આજે સવારે મૌની અમાવસ્યાના દિવસે મહાકુંભમાં નાસભાગ મચી ગઈ હતી. PM નરેન્દ્ર મોદી અને UP ના CM યોગી આદિત્યનાથ આ ઘટના પર નજર રાખી રહ્યા છે. બંને નેતાઓએ મીડિયામાં નિવેદનો આપીને અકસ્માત પર શોક પણ વ્યક્ત કર્યો છે. પરંતુ આ દરમિયાન ઉત્તર પ્રદેશ સરકારના મંત્રી સંજય નિષાદે આ અકસ્માત પર મોટું નિવેદન આપ્યું છે. તેમણે કહ્યું કે, આટલી મોટી ઘટનામાં નાના અકસ્માતો થતા રહે છે, CM તેના પર નજર રાખી રહ્યા છે.
વાસ્તવમાં, નિષાદ સમાજ પાર્ટીના અધ્યક્ષ સંજય નિષાદ દુર્ઘટના બાદ એક કાર્યક્રમમાં હાજરી આપવા હરદોઈ આવ્યા હતા. અહીં મીડિયા દ્વારા સવાલ પૂછવામાં આવતા તેમણે કહ્યું કે, મહાકુંભના આટલા મોટા મેનેજમેન્ટ અને આટલી મોટી ભીડ સાથે નાની નાની ઘટનાઓ બને છે. રાજ્યના CM પોતે આ મામલે તપાસ કરી રહ્યા છે.
અફવાઓ પર ધ્યાન ન આપો, જ્યાં જગ્યા મળે ત્યાં સ્નાન કરો...
મીડિયા રિપોર્ટ્સ અનુસાર, સંજય નિષાદે વધુમાં કહ્યું કે, મહાકુંભમાં ઘણી ભીડ હોય છે, આવી સ્થિતિમાં લોકોએ ચિંતા કરવાને બદલે ત્રિવેણીના કિનારે જ્યાં જગ્યા મળે ત્યાં સ્નાન કરવું જોઈએ. લોકોએ વધુ પડતી અફવાઓમાં ન પડવું જોઈએ. તમને જણાવી દઈએ કે, આજે બપોર સુધી મોની અમાવસ્યાના દિવસે મહાકુંભમાં 4 કરોડથી વધુ લોકોએ અમૃત સ્નાન કર્યું છે.
દુર્ઘટના પર દુઃખ વ્યક્ત કર્યું, લોકોને કરી આ અપીલ...
સંજય નિષાદે કહ્યું કે, મહાકુંભમાં આજે સવારે જે ઘટના બની તે ખૂબ જ દુઃખદ છે. અમે આનાથી અત્યંત દુઃખી છીએ. અમે શાંતિ માટે અપીલ કરીએ છીએ. મહાકુંભમાં મોટી સંખ્યામાં ભક્તો ઉમટી પડે છે. આ ઘટના કયા સંજોગોમાં બની તે અલગ વાત છે, પરંતુ આગળ જતાં આપણે ઈચ્છીએ છીએ કે શાંતિ રહે અને જ્યાં તક હોય, જ્યાં ઘાટ હોય તે જ જગ્યાએ લોકોએ સ્નાન કરવું જોઈએ.

UP મંત્રી સંજય નિષાદના નિવેદનથી હોબાળો...

"ચિંતા ન કરો, જ્યાં જગ્યા મળે ત્યાં સ્નાન કરો" – મંત્રી સંજય નિષાદની અપીલ

January 29, 2025 | 18:04 IST