આંધ્રપ્રદેશમાં બે કારની ટક્કરમાં પરિવારના 5ના મોત!

આંધ્રપ્રદેશના કુર્નૂલ જિલ્લાના કોટેકલ ગામ નજીક શનિવારે એક અત્યંત ગમખ્વાર માર્ગ અકસ્માત સર્જાયો હતો. અહીં બે કાર વચ્ચે જોરદાર ટક્કર થતા બે બાળકો સહિત કુલ પાંચ લોકોના ઘટનાસ્થળે જ મોત નીપજ્યા હતા.

યેમિગાનુરુ ગ્રામીણ પોલીસ સ્ટેશનના સબ-ઇન્સ્પેક્ટર શ્રીનિવાસ દ્વારા આ દુર્ઘટનાની પુષ્ટિ કરવામાં આવી છે. મૃતક પાંચેય લોકો એક જ કારમાં સવાર હતા અને તેઓ કર્ણાટકના કોલાર જિલ્લાના ચિક્કાહોસલ્લી ગામના રહેવાસી હતા. આ પરિવાર મંત્રાલયમમાં આવેલા રાઘવેન્દ્ર સ્વામી મંદિર તરફ જઈ રહ્યો હતો, ત્યારે તેમની કારની બીજી કાર સાથે સામસામે ભીષણ ટક્કર થઈ હતી.

5ના ઘટનાસ્થળે જ મોત

ટક્કર એટલી જોરદાર હતી કે પ્રથમ કારમાં સવાર બે પુરુષ, એક મહિલા અને બે બાળકો સહિત તમામ પાંચ લોકોનું ઘટનાસ્થળે જ મૃત્યુ થયું હતું.

જ્યારે બીજી કારમાં સવાર લોકો પણ ગંભીર રીતે ઘાયલ થયા હતા. તેમને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા છે. પોલીસે મૃતદેહોનો કબજો મેળવીને પોસ્ટમોર્ટમ માટે મોકલી આપ્યા છે. પોલીસે અકસ્માતનું કારણ જાણવા માટે ગુનો નોંધીને વધુ તપાસ શરૂ કરી છે.

કુર્નૂલ અને આંધ્રપ્રદેશના અન્ય વિસ્તારોમાં અગાઉ પણ ગંભીર માર્ગ અકસ્માતો નોંધાઈ ચૂક્યા છે. ભૂતકાળમાં, YSR કડપ્પા જિલ્લામાં પણ બે અલગ-અલગ માર્ગ અકસ્માતોમાં સાત લોકોએ જીવ ગુમાવ્યા હતા. 

વાહનોની વધુ પડતી ઝડપ અને બેકાબૂ વાહન ચલાવવું એ આ પ્રદેશમાં અકસ્માતોનું મુખ્ય કારણ છે.