j&k: ગાંદરબલમાં આતંકવાદી હુમલો, એકડોક્ટર સહિત 7 લોકોના મોત

 

જમ્મુ અને કાશ્મીરના ગાંદરબલ જિલ્લામાં આતંકવાદી હુમલામાં ડૉક્ટર સહિત છ બાંધકામ કામદારોના મોત થયા છે. NIA હવે આતંકી હુમલાની તપાસ કરશે. નેશનલ ઇન્વેસ્ટિગેશન એજન્સી (NIA)ના એક વરિષ્ઠ અધિકારીની આગેવાની હેઠળની એક ટીમ સોમવારે ઘટના સ્થળ માટે રવાના થઈ હતી.

અધિકારીઓએ જણાવ્યું કે હુમલો રવિવારે ગગનગીર વિસ્તારમાં એક લેબર કેમ્પ પર થયો હતો. આ તમામ એક ખાનગી કંપનીમાં નોકરી કરતા હતા. હુમલામાં સાત લોકોએ જીવ ગુમાવ્યા હતા. માર્યા ગયેલા લોકોમાં સ્થાનિક અને બહારના લોકોનો સમાવેશ થાય છે જેઓ ગગનગીર અને સોનમર્ગ વચ્ચે ટનલ પ્રોજેક્ટમાં કામ કરી રહ્યા હતા.

માર્યા ગયેલા લોકોની ઓળખ - ફહીમ નાસીર (સિક્યોરિટી મેનેજર, બિહાર), આંગિલ શુક્લા (મિકેનિકલ મેનેજર, મધ્યપ્રદેશ), મોહમ્મદ હનીફ (બિહાર), ડૉ. શાહનવાઝ (બડગામ, કાશ્મીર), કલીમ (બિહાર), શશી અબરોલ (ડિઝાઇનર, જમ્મુ) ) અને ગુરમીત સિંહ (રિગર, ગુરદાસપુર, પંજાબ).

આ ઘટના બાદ સુરક્ષા દળોએ વિસ્તારને કોર્ડન કરી લીધો હતો અને આતંકીઓને શોધવા માટે ઓપરેશન શરૂ કર્યું હતું. હુમલો રવિવારે રાત્રે 8:15 કલાકે થયો હતો.

હુમલા બાદ કેન્દ્રીય ગૃહ મંત્રી અમિત શાહે સોશિયલ મીડિયા પ્લેટફોર્મ 'X' પર લખ્યું, "હું જમ્મુ અને કાશ્મીરના ગગનગીરમાં નિર્દોષ નાગરિકો પરના આ કાયરતાપૂર્ણ આતંકવાદી હુમલાની સખત નિંદા કરું છું.સંડોવાયેલા લોકોને બક્ષવામાં આવશે નહીં અને સુરક્ષા દળો દ્વારા કડક કાર્યવાહી કરવામાં આવશે. આ મુશ્કેલ સમયમાં, હું શહીદોના પરિવારો પ્રત્યે મારી સંવેદના વ્યક્ત કરું છું અને ઘાયલોના ઝડપથી સ્વસ્થ થવાની પ્રાર્થના કરું છું."

જમ્મુ અને કાશ્મીરના લેફ્ટનન્ટ ગવર્નર મનોજ સિન્હાએ કહ્યું, "હું ગંગાગીરમાં નાગરિકો પરના આ ધિક્કારપાત્ર આતંકવાદી હુમલાની સખત નિંદા કરું છું. હું લોકોને ખાતરી આપું છું કે આ કૃત્ય પાછળ જે પણ હોય,તેમને ચોક્કસ સજા થશે. અમે પોલીસ, સેના અને સુરક્ષા દળોને સંપૂર્ણ સ્વતંત્રતા આપી છે. અમારા બહાદુર સૈનિકો મેદાનમાં છે અને સુનિશ્ચિત કરશે કે આતંકવાદીઓ આ કૃત્યની ભારે કિંમત ચૂકવે. મારા વિચારો શોકગ્રસ્ત પરિવારો સાથે છે અને ઘાયલોના ઝડપથી સાજા થવાની પ્રાર્થના. આખો દેશ દુઃખની આ ઘડીમાં પરિવારોની સાથે છે."

જમ્મુ અને કાશ્મીરના મુખ્યમંત્રી ઓમર અબ્દુલ્લાએ આ હુમલાની સખત નિંદા કરી હતી અને તેને આતંકવાદીઓનું કાયર અને ઘૃણાસ્પદ કૃત્ય ગણાવ્યું હતું.

પીડીપીના અધ્યક્ષ મહેબૂબા મુફ્તીએ આ ઘટનાની નિંદા કરી અને તેને “સંવેદનહીન હિંસા” ગણાવી. જમ્મુ અને કાશ્મીર પ્રદેશ કોંગ્રેસ સમિતિના પ્રમુખ તારિક હમીદ કારાએ પણ હુમલાની નિંદા કરી છે.