રામ મંદિર દાન ચોરી કેસમાં મોટો વળાંક
અયોધ્યાના શ્રીરામ જન્મભૂમિ મંદિર સાથે જોડાયેલા દાન ચોરીના કેસમાં નવો વળાંક આવ્યો છે. મંદિર ટ્રસ્ટના મહાસચિવ ચંપત રાયે પદ પરથી રાજીનામું આપી દીધુંછે. જ્યારે ટ્રસ્ટી ડૉ. અનિલ મિશ્રાએ પણ જવાબદારીમાંથી મુક્ત થવાનો નિર્ણય લીધો છે. બંનેએ પોતાનું રાજીનામું ટ્રસ્ટના પ્રમુખ મહંત નૃત્ય ગોપાલ દાસને સોંપ્યું હોવાનું જાણવા મળ્યું છે. ટ્રસ્ટના અન્ય સભ્યોએ પણ બંનેના રાજીનામાની માહિતી મળ્યાની પુષ્ટિ કરી છે. દાન ચોરીના કેસને લઈને ચાલી રહેલા વિવાદ વચ્ચે પડી રહેલાં રાજીનામા ટ્રસ્ટ માટે મહત્વપૂર્ણ માનવામાં આવી રહ્યા છે.

આઠ આરોપીઓની ધરપકડ
ચોરીના કેસમાં પોલીસે મંદિર વ્યવસ્થાપન સાથે સંકળાયેલા આઠ આરોપીઓની ધરપકડ કરી છે. ધરપકડ કરાયેલા લોકોમાં રમાશંકર યાદવ ઉર્ફે ટિન્નુ, લવકુશ મિશ્રા, અનુકલ્પ મિશ્રા, મનીષ યાદવ, અવિનાશ શુક્લા, કરુણેશ પાંડે, સુભાષ ચંદ્ર શ્રીવાસ્તવ અને રમાશંકર મિશ્રાનો સમાવેશ થાય છે. પોલીસ તેમને કોર્ટમાં રજૂ કરીને રિમાન્ડ મેળવવાની કાર્યવાહી હાથ ધરી રહી છે.

ચંપતરાય સામે FIR નહીં
FIRમાં ચંપત રાય, ડો. અનિલ મિશ્રા સહિત મોટા પદાધિકારીઓના નામ સામેલ નથી. ચોરીનો મામલો પ્રથમ વખત 7 જૂને સામે આવ્યો હતો. યુપી સરકારે 13 જૂને ટ્રસ્ટની વિનંતી પર SIT બનાવી હતી. SITએ 23 જૂને યુપીના એડિશનલ ચીફ સેક્રેટરી (ગૃહ) સંજય પ્રસાદને પ્રારંભિક રિપોર્ટ સોંપ્યો હતો. સંજય પ્રસાદ ટ્રસ્ટના હોદ્દેદાર સભ્ય પણ છે.

સમગ્ર મામલે શ્રીરામ જન્મભૂમિ તીર્થ ક્ષેત્ર ટ્રસ્ટના સભ્ય કૃષ્ણ મોહનની ફરિયાદના આધારે પ્રથમ FIR નોંધવામાં આવી હતી. બીજી તરફ SIT દ્વારા સમગ્ર મામલાની વિગતવાર તપાસ આગળ વધારવામાં આવી રહી છે. સૂત્રો દ્વારા જાણકારી મળી હતી કે SIT એ તપાસ રિપોર્ટમાં ચંપત રાય, ટ્રસ્ટી ડો. અનિલ મિશ્રા અને નિર્માણ પ્રભારી ગોપાલ રાવ સહિત 17 લોકોને આરોપી માન્યા હતા. તેમના વિરુદ્ધ FIR થવી લગભગ નિશ્ચિત મનાઈ રહી હતી.

SIT તપાસમાં અનેક મુદ્દા સામે આવ્યા
તપાસ દરમિયાન દાનપેટીની ચાવીઓ આરોપી ટિન્નુ પાસે હોવાની માહિતી સામે આવી છે. તપાસ એજન્સીએ દાન વ્યવસ્થાપન સાથે સંકળાયેલા અનેક કર્મચારીઓ અને સેવાભાવીઓની પણ પૂછપરછ શરૂ કરી છે. તેમની આવક અને સંપત્તિમાં થયેલા ફેરફારોની પણ ચકાસણી કરવામાં આવી રહી છે.

