દરેક વ્યક્તિનું સપનું હોય છે કે તે જીવનમાં એકવાર વિદેશની ધરતી પર પગ મૂકે. પરંતુ આ સપના અને હકીકત વચ્ચે સૌથી મોટું અવરોધ 'વીઝા' (Visa) હોઈ શકે છે. ઘણીવાર લોકો ટિકિટ અને હોટલ બુકિંગ કરાવી લેતા હોય છે, પરંતુ વીઝા પ્રક્રિયામાં નાની એવી ભૂલને કારણે તેમનું આખું પ્લાનિંગ ખોરવાઈ જાય છે. જો તમે પણ પ્રથમવાર અથવા ફરીથી વિદેશ જવાનું વિચારી રહ્યા છો, તો અરજી રિજેક્ટ ન થાય તે માટે કેટલીક બાબતોનું ધ્યાન રાખવું અત્યંત આવશ્યક છે.
વીઝા અરજી કરતી વખતે આ 5 બાબતોનું ખાસ ધ્યાન રાખો :&nbsp;
1. માહિતીની સચોટતા અને પારદર્શિતા
વીઝા ફોર્મ ભરતી વખતે ક્યારેય પણ ખોટી માહિતી ન આપવી જોઈએ. જો તમારી કોઈ અગાઉની વીઝા અરજી રિજેક્ટ થઈ હોય અથવા તમારી સામે કોઈ કાયદાકીય કેસ હોય, તો તેને છુપાવવાને બદલે સ્પષ્ટતા કરવી હિતાવહ છે. ખોટી માહિતી આપવાથી તમે કાયમ માટે તે દેશમાં પ્રવેશવા પર પ્રતિબંધ (Ban) મેળવી શકો છો.
2. સંપૂર્ણ દસ્તાવેજોની તૈયારી
દરેક દેશના દૂતાવાસ (Embassy) દ્વારા એક ચેકલિસ્ટ આપવામાં આવે છે. જેમાં સામાન્ય રીતે છેલ્લા 6 મહિનાનું બેંક સ્ટેટમેન્ટ, ઇન્કમ ટેક્સ રિટર્ન (ITR), કન્ફર્મ હોટલ બુકિંગ અને રિટર્ન ટિકિટનો સમાવેશ થાય છે. આમાંથી એક પણ દસ્તાવેજ ખૂટતો હોય તો તમારી અરજી નામંજૂર થઈ શકે છે.
3. નાણાકીય સદ્ધરતા (Financial Stability)
વીઝા ઓફિસર એ બાબતની ખાતરી કરવા માંગતા હોય છે કે તમારી પાસે વિદેશમાં રહેવા અને ખાવા-પીવાનો ખર્ચ ઉઠાવવા માટે પૂરતા નાણાં છે કે નહીં. તમારા ખાતામાં અચાનક મોટી રકમ જમા કરાવવાને બદલે, નિયમિત રીતે બચત દર્શાવતું સ્ટેટમેન્ટ વધુ વિશ્વસનીય માનવામાં આવે છે.
4. મજબૂત ટ્રાવેલ હિસ્ટ્રી
જો તમે પ્રથમવાર જ કોઈ મોટા દેશ (જેમ કે અમેરિકા કે યુકે) ના વીઝા એપ્લાય કરી રહ્યા છો, તો રિજેક્શનના ચાન્સ વધી શકે છે. તેના બદલે પહેલા થાઈલેન્ડ, દુબઈ કે સિંગાપોર જેવા દેશોની મુલાકાત લઈને તમારી ટ્રાવેલ હિસ્ટ્રી મજબૂત બનાવવી જોઈએ.
5. વતન પરત ફરવાની ખાતરી (Home Ties)
વીઝા આપતી વખતે અધિકારી સૌથી વધુ એ તપાસે છે કે તમે પ્રવાસ પૂરો કરીને ભારત પરત આવશો કે નહીં. આ માટે તમારે તમારા સ્થાયી બિઝનેસના કાગળો, નોકરીનું લીવ લેટર અથવા પારિવારિક જવાબદારીઓના પુરાવા રજૂ કરવા જોઈએ.
વીઝા એપ્લાય કરવાની સ્ટેપ-બાય-સ્ટેપ રીત :&nbsp;
દેશ અને પ્રકાર નક્કી કરો: સૌ પ્રથમ નક્કી કરો કે તમે કયા દેશમાં જઈ રહ્યા છો અને તમારો હેતુ શું છે (ટૂરિસ્ટ, બિઝનેસ કે સ્ટુડન્ટ).
સત્તાવાર વેબસાઇટની મુલાકાત: હંમેશા જે તે દેશની એમ્બેસીની સત્તાવાર વેબસાઇટ પરથી જ ફોર્મ ડાઉનલોડ કરો અથવા ઓનલાઈન ભરો.
એપોઈન્ટમેન્ટ બુકિંગ: ફોર્મ ભર્યા પછી બાયોમેટ્રિક્સ અને ઈન્ટરવ્યુ માટે એપોઈન્ટમેન્ટ લેવી પડે છે.
ઈન્ટરવ્યુની તૈયારી: જો જરૂર જણાય તો વીઝા ઓફિસર તમને પ્રશ્નો પૂછી શકે છે. તમારા પ્રવાસના હેતુ અને રોકાણ અંગે સ્પષ્ટ અને આત્મવિશ્વાસ સાથે જવાબ આપો.&nbsp;

વીઝા અરજી માટેની જરૂરી ટિપ્સ

વીઝા અરજી રિજેક્ટ ન થાય તે માટે આ 5 મહત્વની બાબતો અને સ્ટેપ-બાય-સ્ટેપ રીત જાણી લો

March 29, 2026 | 17:45 IST