હિમાચલમાં ભારે હિમવર્ષા: 1250 રસ્તાઓ બંધ

હિમાચલ પ્રદેશમાં રજાઓ માણવા ગયેલા પ્રવાસીઓ માટે બરફની મજા હવે મુશ્કેલીમાં ફેરવાઈ ગઈ છે. 26 જાન્યુઆરીના રોજ થયેલી ભારે હિમવર્ષાને કારણે રાજ્યના 1,250થી વધુ રસ્તાઓ બંધ થઈ ગયા છે, જેના પરિણામે હજારો લોકો અધવચ્ચે અટવાઈ પડ્યા છે.

ઠંડીનો કહેર અને એલર્ટની સ્થિતિ : 

લાહુલ-સ્પીતિના તાબોમાં તાપમાન ગગડીને માઈનસ 10.2 ડિગ્રી સેલ્સિયસ સુધી પહોંચી ગયું છે. હવામાન વિભાગે આજે એટલે કે 27 જાન્યુઆરી માટે કુલ્લુ, કિન્નૌર, ચંબા અને લાહુલ-સ્પીતિમાં 'ઓરેન્જ એલર્ટ' જાહેર કર્યું છે. જ્યારે શિમલા અને સોલન જેવા વિસ્તારોમાં વીજળીના કડાકા સાથે હિમવર્ષા માટે 'યલો એલર્ટ' આપવામાં આવ્યું છે.

યુદ્ધના ધોરણે રેસ્ક્યુ કામગીરી : 

રાજ્ય સરકાર દ્વારા રસ્તાઓ પુનઃસ્થાપિત કરવા માટે મેગા ઓપરેશન શરૂ કરવામાં આવ્યું છે. PWD મંત્રી વિક્રમાદિત્ય સિંહના જણાવ્યા અનુસાર, બરફ હટાવવા માટે રાજ્યભરમાં 3,500 જેટલા જેસીબી અને સ્નો બ્લોઅર મશીનો તહેનાત કરવામાં આવ્યા છે. વહીવટી તંત્રનો પ્રયાસ છે કે મુખ્ય માર્ગોને વહેલી તકે ખોલી શકાય જેથી પ્રવાસીઓની અવરજવર શરૂ થઈ શકે

પ્રવાસીઓની મુશ્કેલી અને ખેતી પર અસર : 

બરફવર્ષા જોવા આવેલા પ્રવાસીઓને અત્યારે ખાવા-પીવાની ચીજવસ્તુઓ અને પીવાના પાણી માટે ભારે સંઘર્ષ કરવો પડી રહ્યો છે. લપસણા રસ્તાઓને કારણે ટ્રાફિક જામની સમસ્યા ગંભીર બની છે. જોકે, સરકાર આ હિમવર્ષાને બગીચાઓ અને જળ સ્તર વધારવા માટે આશીર્વાદરૂપ માની રહી છે. તંત્રએ પ્રવાસીઓને હાલ પહાડી વિસ્તારોમાં મુસાફરી ટાળવા અને હવામાનની સૂચનાઓનું પાલન કરવા કડક સૂચના આપી છે.