ચંપત રાય કોણ છે?
રામ મંદિર ટ્રસ્ટના મહાસચિવ ચંપત રાયને વર્ષ 1991માં પ્રાદેશિક સંગઠન સચિવ તરીકે અયોધ્યા મોકલવામાં આવ્યા. 1996માં તેમને વિશ્વ હિન્દુ પરિષદના કેન્દ્રીય મંત્રી તરીકે નિયુક્ત કરવામાં આવ્યા. 2002માં તેઓ સંયુક્ત મહામંત્રી અને ત્યારબાદ આંતરરાષ્ટ્રીય મહામંત્રી બન્યા. ચંપતરાયે પોતાને ભગવાન રામની સેવામાં એટલા સંપૂર્ણ રીતે સમર્પિત કરી દીધા કે તેમણે લગ્ન પણ કર્યા નહીં.

તેમણે પોતાનું સમગ્ર જીવન રામલલ્લાની સેવામાં સમર્પિત કર્યું. લોકો તેમને પ્રેમથી 'રામ લલ્લાના પટવારી' પણ કહે છે. ચંપત રાય બિજનોરના નગીના શહેરના સરાઈ-મીર વિસ્તારના રહેવાસી છે. તેમના પિતા રામેશ્વર રાષ્ટ્રીય સ્વયંસેવક સંઘ (RSS)ના સભ્ય હતા.

તેના કારણે ચંપત રાય RSSમાં જોડાયા. શિક્ષણ પૂર્ણ કર્યા પછી તેઓ ધામપુરની RSM ડિગ્રી કોલેજમાં કેમેસ્ટ્રીના પ્રોફેસર બન્યા. 1975માં ઈમરજન્સી દરમિયાન તેમણે 18 મહિના જેલમાં વિતાવ્યા. જેલમાંથી છુટ્યા પછી તેમણે નોકરી છોડી દીધી અને RSSના પ્રચારક બન્યા.

સરકારી કર્મચારીઓની તપાસ થાય તેવી શક્યતા
FIRમાં ભ્રષ્ટાચાર નિવારણ કાયદાની કલમોનો સમાવેશ કરવામાં આવ્યો હોવાથી દાનની ગણતરી અને બેંકમાં જમા કરાવવાની પ્રક્રિયામાં સામેલ સરકારી અધિકારીઓ તથા કર્મચારીઓની ભૂમિકાની પણ તપાસ થઈ રહી છે. તપાસના આધારે આગળ વધુ ધરપકડ અથવા કાયદાકીય કાર્યવાહી થઈ શકે છે. ચઢાવાની રકમની ગણતરી કરવામાં અને સ્ટેટ બેંક ઓફ ઈન્ડિયા (SBI) માં જમા કરવામાં સામેલ સરકારી અધિકારીઓ અને કર્મચારીઓની ધરપકડ થઈ શકે છે.

#WATCH | Mumbai | On FIR registered against 8 people in the alleged Ayodhya Ram Mandir donations embezzlement case, Shiv Sena (UBT) MP Sanjay Raut says, "The main culprits are still working in the Trust. Those who consider themselves 'Hindutvawadi' steal crores of Rupees from the… pic.twitter.com/9wME8pTR8E
— ANI (@ANI) June 26, 2026

રામમંદિરમાં ચોરી કરેલા રૂપિયાનો ઉપયોગ સાંસદોને ખરીદવા કર્યોઃ સંજય રાઉત
અયોધ્યા રામ મંદિર દાન કૌભાંડ કેસમાં 8 લોકો સામે ફરિયાદ નોંધીને ધરપકડ કરાયા બાદ શિવસેના (UBT) ના સાંસદ સંજય રાઉતે કહ્યું કે, "મુખ્ય ગુનેગારો હજુ પણ ટ્રસ્ટમાં કામ કરી રહ્યા છે. જેઓ પોતાને 'હિન્દુત્વવાદી' માને છે તેઓ મંદિરમાંથી કરોડો રૂપિયા ચોરી કરે છે અને આ પૈસા રાજકારણમાં પ્રવેશ કરે છે. જ્યાં તમે તેનો ઉપયોગ સાંસદોને ખરીદવા અને રાજકીય પક્ષોને વિભાજીત કરવા માટે કરો છો. તમે રામ મંદિરમાંથી ચોરાયેલા 2000 કરોડ રૂપિયાનો ઉપયોગ TMC, શિવસેના (UBT) ના સાંસદોને વિભાજીત કરવા માટે કર્યો હતો."

