રામ મંદિરમાં દાન ચોરી કેસમાં મોટી કાર્યવાહી

Ram Mandir Donation Theft Case: દેશભરના કરોડો શ્રદ્ધાળુઓની આસ્થાનું કેન્દ્ર ગણાતા અયોધ્યાના રામ મંદિરમાં દાનની કથિત ચોરી અને ગેરવહીવટ મામલે હવે મોટું વળાંક આવ્યું છે. ઉત્તર પ્રદેશ સરકાર દ્વારા રચાયેલી સ્પેશિયલ ઇન્વેસ્ટિગેશન ટીમ (SIT)એ પોતાનો પ્રાથમિક અહેવાલ સરકારને સોંપ્યા બાદ પોલીસ દ્વારા 8 લોકો સામે FIR નોંધવામાં આવી છે. આ કેસમાં બે આરોપીઓની ધરપકડ પણ કરવામાં આવી છે, જ્યારે અન્ય આરોપીઓની પૂછપરછ ચાલુ છે.આ સમગ્ર ઘટનાએ દેશભરમાં ચર્ચા જગાવી છે, કારણ કે કરોડો ભક્તો દ્વારા મંદિરને આપવામાં આવતું દાન સંપૂર્ણ પારદર્શિતા સાથે સંચાલિત થવું જોઈએ તેવી અપેક્ષા હોય છે.આ સમગ્ર મામલો રામ મંદિરમાં શ્રદ્ધાળુઓ દ્વારા ચઢાવવામાં આવેલા દાનના સંચાલન અને નોટોની ગણતરી દરમિયાન થયેલી કથિત ગેરરીતિઓ સાથે જોડાયેલો હોવાનું કહેવાઈ રહ્યું છે. પોલીસ અને તપાસ એજન્સીઓ હવે નાણાંની હેરફેર, સંડોવાયેલા લોકોની ભૂમિકા અને સમગ્ર કાવતરાની દિશામાં તપાસ આગળ વધારી રહી છે. આ ઘટનાએ દેશભરમાં ચર્ચા જગાવી છે અને હવે આગામી દિવસોમાં વધુ ધરપકડો થવાની શક્યતા પણ વ્યક્ત કરવામાં આવી રહી છે.

શું છે સમગ્ર મામલો?
તાજેતરના દિવસોમાં રામ મંદિરમાં ભક્તો દ્વારા આપવામાં આવતા રોકડ દાન, સોનું, ચાંદી અને કિંમતી વસ્તુઓના હિસાબમાં ગેરરીતિ થયાની ફરિયાદો સામે આવી હતી.ત્યારબાદ ઉત્તર પ્રદેશ સરકારે સમગ્ર મામલાની નિષ્પક્ષ તપાસ માટે SITની રચના કરી હતી.SITએ મંદિરમાં દાન એકત્ર કરવાની, તેની ગણતરી કરવાની, સંગ્રહ કરવાની અને રેકોર્ડ રાખવાની સમગ્ર પ્રક્રિયાની તપાસ કરી હતી.આ દરમિયાન અનેક દસ્તાવેજો,CCTV ફૂટેજ, કર્મચારીઓના નિવેદનો અને નાણાકીય રેકોર્ડની ચકાસણી કરવામાં આવી હતી.

SIT રિપોર્ટ બાદ નોંધાઈ FIR
SIT દ્વારા પ્રાથમિક તપાસ પૂર્ણ કરીને સરકારને અહેવાલ સોંપ્યા બાદ શ્રી રામ જન્મભૂમિ તીર્થ ક્ષેત્ર ટ્રસ્ટ સાથે જોડાયેલા સભ્ય કૃષ્ણ મોહનની ફરિયાદના આધારે અયોધ્યા પોલીસ સ્ટેશનમાં FIR નોંધવામાં આવી.પોલીસે આ FIRમાં 8 નામજોગ વ્યક્તિઓ ઉપરાંત કેટલાક અજાણ્યા લોકો સામે પણ ગુનો નોંધ્યો છે. આરોપોમાં ચોરી, ગુનાહિત વિશ્વાસઘાત, ગેરવહીવટ, ષડયંત્ર અને ચોરીના માલના વ્યવહાર જેવા ગંભીર ગુનાઓનો સમાવેશ કરવામાં આવ્યો છે.

