ભારતના સૌથી સ્વચ્છ શહેર તરીકે ઓળખાતા ઈન્દોરમાં દુષિત પાણીએ કોહરામ મચાવ્યો છે. શહેરના ભાગીરથપુરા વિસ્તારમાં પીવાના પાણીની પાઇપલાઇનમાં ગટરનું ગંદુ પાણી ભળતા ગંભીર જળ દુર્ઘટના સર્જાઈ છે. 
આ પ્રદૂષિત પાણીના સેવનથી અત્યાર સુધીમાં અંદાજે 3થી 8 લોકોના મોત નીપજ્યા છે, જ્યારે 100 થી વધુ રહેવાસીઓ ઝાડા-ઉલ્ટી અને ગેસ્ટ્રોએન્ટેરાઈટીસના ગંભીર લક્ષણો સાથે હોસ્પિટલમાં સારવાર હેઠળ છે.
આ હોનારતનો પ્રારંભ 25 ડિસેમ્બર 2025ના રોજ થયો હતો, જ્યારે નર્મદા નદીના સપ્લાય લાઈનમાંથી આવતા પાણીમાં રહીશોને દુર્ગંધ અને ખરાબ સ્વાદનો અનુભવ થયો હતો. પ્રાથમિક તપાસમાં બહાર આવ્યું છે કે પોલીસ ચોકી પાસેના જાહેર શૌચાલયની નીચે પસાર થતી પીવાના પાણીની મુખ્ય પાઇપલાઇનમાં ભંગાણ પડ્યું હતું, જેના કારણે માનવ મળ-મૂત્ર વાળું ગંદુ પાણી શુદ્ધ પાણી સાથે ભળી ગયું હતું.
ઘટનાની ગંભીરતાને જોતા મધ્યપ્રદેશના મુખ્યમંત્રી મોહન યાદવે આકરી કાર્યવાહીના આદેશ આપ્યા છે. ફરજમાં બેદરકારી બદલ ઝોનલ ઓફિસર શાલિગ્રામ સિતોલે, આસિસ્ટન્ટ એન્જિનિયર યોગેશ જોશીને સસ્પેન્ડ કરવામાં આવ્યા છે, જ્યારે સબ-એન્જિનિયર શુભમ શ્રીવાસ્તવને બરતરફ કરાયા છે. 
સરકારે મૃતકોના પરિવારોને&nbsp;₹2 લાખની સહાય અને અસરગ્રસ્તોને મફત સારવારની જાહેરાત કરી છે. સ્થાનિક ધારાસભ્ય કૈલાશ વિજયવર્ગીયએ પણ હોસ્પિટલની મુલાકાત લઈ તબીબી સુવિધાઓની સમીક્ષા કરી હતી.
આ મુદ્દે હવે રાજકીય ગરમાવો પણ તેજ થયો છે. કોંગ્રેસ નેતા જીતુ પટવારીએ ઈન્દોર મ્યુનિસિપલ કોર્પોરેશનની નિષ્ફળતા પર સવાલ ઉઠાવતા મેયર પુષ્યમિત્ર ભાર્ગવ સામે ફોજદારી ગુનો દાખલ કરવાની માંગ કરી છે. વિપક્ષે આક્ષેપ કર્યો છે કે શહેરને 'સ્વચ્છ' સાબિત કરવામાં વહીવટી તંત્ર લોકોના જીવ જોખમમાં મૂકી રહ્યું છે.
હાલમાં ભાગીરથપુરામાં પાણીનો પુરવઠો બંધ કરી દેવામાં આવ્યો છે અને ટેન્કરો દ્વારા પાણી પહોંચાડવામાં આવી રહ્યું છે. લેબ ટેસ્ટિંગ અને ક્લોરિનેશન પ્રક્રિયા પૂર્ણ થયા બાદ જ નવો સપ્લાય શરૂ કરવામાં આવશે. 31 ડિસેમ્બર સુધીની સ્થિતિએ હજુ પણ અનેક દર્દીઓ ઓબ્ઝર્વેશન હેઠળ છે, જેના કારણે મૃત્યુઆંક વધવાની ભીતિ સેવાઈ રહી છે.
&nbsp;

દૂષિત પાણીથી 8ના મોત

ઈન્દોર મ્યુનિસિપલ કોર્પોરેશનની ઘોર બેદરકારીથી અનેકની તબિયત લથડી, રોગચાળાની ગંભીર સ્થિતિ..

December 31, 2025 | 17:24 IST