સેબીના પૂર્વ ચેરમેન માધબી પુરી બુચ અને અધિકારીઓ સામે ફરિયાદ દાખલ કરવા આદેશ

સેબીના પૂર્વ ચેરમેન માધબી પુરી બુચ અને અધિકારીઓ સામે ફરિયાદ દાખલ કરવા મુંબઈની વિશેષ ACB કોર્ટે આદેશ કર્યો છે. કથિત શેરબજાર છેતરપિંડી અન નિયમોના ઉલ્લંઘનના કેસમાં ACB કોર્ટે હુકમ કરીને કોગ્નિઝેબલ ગુનો બનતો હોવાથી નિષ્પક્ષ તપાસની જરૂર હોવાનું કોર્ટે અવલોકન કર્યુ છે.

મુંબઈની સ્પેશિયલ ACB કોર્ટે શનિવારે કથિત શેરબજાર છેતરપિંડી અને નિયમોના ઉલ્લંઘનના કેસમાં SEBIના પૂર્વ ચેરમેન માધવી પુરી બુચ, બોમ્બે સ્ટોક એક્સચેન્જ અને SEBIના ટોચના અધિકારીઓ સામે FIR નોંધવાનો આદેશ આપ્યો છે. 30 દિવસમાં કેસ સાથે સંબંધિત સ્ટેટસ રિપોર્ટ જમા કરાવવા કોર્ટે હુકમ કર્યો છે.

એસીબીની સ્પેશિયલ કોર્ટે ટિપ્પણી કરતા કહ્યું હતું કે, દસ્તાવેજોની સમીક્ષા કર્યા બાદ કોર્ટને લાગ્યું છે કે આરોપોમાં કોગ્નિઝેબલ ગુનાનો ખુલાસો થયો છે. તેથી નિષ્પક્ષ તપાસની જરૂર છે. નિયમનકારી ભૂલો અને મિલીભગતના પ્રથમદર્શી પુરાવા પણ મળ્યા છે. કાયદાના અમલીકરણ અને સેબીની નિષ્ક્રિયતાના કારણે કલમ 153(3) CRPC હેઠળ ન્યાયિક હસ્તક્ષેપની પણ જરૂર છે. એસીબી કોર્ટે ટિપ્પણીમાં એસીબી અપરાધિક એમ.એ.સં.603/2024નો પણ ઉલ્લેખ કર્યો છે.

શું હતો સમગ્ર મામલો?

હિન્ડેનબર્ગના રિપોર્ટમાં અદાણી જૂથના શેરોમાં ગેરરીતિ થઈ હોવાનો આક્ષેપ કરાયો હતો. આ રિપોર્ટમાં સેબીના વડા માધબી પુરી બુચ અને તેમના પતિની પણ સંડોવણીનો આરોપ મૂકાયો હતો. જો કે, માધબી પુરી બુચે તમામ આરોપોને નકારી કાઢ્યા હતા. ત્યારબાદ કોંગ્રેસે આક્ષેપ લગાવ્યો હતો કે, માધબી બુચે સેબીમાં તેમના કાર્યકાળ દરમિયાન લિસ્ટેડ સિક્યોરિટીઝમાં 36.9 કરોડ રૂપિયાનું ટ્રેડિંગ કરી સેબીના નિયમોનું ઉલ્લંઘન કર્યું હતું. કોંગ્રેસે દાવો કર્યો હતો કે, આ ટ્રેડિંગ પ્રવૃત્તિ વર્ષ 2017 થી 2023 ની વચ્ચે થઈ હતી. નાણાકીય વર્ષ 2018-19માં કુલ 19.54 કરોડ રૂપિયાના આર્થિક વ્યવહારો થયા હતા.