SIR મુદ્દે દિલ્હીમાં મહાસંગ્રામ! 140થી વધુ સાંસદોની ચૂંટણી પંચ સુધી કૂચ

INDIA Bloc Protest March: મતદાર યાદીના Special Intensive Revision (SIR) ને લઈને દિલ્હીનું રાજકારણ ગરમાયું છે. મંગળવારે INDIA બ્લોકના 140થી વધુ સાંસદોએ સંસદ ભવનથી ચૂંટણી પંચના મુખ્યાલય સુધી વિરોધ કૂચ શરૂ કરી. વિપક્ષી સાંસદો SIR પ્રક્રિયા અને મતદાર યાદી અંગે પોતાની ચિંતા વ્યક્ત કરી રહ્યા છે તથા મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી રહ્યા છે.

 

LIVE: Protest March Against Vote Chori | Parliament House to EC Office, New Delhi https://t.co/9sCG7G7R1A

— Rahul Gandhi (@RahulGandhi) October 6, 2026

 

સંસદથી ચૂંટણી પંચ સુધી વિપક્ષનો મોરચો
INDIA બ્લોકના સાંસદો સવારે મકર દ્વાર ખાતે એકઠા થયા બાદ ચૂંટણી પંચના મુખ્યાલય નિર્વાચન સદન તરફ આગળ વધ્યા. કોંગ્રેસ, સમાજવાદી પાર્ટી, તૃણમૂલ કોંગ્રેસ, NCP-SP, શિવસેના-UBT સહિત અનેક વિપક્ષી પક્ષોના નેતાઓ આ વિરોધમાં જોડાયા છે. કોંગ્રેસના નેતા રાહુલ ગાંધી અને પ્રિયંકા ગાંધી વાડ્રા તેમજ SP વડા અખિલેશ યાદવ પણ આ વિરોધ સાથે જોડાયા છે. વિપક્ષી પક્ષો SIR પ્રક્રિયામાં કથિત અનિયમિતતા અને મતદાર યાદી સંબંધિત મુદ્દાઓને લઈને ચૂંટણી પંચ સમક્ષ પોતાની માંગ રજૂ કરવા માગે છે. વિરોધીઓ “Save Democracy” અને મતદાર અધિકારોને લગતા સૂત્રો સાથે ચૂંટણી પંચ તરફ આગળ વધ્યા હતા.

જ્ઞાનેશ કુમારના રાજીનામાની માંગ
INDIA બ્લોકના નેતાઓ મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી રહ્યા છે. વિપક્ષનો આરોપ છે કે SIR અને મતદાર નોંધણી સંબંધિત પ્રક્રિયામાં પારદર્શિતાનો અભાવ છે. કોંગ્રેસ નેતા રાહુલ ગાંધીએ Form 6માં થયેલા કથિત ફેરફારો અંગે પણ ચૂંટણી પંચ પર સવાલ ઉઠાવ્યા છે. આ આરોપો અંગે ચૂંટણી પંચે અલગ વલણ વ્યક્ત કર્યું છે અને SIR પ્રક્રિયા કાયદાકીય માળખા મુજબ હાથ ધરાતી હોવાનું જણાવ્યું છે. SIR મુદ્દે ચાલી રહેલા વિવાદ વચ્ચે સુપ્રીમ કોર્ટે પણ ચૂંટણી પંચના નિર્ણયોની કાયદાકીય પ્રક્રિયા અંગે પ્રશ્નો ઉઠાવ્યા છે અને કાયદા વિરુદ્ધ અથવા યોગ્ય પ્રક્રિયા વિના લેવાયેલા નિર્ણયોની ન્યાયિક તપાસ થઈ શકે છે તેવો અભિપ્રાય આપ્યો છે.

દિલ્હીમાં 3,000થી વધુ પોલીસકર્મીઓ તૈનાત
વિપક્ષની કૂચને ધ્યાનમાં રાખીને નવી દિલ્હી વિસ્તારમાં સુરક્ષા વ્યવસ્થા કડક કરવામાં આવી છે. ચૂંટણી પંચની ઓફિસ, સંસદ માર્ગ, વિજય ચોક અને જંતર મંતર આસપાસ અનેક સ્તરના બેરિકેડ લગાવવામાં આવ્યા છે. દિલ્હી પોલીસ ઉપરાંત RAF અને અન્ય સુરક્ષા દળોની પણ તૈનાતી કરવામાં આવી છે. અહેવાલો મુજબ નવી દિલ્હી જિલ્લામાં 3,000થી વધુ પોલીસકર્મીઓની તૈનાતી કરવામાં આવી છે. દિલ્હી પોલીસે કૂચને ધ્યાનમાં રાખીને ટ્રાફિક એડવાઇઝરી પણ જાહેર કરી છે. કનોટ પ્લેસ, પટેલ ચોક, સંસદ માર્ગ અને આસપાસના વિસ્તારોમાં ટ્રાફિક ડાયવર્ઝન અને નિયંત્રણ લાગુ કરવામાં આવ્યા છે.

AAP અને DMKએ કૂચથી બનાવી દૂરી
INDIA બ્લોકની આ માર્ચમાં તમામ વિપક્ષી પક્ષો સામેલ નથી. આમ આદમી પાર્ટી (AAP)એ કૂચમાં ભાગ નહીં લેવાનો નિર્ણય કર્યો છે. AAPના રાજ્યસભા સાંસદ સંજય સિંહે કહ્યું કે પાર્ટી SIR મુદ્દે પોતાની રીતે લડત ચાલુ રાખશે. DMKએ પણ આ માર્ચથી અંતર રાખ્યું છે. આ મુદ્દે INDIA બ્લોકની અંદર પણ અલગ-અલગ રાજકીય વ્યૂહરચના જોવા મળી રહી છે. જોકે કોંગ્રેસ સહિત અનેક પક્ષો સંયુક્ત રીતે ચૂંટણી પંચ સામે વિરોધ નોંધાવી રહ્યા છે.

હવે આગળ શું?
કોંગ્રેસ નેતા જયરામ રમેશે અગાઉ જણાવ્યું હતું કે INDIA બ્લોકના પક્ષો 8 ઓક્ટોબર સુધી જિલ્લા સ્તરે પદયાત્રા, વિરોધ પ્રદર્શન અને બેઠકોનું આયોજન કરશે. આ અભિયાન SIR, મતદાર યાદી અને ચૂંટણી પ્રક્રિયામાં પારદર્શિતાના મુદ્દાને લઈને આગળ વધારવાની વાત કરવામાં આવી છે. દિલ્હીમાં શરૂ થયેલી આ કૂચ સાથે SIR વિવાદ, મતદાર યાદી, ચૂંટણી પંચ અને CEC જ્ઞાનેશ કુમાર ફરી રાષ્ટ્રીય રાજકારણના કેન્દ્રમાં આવ્યા છે. એક તરફ વિપક્ષ ચૂંટણી પંચ સામે સવાલો ઉઠાવી રહ્યો છે, તો બીજી તરફ ચૂંટણી પંચ અને સત્તારૂઢ BJP વિપક્ષના આક્ષેપોને નકારી રહ્યા છે. હવે આ વિરોધ કેટલો આગળ વધે છે અને SIR અંગે ચૂંટણી પંચ તરફથી શું આગામી પગલાં લેવાય છે, તેના પર રાજકીય અને કાનૂની બંને સ્તરે નજર રહેશે.