રેલવે ગ્રુપ-D ભરતી 2026: 22,000 જગ્યાઓ પર થશે ભરતી

સરકારી નોકરીની તૈયારી કરી રહેલા યુવાનો માટે વર્ષની શરૂઆતમાં જ ખુશખબર આવી છે. રેલ મંત્રાલયે ગ્રુપ ડી (લેવલ-1) હેઠળ 22,000 થી વધુ નવી જગ્યાઓ પર ભરતી પ્રક્રિયા શરૂ કરવાની મંજૂરી આપી દીધી છે. આ ભરતી દ્વારા એન્જિનિયરિંગ, ઇલેક્ટ્રિકલ અને મિકેનિકલ સહિતના 11 વિવિધ વિભાગોમાં નિમણૂક કરવામાં આવશે.

કયા વિભાગમાં કેટલી જગ્યાઓ? 

રેલવે બોર્ડના આંકડા મુજબ, સૌથી વધુ 11,000 જગ્યાઓ ટ્રેક મેન્ટેનર ગ્રેડ-IV માટે ફાળવવામાં આવી છે. આ ઉપરાંત પોઈન્ટ્સમેન, આસિસ્ટન્ટ બ્રિજ અને લોકો શેડ જેવા ટેકનિકલ પદો પર પણ ભરતી થશે. વિવિધ રેલવે ઝોન મુજબ જગ્યાઓની વહેંચણી કરવામાં આવી છે, જેમાં દક્ષિણ પૂર્વ રેલવેમાં 1199 અને પૂર્વ મધ્ય રેલવેમાં 993 પદોનો સમાવેશ થાય છે.

લાયકાત અને વય મર્યાદા : 

આ ભરતીની સૌથી મોટી વિશેષતા એ છે કે ઉમેદવાર માત્ર 10 પાસ હોવો જોઈએ. હવે આ પદો માટે ITI ની જરૂરિયાત ફરજિયાત રાખવામાં આવી નથી. ઉમેદવારની ઉંમર 18 થી 36 વર્ષની વચ્ચે હોવી જોઈએ, જેમાં અનામત વર્ગના ઉમેદવારોને નિયમ મુજબ છૂટછાટ આપવામાં આવશે.

પસંદગી પ્રક્રિયા અને શારીરિક કસોટી : 

પસંદગી ચાર મુખ્ય તબક્કામાં થશે: કોમ્પ્યુટર આધારિત લેખિત પરીક્ષા (CBT), શારીરિક ક્ષમતા કસોટી, દસ્તાવેજ ચકાસણી અને મેડિકલ ટેસ્ટ. શારીરિક કસોટીમાં પુરુષ ઉમેદવારોએ 35 કિલો વજન સાથે 100 મીટર દોડવાનું રહેશે, જ્યારે મહિલાઓ માટે આ વજન 20 કિલો નક્કી કરાયું છે. આ સિવાય 1000 મીટરની દોડ પણ ફરજિયાત છે.

સત્તાવાર જાહેરનામું જાન્યુઆરીના પ્રથમ સપ્તાહમાં પ્રસિદ્ધ થવાની શક્યતા છે. રસ ધરાવતા ઉમેદવારોએ રેલવે ભરતી બોર્ડની વેબસાઈટ પર નજર રાખવી જોઈએ.