કયા લોકો સામે કાર્યવાહી?
માહિતી અનુસાર, આ કેસમાં રમાશંકર યાદવ (ટિન્નુ યાદવ), અનુકલ્પ મિશ્રા, અવિનાશ શુક્લા, મનીષ યાદવ, રમાશંકર મિશ્રા, સુભાષ, કરુણેશ અને લવકુશ મિશ્રા સામે FIR નોંધવામાં આવી છે. આરોપીઓમાં લવકુશ મિશ્રા અને અનુકલ્પ મિશ્રાની ધરપકડ કરવામાં આવી છે. બંને રામ મંદિર ખાતે દાનમાં આવેલી નોટોની ગણતરીના કામ સાથે સંકળાયેલા હોવાનું જણાવવામાં આવી રહ્યું છે. ઉપરાંત અવિનાશ ત્રિપાઠી, કરુણેશ પાંડે, સુભાષ ચંદ્ર અને મનીષ યાદવને પણ પૂછપરછ માટે કસ્ટડીમાં લેવામાં આવ્યા છે.

બે આરોપીઓની ધરપકડ
તપાસ દરમિયાન પોલીસને બે આરોપીઓ પાસેથી કથિત રીતે દાનની રકમનો એક ભાગ મળ્યો હોવાનું જણાવાયું છે. અનુકલ્પ મિશ્રા અને લવકુશ મિશ્રાની ધરપકડ કરવામાં આવી છે, જ્યારે બાકીના આરોપીઓની પૂછપરછ ચાલુ છે.પોલીસે આરોપીઓ સામે ભારતીય ન્યાય સંહિતાની વિવિધ કલમો હેઠળ ગુનો નોંધ્યો છે. તેમાં ગુનાહિત ષડયંત્ર, સંયુક્ત જવાબદારી, નોકર અથવા કર્મચારી દ્વારા માલિકની મિલકતની ચોરી, વિશ્વાસઘાત અને ચોરીના માલને છુપાવવા અથવા તેનો વ્યવહાર કરવા સંબંધિત જોગવાઈઓનો સમાવેશ થાય છે.

કઈ કલમો હેઠળ નોંધાયો કેસ?
ઉત્તર પ્રદેશ સરકારના નિર્દેશ બાદ આ મામલે ભારતીય ન્યાય સંહિતા (BNS)ની કલમ 306, 316(5), 317(4), 317(5), 61 અને 3(5) હેઠળ ગુનો નોંધવામાં આવ્યો છે. આ કલમો ચોરી, ઉચાપત, ગુનાહિત વિશ્વાસઘાત, છેતરપિંડી, ગુનાહિત કાવતરું અને સંસ્થાના કર્મચારી દ્વારા વિશ્વાસનો ભંગ જેવા ગંભીર ગુનાઓ સાથે સંબંધિત છે. કેસ અયોધ્યાના રામજન્મભૂમિ પોલીસ સ્ટેશનમાં શ્રી કૃષ્ણ મોહનની ફરિયાદના આધારે નોંધવામાં આવ્યો છે.

ક્યારે શરૂ થયો હતો સમગ્ર વિવાદ?
આ સમગ્ર મામલો સૌપ્રથમ 7 જૂને રાજકીય ચર્ચાનો વિષય બન્યો હતો. સમાજવાદી પાર્ટીના અધ્યક્ષ અખિલેશ યાદવે દાવો કર્યો હતો કે રામ મંદિરમાં શ્રદ્ધાળુઓ દ્વારા આપવામાં આવેલા કરોડો રૂપિયાના દાનમાં ગેરરીતિ થઈ છે. તેમણે આ મામલે કોર્ટ હસ્તક્ષેપ કરે અને સમગ્ર ઘટનાની નિષ્પક્ષ તપાસ કરવામાં આવે તેવી પણ માંગ કરી હતી. ત્યારબાદ મામલો વધુ ગંભીર બનતાં તપાસ માટે SITની રચના કરવામાં આવી હતી.

