Kulgam LeT Terrorist Lateef Bhat Killed: જમ્મુ-કાશ્મીરમાં આતંકવાદ સામે સુરક્ષાદળોની કાર્યવાહી તેજ બની છે. દક્ષિણ કાશ્મીરના કુલગામ જિલ્લાના લારુ વિસ્તારમાં સુરક્ષાદળો અને આતંકવાદીઓ વચ્ચે થયેલી અથડામણમાં લશ્કર-એ-તૈયબા (LeT) સાથે જોડાયેલા બે આતંકવાદીઓ માર્યા ગયાના અહેવાલ છે. માર્યા ગયેલા આતંકવાદીઓમાં સ્થાનિક કમાન્ડર મોહમ્મદ લતીફ ભટ્ટનો પણ સમાવેશ થતો હોવાનું જણાવવામાં આવી રહ્યું છે. જોકે, આ અંગે સત્તાવાર પુષ્ટિની રાહ જોવાઈ રહી છે. આ કાર્યવાહી 11 નવેમ્બરે કુલગામમાં CRPFની 46મી બટાલિયનની ચેકપોસ્ટ પર થયેલા હુમલા બાદ શરૂ કરવામાં આવેલા સર્ચ ઓપરેશન સાથે જોડાયેલી હોવાનું માનવામાં આવે છે. આ હુમલામાં CRPFના ત્રણ જવાનો ઘાયલ થયા હતા. સુરક્ષાદળોને શંકા હતી કે આ હુમલા પાછળ લતીફ ભટ્ટનો હાથ હતો. ભારતીય સેના, CRPF અને જમ્મુ-કાશ્મીર પોલીસ દ્વારા સંયુક્ત રીતે આતંકવાદીઓની શોધખોળ હાથ ધરવામાં આવી રહી હતી.
લારુ વિસ્તારમાં ઘેરાબંધી દરમિયાન અથડામણ
મળતી માહિતી અનુસાર, કુલગામના વિવિધ વિસ્તારોમાં કેટલાય દિવસથી સુરક્ષાદળો સર્ચ ઓપરેશન ચલાવી રહ્યાં હતાં. આ દરમિયાન લારુ વિસ્તારમાં આતંકવાદીઓ છુપાયા હોવાની માહિતી મળી હતી. સુરક્ષાદળોએ વિસ્તારને ઘેરીને શોધખોળ શરૂ કરી ત્યારે ગોળીબાર થયો હતો. ત્યારબાદ વધારાના સુરક્ષાદળોને પણ ઘટનાસ્થળે બોલાવવામાં આવ્યા હતા. અહેવાલો મુજબ, અથડામણમાં લશ્કર-એ-તૈયબા સાથે જોડાયેલા બે આતંકવાદીઓ માર્યા ગયા હતા. તેમાં મોસ્ટ વોન્ટેડ સ્થાનિક આતંકવાદી મોહમ્મદ લતીફ ભટ્ટનો પણ સમાવેશ હોવાનું કહેવાય છે. લતીફની શોધ સુરક્ષા એજન્સીઓ લાંબા સમયથી કરી રહી હતી.
11 નવેમ્બરે CRPF ચેકપોસ્ટ પર હુમલો, ત્રણ જવાનો ઘાયલ
કુલગામમાં 11 નવેમ્બર, 2026ના રોજ બપોરે આશરે 2:15 વાગ્યે મીર બજાર નજીક નૌપોરા અખરાન વિસ્તારમાં CRPFની 46મી બટાલિયનની ચેકપોસ્ટ પર આતંકવાદીઓએ ગોળીબાર કર્યો હતો. આ સ્થળ જમ્મુ-શ્રીનગર નેશનલ હાઇવેની નજીક આવેલું છે. આ હુમલામાં હેડ કોન્સ્ટેબલ સોમવીર સિંહ, કોન્સ્ટેબલ રાકેશ દાસ અને કોન્સ્ટેબલ સંતોષ ચંદ્રુ ઘાયલ થયા હતા. ત્રણેય જવાનોને સારવાર માટે અનંતનાગની સરકારી મેડિકલ કોલેજ (GMC) ખાતે ખસેડવામાં આવ્યા હતા. હુમલા બાદ સુરક્ષાદળોએ આતંકવાદીઓની શોધખોળ માટે મોટા પાયે કાર્યવાહી શરૂ કરી હતી. ભારતીય સેના, CRPF, સ્પેશિયલ ઓપરેશન ગ્રુપ (SOG) અને જમ્મુ-કાશ્મીર પોલીસે સંયુક્ત કોર્ડન એન્ડ સર્ચ ઓપરેશન (CASO) હાથ ધર્યું હતું.
