લક્ઝરી કાર અને વધતો રફ્તારનો જીવલેણ ખેલ

રાજસ્થાનના જયપુરમાં શુક્રવારે મોડી રાત્રે એક બેફામ બનેલી લક્ઝરી ઓડી કારે મોતનું તાંડવ ખેલ્યું હતું. શહેરના વ્યસ્ત ગણાતા પત્રકાર કોલોની વિસ્તારમાં પૂરઝડપે આવતી ઓડી કારે રોડ સાઈડની ખાણીપીણીની લારીઓને અડફેટે લેતા એક શ્રમિકનું ઘટનાસ્થળ પર કમકમાટીભર્યું મોત નીપજ્યું છે, જ્યારે 16 જેટલા લોકો ગંભીર રીતે ઇજાગ્રસ્ત થયા છે.

સ્થાનિક પોલીસના જણાવ્યા અનુસાર, દુર્ઘટના સમયે ઓડી કાર અન્ય એક વાહન સાથે રેસ લગાવી રહી હોવાનું પ્રાથમિક તપાસમાં બહાર આવ્યું છે. ખારબાસ સર્કલ પાસે કાર ચાલકે સ્ટિયરિંગ પરનો કાબૂ ગુમાવતા કાર ડિવાઈડર સાથે અથડાઈને સીધી ફૂડ સ્ટોલ્સમાં ઘૂસી ગઈ હતી. તે સમયે ત્યાં 50થી વધુ લોકો હાજર હતા. પ્રત્યક્ષદર્શીઓના જણાવ્યા અનુસાર, કારે 10થી વધુ લારીઓને કચડી નાખી હતી અને લગભગ 100 મીટર દૂર એક ઝાડ સાથે અથડાયા બાદ ઉભી રહી હતી.

આ કરુણ ઘટનામાં ભીલવાડાના વતની રમેશ બૈરવા નામના યુવકનું મોત થયું છે. ઇજાગ્રસ્તો પૈકી 4ની હાલત અત્યંત નાજુક હોવાથી તેમને SMS હોસ્પિટલમાં રિફર કરવામાં આવ્યા છે. પોલીસ તપાસમાં બહાર આવ્યું છે કે કાર ચાલક દિનેશ રીંવા એક ઉદ્યોગપતિ છે અને અકસ્માત સમયે તે નશાની હાલતમાં હતો. અકસ્માત બાદ તે ફરાર થઈ ગયો હતો, જોકે કારમાં સવાર અન્ય એક વ્યક્તિને લોકોએ પકડીને પોલીસને હવાલે કર્યો હતો.

રાજસ્થાનના મુખ્યમંત્રી ભજનલાલ શર્માએ આ ઘટના અંગે ઊંડા શોકની લાગણી વ્યક્ત કરી છે અને ઇજાગ્રસ્તોને શ્રેષ્ઠ સારવાર આપવા વહીવટીતંત્રને આદેશ આપ્યો છે. પોલીસે હાલમાં લક્ઝરી કાર જપ્ત કરી ફરાર આરોપીઓની શોધખોળ તેજ કરી છે.