ઈન્ડિગો સંકટ: 1000+ ફ્લાઈટ્સ રદ, CEOએ માફી માંગી

છેલ્લા બે-ત્રણ દિવસથી દેશની સૌથી મોટી એરલાઈન કંપની ઈન્ડિગો (IndiGo) ગંભીર સંકટનો સામનો કરી રહી છે, જેના કારણે ગુજરાત સહિત અનેક રાજ્યોમાં ફ્લાઈટ્સ રદ કરવાની ફરજ પડી છે. સમગ્ર મામલે આજે ઈન્ડિગોના CEO પીટર એલ્બર્સે પ્રથમ પ્રતિક્રિયા આપી અને મુસાફરોની માફી માંગી છે.

ઈન્ડિગોના CEOની પ્રતિક્રિયા : 

પાયલટો માટે સરકારે જાહેર કરેલા નવા નિયમોના અમલને કારણે એરલાઈન કંપનીને કામકાજમાં મોટી મુશ્કેલી પડી રહી છે. આ સમસ્યાને પગલે આજે જ ઈન્ડિગોએ 1000થી વધુ ફ્લાઈટ્સ રદ કરી છે. ઈન્ડિગોના CEO પીટર એલ્બર્સે મુસાફરોને વિનંતી કરતા જણાવ્યું કે, છેલ્લા થોડા દિવસથી કંપનીને કામકાજમાં સમસ્યા આવી રહી છે અને જે ફ્લાઈટ્સ રદ કરવામાં આવી છે તેના મુસાફરો કૃપા કરીને એરપોર્ટ પર ન જાય.

તેમણે ઉમેર્યું કે, આજે ફ્લાઈટ્સ સૌથી વધુ પ્રભાવિત થઈ કારણ કે આખી સિસ્ટમ ફરીથી રિબૂટ કરવામાં આવી છે. ઈન્ડિગોનું સંચાલન 10થી 15 ડિસેમ્બરની વચ્ચે સામાન્ય રીતે ચાલુ થઈ જશે. તેમણે મુસાફરોને થઈ રહેલી અસુવિધા માટે માફી માંગી છે.

DGCAએ તપાસના આદેશ આપ્યા : 

દેશભરમાં ઈન્ડિગોના ફ્લાઈટ્સ ઓપરેશનમાં સર્જાયેલા સંકટ બાદ સરકાર સક્રિય થઈ છે. ડાયરેક્ટોરેટ જનરલ ઓફ સિવિલ એવિએશન (DGCA) એ એરલાઈન્સ પાયલોટ માટે જાહેર કરેલો વિકલી રેસ્ટ (સાપ્તાહિક આરામ) અંગેનો પોતાનો અગાઉનો આદેશ તાત્કાલિક અસરથી પાછો ખેંચી લીધો છે.

વધુમાં, DGCAએ ઈન્ડિગો વિરુદ્ધ તપાસના આદેશ આપ્યા છે. તમામ ખામીઓની તપાસ કરવા માટે ચાર સભ્યોની કમિટી બનાવવામાં આવી છે, જેમાં DGCAના વરિષ્ઠ અધિકારીઓ સામેલ છે. તપાસ કમિટી 15 દિવસમાં DGCAને પોતાનો રિપોર્ટ સોંપશે, જેથી આગળની કાર્યવાહી થઈ શકે.

ઉચ્ચ-સ્તરીય તપાસ શરૂ: નાગરિક ઉડ્ડયન મંત્રી

નાગરિક ઉડ્ડયન મંત્રી રામ મોહન નાયડૂએ સોશિયલ મીડિયા પ્લેટફોર્મ X પર પોસ્ટ કરીને જણાવ્યું કે, ઈન્ડિગોની ફ્લાઈટ્સમાં વિલંબ અને રદ થવાના કારણે થઈ રહેલી મુશ્કેલીઓની એક ઉચ્ચ-સ્તરીય તપાસ શરૂ કરી દેવાઈ છે. જવાબદારી નક્કી કરાશે અને ભવિષ્યમાં આવી મુશ્કેલીઓને રોકવા માટે મહત્ત્વના પગલાં ભરવામાં આવશે.

તેમણે ખાતરી આપી કે મુસાફરોની સુવિધા અને સુરક્ષા સરકારની સર્વોચ્ચ પ્રાથમિકતા બની રહેશે. મંત્રીએ આશા વ્યક્ત કરી કે સરકાર પરિસ્થિતિને સામાન્ય કરવા માટે તાત્કાલિક અને મોટા પગલાં ભરી રહી છે અને 3 દિવસમાં પરિસ્થિતિ સામાન્ય થવાની અપેક્ષા છે. નવા નિર્દેશો લાગુ થયા બાદ ફ્લાઈટ્સનું શેડ્યૂલ આવતીકાલથી સ્થિર થવા લાગશે.