500થી વધુ લોકોની પૂછપરછ, સમગ્ર કાશ્મીરમાં હાઇ એલર્ટ
હુમલા બાદ ખુદવાની, અખરાન, મીર બજાર અને આસપાસના વિસ્તારોમાં સર્ચ ઓપરેશન હાથ ધરવામાં આવ્યું હતું. આ દરમિયાન 500થી વધુ લોકોની પૂછપરછ કરવામાં આવી હોવાના અહેવાલ છે. સુરક્ષાદળોએ આતંકવાદીઓની ઓળખ અને તેમની હિલચાલ અંગે માહિતી એકત્રિત કરવાની કાર્યવાહી તેજ કરી હતી. CRPFના સ્પેશિયલ ડિરેક્ટર જનરલ સંદીપ ખિરવારે જણાવ્યું હતું કે 11 નવેમ્બરના હુમલા બાદ સમગ્ર જમ્મુ-કાશ્મીરમાં સુરક્ષા વ્યવસ્થા વધુ કડક કરવામાં આવી છે. CRPFએ કેન્દ્રશાસિત પ્રદેશમાં એલર્ટ વધાર્યું હતું. સુરક્ષાદળોએ હુમલામાં સામેલ શંકાસ્પદોની ઓળખ કરી હોવાનો પણ તેમણે ઉલ્લેખ કર્યો હતો. આ દરમિયાન CRPFના ડિરેક્ટર જનરલ જ્ઞાનેન્દ્ર પ્રતાપ સિંહે પણ સુરક્ષાની સ્થિતિની સમીક્ષા કરવા કાશ્મીરની મુલાકાત લીધી હતી.
લતીફ ભટ્ટ કોણ હતો? ઘરેથી ગુમ થયા બાદ આતંકવાદી સંગઠનમાં જોડાયો
લગભગ 22 વર્ષનો મોહમ્મદ લતીફ ભટ્ટ કુલગામ જિલ્લાના ખ્રેવાન ચાદરના નઈ બસ્તી વિસ્તારનો રહેવાસી હોવાનું જણાવવામાં આવે છે. પોલીસના જણાવ્યા અનુસાર, તે ખીણમાં સક્રિય સ્થાનિક આતંકવાદીઓમાંનો એક હતો. લતીફે અભ્યાસ અધવચ્ચે છોડી દીધો હતો અને અગાઉ સુથાર તરીકે કામ કરતો હતો. નવેમ્બર 2025માં તે અચાનક ઘરેથી ગાયબ થઈ ગયો હતો. 19 નવેમ્બર, 2025ની આસપાસ તેના પરિવારજનોએ ગુમ થયાની ફરિયાદ નોંધાવી હતી. ત્યારબાદ તે લશ્કર-એ-તૈયબા સાથે જોડાયો હોવાનું પોલીસનું કહેવું છે. સુરક્ષા એજન્સીઓના જણાવ્યા અનુસાર, લતીફનો સંપર્ક અન્ય આતંકવાદીઓ સાથે પણ હતો. જુલાઈ 2026માં શોપિયામાં થયેલી અથડામણ દરમિયાન તે સુરક્ષાદળોને હાથતાળી આપીને ભાગી છૂટ્યો હોવાનો અહેવાલ છે. તે અથડામણમાં આતંકવાદી ઝાકિર અહેમદ ગની માર્યો ગયો હતો.
