાં ઇન્ટેલિજન્સ બ્યુરો (IB) માં છે. બીજો દીકરો સેનામાંથી નિવૃત્ત થઈને યુપી પોલીસમાં સબ-ઇન્સ્પેક્ટર છે. સૌથી નાનો દીકરો મિલ્કીપુરમાં કમ્પ્યુટર ઓપરેટર છે. જ્યારે દીકરી શિક્ષિકા છે. મારી પાસે જે કંઈ છે તે પરિવારનું છે.

રાજેશ પાઠક: 5 થી 6 વર્ષમાં રાજેશની જીવનશૈલી બદલાઈ
અયોધ્યાના ખાલે પુરવામાં રહેતા રાજેશ પાઠક પર પણ શંકા છે. રાજેશ નોટોની ગણતરી કરનારા કર્મચારીઓમાં સામેલ છે. તેઓ પણ મંદિર પરિસરના એક રૂમમાં રાખવામાં આવ્યા છે. તપાસમાં જોડાયેલા ટ્રસ્ટ કર્મચારીઓએ તેમને સવાલો પૂછ્યા છે. રાજેશની પાછલા 5-6 વર્ષોમાં બદલાયેલી જીવનશૈલી તપાસના ઘેરામાં છે. તેમની પાસેથી શું રિકવર થયું? કુલ કેટલા રૂપિયાની સંપત્તિઓ સામે આવી? તે હજુ સામે આવ્યું નથી.

અનુકલ્પ મિશ્રા: ગામમાં ફાર્મ હાઉસ, અયોધ્યામાં 65 લાખનું ઘર ખરીદ્યું
શ્રી રામ મંદિરના ચઢાવાની ચોરીમાં લવકુશ નામનો વ્યક્તિ પણ આરોપી છે. તેનો સાળો અનુકલ્પ મિશ્રા પણ નોટ ગણતી ટીમનો ભાગ હતો. સૂત્રો અનુસાર, કૌશલપુરીમાં માનસ ડેન્ટલ હોસ્પિટલ પાસે એક ઘર છે. આ ઘર પહેલા ભોજપુરી ગાયકનું હતું. તેને અનુકલ્પ મિશ્રાના પરિવારે 64 થી 65 લાખ રૂપિયામાં ખરીદ્યું હતું. ત્યારબાદ પરિવાર ત્યાં રહેવા લાગ્યો.

તે જ સમયે, અનુકલ્પના પૈતૃક ગામમાં તેના મકાનથી લગભગ 300 મીટરના અંતરે એક ફાર્મ હાઉસ પણ બનાવવામાં આવ્યું છે. આ જ જગ્યાએ 23 થી 30 એપ્રિલ, 2026 સુધી શ્રીમદ્ ભાગવત કથા થઈ હતી. અનુકલ્પે ભાગવત કથા અને લગ્નમાં પોતાના વૈભવનું પ્રદર્શન કરીને સાડીઓ વહેંચી હતી. તેના પિતા રવિન્દ્ર મિશ્રા પ્રોપર્ટી ડીલર છે. અનુકલ્પ પરિવાર સાથે અયોધ્યાના કૌશલપુરીમાં રહે છે.

લવકુશ: એક સમયે કાર મિકેનિક, મંદિરમાં નોકરી પછી ફૈઝાબાદમાં ઘર બનાવ્યું
લવકુશ પહેલા કાર મિકેનિક હતો. તે અયોધ્યાના રુદૌલી વિસ્તારના મીનાપુર ઠાકુરન ફગૌલી ગામનો રહેવાસી છે. મંદિરમાં નોકરી મળ્યા પછી તેની આર્થિક સ્થિતિ ઝડપથી બદલાઈ ગઈ હતી. ગામમાં આવતા તે ખૂબ પૈસા ખર્ચ કરતો હતો.

એકવાર તેણે ગામલોકોને દારૂ પીવડાવવા માટે કોન્ટ્રાક્ટ પર 50 હજાર રૂપિયા ખર્ચ કર્યા હતા. લવકુશના પિતા બચ્ચુલાલ ગાઝિયાબાદની લોહા મંડીમાં કામ કરે છે. ટ્રસ્ટના લોકો લવકુશના ઘરે પણ પહોંચ્યા હતા. કેટલાક રૂપિયા ઘરની કબાટ-બોક્સમાં રાખ્યા હતા, કેટલાક રૂપિયા તેણે છાણમાં દબાવીને છુપાવ્યા હતા. આ દરમિયાન 10 લાખ રૂપિયા મળી આવ્યા હતા. તેનું એક મકાન ફૈઝાબાદમાં બની રહ્યું છે.