બિહારના છપરા શહેરમાં શુક્રવારે મોડી રાત્રે એક કાળજું કંપાવનારી ઘટના સામે આવી છે. ઠંડીથી બચવા માટે રૂમમાં&nbsp; સળગાવેલી અંગીઠીના ઝેરી ધુમાડાએ એક જ પરિવારના ચાર સભ્યોનો ભોગ લીધો છે. ભગવાન બજાર પોલીસ સ્ટેશન વિસ્તારની અંબિકા ભવાની કોલોનીમાં બનેલી આ દુર્ઘટનામાં ગૂંગળામણને કારણે ત્રણ નાના બાળકો અને એક વૃદ્ધ મહિલાના કરુણ મોત નીપજ્યા છે, જ્યારે પરિવારના અન્ય ત્રણ સભ્યો જીવન અને મરણ વચ્ચે ઝોલા ખાઈ રહ્યા છે.
પ્રાપ્ત વિગતો અનુસાર, કકડતી ઠંડીથી બચવા માટે પરિવારે રાત્રે સૂતી વખતે રૂમમાં કોલસાની સગડી સળગાવી હતી. રૂમમાં વેન્ટિલેશનનો અભાવ અને દરવાજા-બારીઓ ચુસ્ત રીતે બંધ હોવાને કારણે સગડીમાંથી નીકળતો ઝેરી કાર્બન મોનોક્સાઈડ ગેસ આખા રૂમમાં ફેલાઈ ગયો હતો. આ ગેસ સ્વાદહીન અને ગંધહીન હોવાથી પરિવારના સભ્યોને જોખમની ખબર જ ન પડી અને તેઓ ઊંઘમાં જ અચેત થઈ ગયા હતા. સવારે જ્યારે દરવાજો ખોલવામાં આવ્યો ત્યારે ચાર લોકો મૃત હાલતમાં મળી આવ્યા હતા.
પરિવારમાં શોકનું મોજું આ દુર્ઘટનામાં 70 વર્ષીય કમલાવતી દેવી સહિત 3 બાળકોના કરુણ મોત થયા છે. માસૂમ બાળકોના મોતના સમાચારથી આખા પંથકમાં અરેરાટી વ્યાપી ગઈ છે. અન્ય ત્રણ સભ્યોને ગંભીર હાલતમાં છપરા સદર હોસ્પિટલમાં ખસેડવામાં આવ્યા છે, જ્યાં તેમની હાલત અત્યંત નાજુક હોવાનું તબીબો જણાવી રહ્યા છે. જાણવા મળ્યું છે કે આ પરિવારના કેટલાક સભ્યો સારવાર અર્થે બનારસથી અહીં આવ્યા હતા.
તંત્રની ચેતવણી: 
સાવચેતી જ સલામતી સ્થાનિક પોલીસે ઘટનાસ્થળે પહોંચી મૃતદેહોને પોસ્ટમોર્ટમ માટે મોકલી આપ્યા છે. આ દુર્ઘટનાએ ફરી એકવાર શિયાળામાં બંધ રૂમમાં તાપણું કે સગડી રાખવાના ભયાનક જોખમોને ઉજાગર કર્યા છે. વહીવટી તંત્રએ લોકોને અપીલ કરી છે કે ઠંડીથી બચવા માટે રૂમમાં સગડી સળગાવતી વખતે હંમેશા વેન્ટિલેશનની વ્યવસ્થા રાખવી, જેથી હવાની અવરજવર જળવાઈ રહે અને આવી જાનહાનિ ટાળી શકાય.
&nbsp;

બિહારમાં શ્વાસ રૂંધાતા 4ના મોત

બિહારના છપરામાં અંગીઠીના ઝેરી ધુમાડાથી શ્વાસ રૂંધાતા 4ના મોત, અન્ય 3ની હાલત અત્યંત ગંભીર

December 27, 2025 | 19:03 IST