Rapido ડ્રાઈવરે યુવતીની જાતીય સતામણી કરતા ઝડપાયો

બેંગલુરુમાં Rapidoના એક ડ્રાઇવર દ્વારા મહિલા મુસાફરની સતામણીનો વિડીયો સોશિયલ મીડિયા પર વાયરલ થયો હતો. ઘટના 6 નવેમ્બરના રોજ બની હતી અને મહિલાએ જાણે આ વિડીયો પોસ્ટ કર્યો હતો. ભોગ બનનાર યુવતીએ સોશિયલ મીડિયા પર તેની વિગતો પોસ્ટ કરી, ત્યારે આ મામલો લોકોના ધ્યાન પર આવ્યો. આજે, 9 નવેમ્બરે  સતામણીના આરોપસર ડ્રાઈવરની ધરપકડ કરવામાં આવી છે.

વાયરલ બાદ પોલીસ સક્રિય

સોશિયલ મીડિયા પર આ વાયરલ વિડીયો જોતા બેંગલુરુ પોલીસની વિડીયો  મોનિટરિંગ યુનિટે આ પોસ્ટ જોઈને તાત્કાલિક યુવતીનો સંપર્ક સાધ્યો હતો. યુવતી પાસેથી વધુ વિગતો મેળવ્યા બાદ બીજા જ દિવસે સત્તાવાર રીતે કેસ નોંધી વધુ તપાસ શરૂ કરવામાં આવી હતી.  

આરોપી ડ્રાઈવરની ઓળખ લોકેશ (ઉંમર 28), રહેવાસી મુનિયપ્પા લેઆઉટ, ઉલ્લાલ, બેંગલુરુ તરીકે થઈ છે. આ ઘટના ત્યારે બની જ્યારે યુવતી ચર્ચ સ્ટ્રીટ વિસ્તારમાંથી પોતાની PG હોસ્ટેલ તરફ જઈ રહી હતી.

'અચાનક મારા પગ પકડવાનો પ્રયાસ કર્યો': પીડિતા

યુવતીએ તેની સોશિયલ મીડિયા પોસ્ટમાં ઘટનાની વિગતો આપતા લખ્યું હતું કે, “રાઇડ દરમિયાન ડ્રાઇવરે અચાનક મારા પગ પકડવાનો પ્રયાસ કર્યો. આ એટલું અચાનક થયું કે હું કંઈ સમજી શકું કે રેકોર્ડ કરી શકું તે પહેલાં જ બની ગયું.”

જ્યારે ડ્રાઇવરે ફરીથી આવું કર્યું, ત્યારે યુવતીએ તેને રોકવાનો પ્રયાસ કર્યો અને કહ્યું: “ભૈયા, ક્યા કર રહે હો, મત કરો,” પરંતુ ડ્રાઇવર ન અટક્યો. યુવતીએ જણાવ્યું કે જ્યારે તે તેના સ્થાને પહોંચી ત્યારે તે ખૂબ રડી રહી હતી. સદભાગ્યે, ત્યાં હાજર એક વ્યક્તિએ તેની ગભરામણ જોઈ અને ડ્રાઇવરને પડકાર્યો હતો.

પીડિતાએ આ ઘટના શા માટે શેર કરી તે અંગે સ્પષ્ટતા કરતા જણાવ્યું કે, “કોઈ પણ મહિલાએ આવું સહન ન કરવું જોઈએ ન કેબમાં, ન બાઇક પર, કે ન બીજે ક્યાંય. આ પહેલીવાર નથી જ્યારે મારી સાથે આવું બન્યું હોય, પરંતુ આજે હું ચૂપ રહી શકી નહીં કારણ કે હું ખૂબ જ અસુરક્ષિત અનુભવી રહી હતી.” પોલીસે આરોપી ડ્રાઇવરની ધરપકડ કરીને કાયદેસરની કાર્યવાહી હાથ ધરી છે.