રાજકીય પ્રતિક્રિયાઓ પણ સામે આવી
આ કાર્યવાહીને લઈને વિવિધ રાજકીય પક્ષોની પ્રતિક્રિયાઓ પણ સામે આવી રહી છે. વિશ્વ હિન્દુ પરિષદના કાર્યકારી અધ્યક્ષ આલોક કુમારે આક્ષેપ કર્યો કે સમાજવાદી પાર્ટી અને કોંગ્રેસ ઉત્તર પ્રદેશ વિધાનસભા ચૂંટણીને ધ્યાનમાં રાખીને આ મુદ્દાને રાજકીય રંગ આપવાનો પ્રયાસ કરી રહ્યા છે. બીજી તરફ તપાસ એજન્સીઓનું કહેવું છે કે કાર્યવાહી માત્ર ઉપલબ્ધ પુરાવા અને તપાસના આધારે કરવામાં આવી રહી છે. હાલ તપાસ ચાલુ હોવાથી સમગ્ર મામલે વધુ વિગતો આગામી દિવસોમાં સામે આવી શકે છે.

ટ્રસ્ટની ભૂમિકા
શ્રી રામ જન્મભૂમિ તીર્થ ક્ષેત્ર ટ્રસ્ટના સભ્ય દ્વારા જ પોલીસમાં સત્તાવાર ફરિયાદ કરવામાં આવી હતી. ટ્રસ્ટે પણ સમગ્ર મામલાની પારદર્શક તપાસને સમર્થન આપ્યું હોવાનું અહેવાલોમાં જણાવાયું છે.આ મામલો સામે આવ્યા બાદ વિવિધ રાજકીય પક્ષોએ પોતાની પ્રતિક્રિયા આપી છે. કેટલાક નેતાઓએ સમગ્ર મામલે પારદર્શિતા જાળવવાની માંગ કરી છે, જ્યારે કેટલાકે તપાસની પ્રક્રિયા અંગે પ્રશ્નો ઉઠાવ્યા છે. જોકે હાલમાં પોલીસ તપાસ ચાલુ હોવાથી અધિકૃત તપાસના પરિણામોની રાહ જોવામાં આવી રહી છે.

અત્યાર સુધી તપાસમાં શું બહાર આવ્યું છે?
રામ મંદિર દાન ચોરી કેસની તપાસમાં જાણવા મળ્યું છે કે રામશંકર યાદવ, જેને ટીનુ યાદવ તરીકે પણ ઓળખવામાં આવે છે, તેણે દાનની સૌથી મોટી ચોરી કરી હતી. દાન રાખવામાં આવતા બોક્સની ચાવીઓ પણ ટીનુ યાદવે રાખી હતી. મંદિરમાં કોને નોકરી આપવામાં આવશે અને પ્રસાદની ગણતરી માટે કોણ જવાબદાર રહેશે તે બધું તે જ નક્કી કરતો હતો. એવું પણ બહાર આવ્યું છે કે રામ મંદિર સંકુલમાં ટિનુ યાદવનો અંતિમ નિર્ણય હતો. મંદિર સંકુલમાં પોલીસ કર્મચારીઓ ક્યાં તૈનાત કરવામાં આવશે તે તે જ નક્કી કરતો હતો. તેથી, શરૂઆતમાં ટિનુ યાદવ પર શંકા ગઈ, અને હવે FIRમાં તેનું નામ આવ્યા પછી તેની ભૂમિકાની સંપૂર્ણ તપાસ કરવામાં આવશે.