સાંસદ સંજયસિંહે કૌભાંડના પુરાવા રજૂ કર્યા
સાંસદ સંજયસિંહે જણાવ્યું કે, તેમણે 11 પુરાવા રજૂ કર્યા છે. ટ્રસ્ટે હરીશ અને કુસુમ પાઠક પાસેથી ₹4.97 કરોડની જમીન ₹8 કરોડમાં ખરીદી હતી. આ વ્યવહારના સાક્ષીમાં ઋષિ કુમાર ઉપાધ્યાય અને અનિલ મિશ્રાનો સમાવેશ થાય છે. અનિલ મિશ્રા ટ્રસ્ટના સભ્ય છે. જ્યારે ઋષિ કુમાર તે સમયે ભાજપના મેયર હતા. સુલતાન અંસારી અને રવિ મોહન તિવારીએ 2021માં હરીશ અને કુસુમ પાઠક પાસેથી ખરીદેલી જમીન ટ્રસ્ટને માત્ર પાંચ મિનિટ પછી ₹18.5 કરોડમાં વેચી દેવામાં આવી હતી.

₹41.60 લાખની કિંમતની જમીનનું ₹2 કરોડમાં વેચાણ
ઋષિ ઉપાધ્યાયના ભત્રીજાએ ₹20 લાખમાં જમીન ખરીદી. જે સાત મહિના પછી ટ્રસ્ટના મહાસચિવ ચંપત રાયને વેચાણ કરી હતી. 14 મે 2020ના રોજ ઋષિ ઉપાધ્યાયના ભત્રીજા દીપનારાયણને ભેટ તરીકે જમીન મળી. આ જમીન ત્યારબાદ ચંપત રાયને ₹1 કરોડમાં વેચવામાં આવી. 20 મે 2021ના રોજ ચંપત રાયે બ્રજ મોહન દાસ પાસેથી ₹92.50 લાખની કિંમતની જમીન ₹5.60 કરોડમાં ખરીદી. ₹51.80 લાખની જમીન કેટલી કિંમતે વેચાણ થઈ તે જાણી શકાયું નથી. પરંતુ તે પણ ચંપત રાયે ખરીદી હતી.

16 નવેમ્બર 2023ના રોજ 9 કરોડ રૂપિયાની જમીન ₹50.47 કરોડ રૂપિયામાં ખરીદવામાં આવી હતી. 2 એપ્રિલ 2024ના રોજ ₹2.92 કરોડની કિંમતનો જમીનનો પ્લોટ ચંપત રાયને 24 કરોડ રૂપિયામાં વેચવામાં આવ્યો. સંજય સિંહે કહ્યું, "હું મૂળ દસ્તાવેજો લાવ્યો છું. તેમાંથી બચવાનો કોઈ રસ્તો નથી. અયોધ્યાના એસડીએમએ પોતે લેખિતમાં પ્રમાણિત કર્યું છે કે આ નઝુલની જમીન છે. આ જમીન ₹24 કરોડમાં કેવી રીતે ખરીદવામાં આવી? આ ટ્રસ્ટને દાનમાં આપેલા ભંડોળમાંથી ચોરી સીધી લૂંટ છે.

તપાસ પર સૌની નજર
શ્રી રામ મંદિર હિન્દુઓની આસ્થાનું કેન્દ્ર હોવાથી આ કેસને લઈને સમગ્ર દેશની નજર તપાસ પર ટકેલી છે. SITની અંતિમ તપાસ અને કોર્ટની કાર્યવાહી બાદ સમગ્ર મામલે વધુ સ્પષ્ટતા થશે કે જવાબદારી કોની હતી અને આગળ શું પગલાં લેવામાં આવશે.

June 26, 2026 | 14:40 IST