મહાકુંભ દરમિયાન ગંગા-યમુના નદીનું પાણી શુદ્ધ કે પ્રદૂષિત? CPCB એ કરી સ્પષ્ટતા...

કેન્દ્રીય પ્રદૂષણ નિયંત્રણ બોર્ડ (CPCB) એ તેના તાજેતરના અહેવાલમાં જણાવ્યું છે કે મહાકુંભ દરમિયાન ગંગા અને યમુના નદીઓનું પાણી સ્નાન માટે નિર્ધારિત ધોરણોને પૂર્ણ કરતું હતું. આ રિપોર્ટ નેશનલ ગ્રીન ટ્રિબ્યુનલ સમક્ષ રજૂ કરવામાં આવ્યો હતો. રિપોર્ટમાં કહેવામાં આવ્યું છે કે ડેટાની વિવિધતાને કારણે આંકડાકીય વિશ્લેષણ જરૂરી હતું.

રિપોર્ટમાં કહેવામાં આવ્યું છે કે, આંકડાકીય વિશ્લેષણ જરૂરી હતું કારણ કે નમૂનાઓ અલગ અલગ તારીખે એકત્રિત કરવામાં આવ્યા હતા અને આ બધા નમૂનાઓ અલગ અલગ જગ્યાએથી લેવામાં આવ્યા હતા.

સાચા મૂલ્યાંકનમાં કઈ સમસ્યાઓ હતી?

કેન્દ્રીય પ્રદૂષણ નિયંત્રણ બોર્ડે જણાવ્યું હતું કે, અલગ-અલગ નમૂનાઓને કારણે સમગ્ર નદીના પાણીનું ચોક્કસ મૂલ્યાંકન કરવું ખૂબ જ મુશ્કેલ હતું. કેન્દ્રીય પ્રદૂષણ નિયંત્રણ બોર્ડે કહ્યું છે કે મહાકુંભની શરૂઆતથી તેઓ દર અઠવાડિયે બે વાર નદીના પાણીનું પરીક્ષણ અને દેખરેખ રાખી રહ્યા છે.

રિપોર્ટમાં કહેવામાં આવ્યું છે કે 12 જાન્યુઆરીથી 28 ફેબ્રુઆરી સુધી ગંગા નદીમાં પાંચ સ્થળોએ અને યમુના નદીમાં બે સ્થળોએ પાણીનું નિરીક્ષણ કરવામાં આવ્યું હતું અને આ માટે નિષ્ણાતોની એક સમિતિ તૈનાત કરવામાં આવી હતી.

ગયા મહિને, CPCB એ ગંગાના પાણીને ગંદુ જાહેર કર્યું હતું....

17 ફેબ્રુઆરીના રોજ, CPCB એ NGT ના અધ્યક્ષ ન્યાયાધીશ પ્રકાશ શ્રીવાસ્તવની પેનલને જણાવ્યું હતું કે મહાકુંભ દરમિયાન ઘણી જગ્યાએ પાણીની ગુણવત્તા સ્નાન માટેના મૂળભૂત ધોરણોને પૂર્ણ કરતી નથી.

બોર્ડે 17 ફેબ્રુઆરીના રોજ પોતાના અહેવાલમાં જણાવ્યું હતું કે ગંગા અને યમુનાના પાણીમાં ફેકલ કોલિફોર્મ બેક્ટેરિયાનું ઉચ્ચ સ્તર જોવા મળ્યું છે. કેન્દ્રીય પ્રદૂષણ નિયંત્રણ બોર્ડના અહેવાલમાં જણાવાયું છે કે પાણીમાં ફેકલ કોલિફોર્મનું પ્રમાણ પ્રતિ 100 મિલી પાણીમાં 2,500 યુનિટ કરતાં ઘણું વધારે હતું.