ભારતીય રેલવે દ્વારા સંચાલન ખર્ચને પહોંચી વળવા અને સુરક્ષા વ્યવસ્થાને વધુ સુદ્રઢ બનાવવાના હેતુથી ભાડાના માળખામાં આંશિક ફેરફાર કરવાની જાહેરાત કરવામાં આવી છે. રેલવેના આ નવા દરો આગામી 26 ડિસેમ્બર 2025થી સમગ્ર દેશમાં અમલી બનશે.
કયા વર્ગમાં કેટલો થયો વધારો?&nbsp;
રેલવે પ્રશાસને સામાન્ય મુસાફરો પર વધારાનો બોજ ન પડે તેનું ખાસ ધ્યાન રાખ્યું છે. નવા માળખા મુજબ:
લોકલ અને સીઝન ટિકિટ: સબર્બન ટ્રેનો અને માસિક પાસ (MST)ના ભાડામાં કોઈ જ ફેરફાર કરવામાં આવ્યો નથી.
સામાન્ય શ્રેણી (ઓર્ડિનરી ક્લાસ): 215 કિમી સુધીની મુસાફરીના દરો યથાવત છે, જ્યારે 215 કિમીથી વધુની મુસાફરી માટે કિલોમીટર દીઠ માત્ર 1 પૈસાનો વધારો થયો છે.
મેઈલ/એક્સપ્રેસ અને એસી ક્લાસ: નોન-એસી મેઈલ કે એક્સપ્રેસ ટ્રેનો તેમજ તમામ એસી કોચના ભાડામાં કિલોમીટર દીઠ 2 પૈસાનો વધારો કરવામાં આવ્યો છે.
વધતા ખર્ચને કારણે લેવાયો નિર્ણય :&nbsp;
રેલવેએ ભાડા વધારા પાછળના કારણો સ્પષ્ટ કરતા જણાવ્યું છે કે વર્ષ 2024-25માં કુલ ઓપરેશનલ ખર્ચ 2.63 લાખ કરોડ રૂપિયા સુધી પહોંચી ગયો છે. જેમાં કર્મચારીઓના પગાર પાછળ 1.15 લાખ કરોડ અને પેન્શન પાછળ 60 હજાર કરોડ રૂપિયાનો જંગી ખર્ચ થઈ રહ્યો છે. ભાડાના આ નજીવા ફેરફારથી રેલવેને વાર્ષિક અંદાજે 600 કરોડ રૂપિયાની વધારાની આવક થશે, જેનો ઉપયોગ આધુનિકીકરણ અને મુસાફરોની સુરક્ષા પાછળ કરવામાં આવશે.
રેલવેની વધતી કાર્યક્ષમતા :&nbsp;
ભાડા વધારાની સાથે રેલવેએ પોતાની સિદ્ધિઓ પણ ગણાવી છે. ભારત હાલ વિશ્વનું બીજું સૌથી મોટું કાર્ગો વહન કરતું નેટવર્ક બન્યું છે. તહેવારો દરમિયાન 12,000થી વધુ વિશેષ ટ્રેનો દોડાવીને રેલવેએ પોતાની ક્ષમતા પૂરવાર કરી છે. રેલવે તંત્ર આગામી સમયમાં સામાજિક જવાબદારીની સાથે સુરક્ષિત મુસાફરી પૂરી પાડવા માટે કટિબદ્ધ છે.

રેલવે ભાડામાં વધારો

રેલવે ભાડામાં નજીવો વધારો: 26 ડિસેમ્બરથી એસી અને એક્સપ્રેસ ટ્રેનોની મુસાફરી થશે મોંઘી

December 22, 2025 | 24:10 IST