પોલીસકર્મી અને બે મજૂરોની હત્યાના કેસમાં પણ લતીફનું નામ
પોલીસના જણાવ્યા અનુસાર, લતીફ ભટ્ટ પર 22 જુલાઈ, 2026ના રોજ અનંતનાગના ભીડભાડવાળા બજારમાં હેડ કોન્સ્ટેબલ આશિક હુસૈન કુરેશીની હત્યામાં સામેલ હોવાનો આરોપ હતો. આ ઉપરાંત, 31 જુલાઈની આસપાસ કુલગામના કિલમ/કેલમ વિસ્તારમાં ઈંટના ભઠ્ઠામાં કામ કરતા છત્તીસગઢના બે બિનસ્થાનિક મજૂરોની ગોળી મારીને હત્યા કરવામાં આવી હતી. આ કેસમાં પણ લતીફનું નામ સામે આવ્યું હતું. તેની ધરપકડ તરફ દોરી જાય તેવી માહિતી આપનાર માટે ₹15 લાખનું ઇનામ જાહેર કરવામાં આવ્યું હોવાની માહિતી છે. દક્ષિણ કાશ્મીરમાં તેની હિલચાલ દરમિયાન તેને કેટલાક વિદેશી આતંકવાદીઓનો સહયોગ મળતો હોવાની પણ સુરક્ષા એજન્સીઓને શંકા હતી.
CRPF હુમલા પહેલાં શ્રીનગરમાં વોન્ટેડ આતંકવાદીઓનાં પોસ્ટર
કુલગામમાં CRPF ચેકપોસ્ટ પર હુમલા પહેલાં શ્રીનગરના અનેક વિસ્તારોમાં સુરક્ષાદળોએ વોન્ટેડ આતંકવાદીઓનાં પોસ્ટર લગાવ્યાં હતાં. લાલ ચોક અને MA રોડની આસપાસ લગાવવામાં આવેલા પોસ્ટરમાં લશ્કર-એ-તૈયબા અને જૈશ-એ-મોહમ્મદના નેટવર્ક સાથે જોડાયેલા ચાર આતંકવાદીઓ અંગે માહિતી માગવામાં આવી હતી. આ આતંકવાદીઓ કાશ્મીરના અલગ-અલગ વિસ્તારોમાં સક્રિય હોવાની આશંકા વ્યક્ત કરવામાં આવી હતી. સુરક્ષાદળોએ તેમની ઓળખ અને હિલચાલ અંગે માહિતી મેળવવા સ્થાનિક સ્તરે કાર્યવાહી પણ તેજ કરી હતી.
24 કલાકમાં બે પોલીસકર્મીઓની હત્યાથી સુરક્ષા ચિંતા વધી
કુલગામમાં CRPF ચેકપોસ્ટ પર હુમલાના 24 કલાકની અંદર કિશ્તવાડ જિલ્લામાં પણ આતંકવાદીઓએ બે સ્પેશિયલ પોલીસ ઓફિસર (SPO)ની હત્યા કરી હોવાના અહેવાલ સામે આવ્યા હતા. મૃતકોની ઓળખ બોબી ચંદ અને યશપાલ કુમાર તરીકે થઈ હતી. અહેવાલો અનુસાર, બંને SPO આતંકવાદ વિરોધી કાર્યવાહી દરમિયાન સુરક્ષાદળો સાથે જોડાવા જઈ રહ્યા હતા ત્યારે તેમના પર હુમલો થયો હતો. સતત થયેલી આ ઘટનાઓને પગલે જમ્મુ-કાશ્મીરમાં સુરક્ષાદળોએ એલર્ટ વધારી દીધું હતું.
કુલગામ એન્કાઉન્ટર બાદ આતંકવાદ વિરોધી ઓપરેશન પર નજર
11 નવેમ્બરના CRPF ચેકપોસ્ટ હુમલા બાદ શરૂ થયેલું સર્ચ ઓપરેશન હવે લારુ વિસ્તારમાં થયેલી અથડામણ સુધી પહોંચ્યું છે. લતીફ ભટ્ટ સહિત બે આતંકવાદીઓ માર્યા ગયાના અહેવાલો વચ્ચે સુરક્ષાદળો માટે આ કાર્યવાહી મહત્વપૂર્ણ માનવામાં આવી રહી છે. જોકે, માર્યા ગયેલા આતંકવાદીઓની ઓળખ અને સમગ્ર ઓપરેશનની વિગતો અંગે સત્તાવાર નિવેદન સામે આવ્યા બાદ જ સ્થિતિ વધુ સ્પષ્ટ થશે.